Məlum olduğu kimi, Azərbaycan Prezidentinin Sərəncamı ilə Emin Hüseynov Qarabağ iqtisadi rayonuna daxil olan işğaldan azad edilmiş ərazilərdə (Şuşa rayonu istisna olmaqla) Azərbaycan Respublikası Prezidentinin xüsusi nümayəndəsi təyin edilib. Bu Sərəncam yenidən icra hakimiyyətlərinin ləğvi ilə bağlı müzakirələri gündəmə gətirib.
Qeyd olunur ki, bu Sərəncam idarəetmədə yeni bir yanaşmadır və digər regionlarda da tətbiq oluna bilər. Bu isə icra hakimiyyətlərini faktiki olaraq lazımsız quruma çevirir və onların ləğvi məsələsini gündəmə gətirir. Digər tərəfdən, bu məsələ idarəetmənin optimallaşdırılması ilə bağlı önəmli hesab olunur.
Qeyd edək ki, 7 iyul 2021-ci ildə Prezident İlham Əliyevin Sərəncamı ilə ölkə üzrə 14 iqtisadi rayon bölgüsü təsdiq edilib. Bakı iqtisadi rayonu (Bakı şəhəri), Naxçıvan iqtisadi rayonu (Naxçıvan şəhəri, Babək, Culfa, Kəngərli, Ordubad, Sədərək, Şahbuz və Şərur rayonları); Abşeron-Xızı iqtisadi rayonu (Sumqayıt şəhəri, Abşeron və Xızı rayonları), Dağlıq Şirvan iqtisadi rayonu (Ağsu, İsmayıllı, Qobustan və Şamaxı rayonları), Gəncə-Daşkəsən iqtisadi rayonu (Gəncə və Naftalan şəhərləri, Daşkəsən, Goranboy, Göygöl və Samux rayonları), Qarabağ iqtisadi rayonu (Xankəndi şəhəri, Ağcabədi, Ağdam, Bərdə, Füzuli, Xocalı, Xocavənd, Şuşa və Tərtər rayonları), Qazax-Tovuz iqtisadi rayonu (Ağstafa, Gədəbəy, Qazax, Şəmkir və Tovuz rayonları), Quba-Xaçmaz iqtisadi rayonu (Xaçmaz, Quba, Qusar, Siyəzən və Şabran rayonları), Lənkəran-Astara iqtisadi rayonu (Astara, Cəlilabad, Lerik, Lənkəran, Masallı və Yardımlı rayonları), Mərkəzi Aran iqtisadi rayonu (Mingəçevir şəhəri, Ağdaş, Göyçay, Kürdəmir, Ucar, Yevlax və Zərdab rayonları), Mil-Muğan iqtisadi rayonu (Beyləqan, İmişli, Saatlı və Sabirabad rayonları), Şəki-Zaqatala iqtisadi rayonu (Balakən, Qax, Qəbələ, Oğuz, Şəki və Zaqatala rayonları), Şərqi Zəngəzur iqtisadi rayonu (Cəbrayıl, Kəlbəcər, Qubadlı, Laçın və Zəngilan rayonları), Şirvan-Salyan iqtisadi rayonu (Şirvan şəhəri, Biləsuvar, Hacıqabul, Neftçala və Salyan rayonları).
Ekspertlər hesab edir ki, məlum sərəncam idarəetmənin optimallaşdırılması anlamına gəlir. İddia olunur ki, hökumət yaxın zamanlarda yeni təcrübəni bütün ölkə üzrə tətbiq edəcək və bu da icra hakimiyyətlərinin ləğvinə gətirib çıxaracaq.
“Tez bir zamanda icra orqanlarını ləğv etmək, düşünürəm ki, hazırda real görünmür, onun yerinə hansısa bir alternativ orqan olmalıdır”
Millət vəkili Tahir Rzayevin sözlərinə görə, yeni model İcra Hakimiyyətlərinin ləğvinə doğru atılan addımdır: “Ölkədə idarəetmənin təkmilləşməsi prosesi uzun müddətdir ki, davam edir. Bir çox orqanların idarə olunmasında bəzi islahatlar aparılıb. Əlbəttə ki, bunu zaman deyəcək. Bu gün icra orqanları bilavasitə ölkə rəhbərinin tapşırıqlarını yerinə yetirən, əsaslandıran, o istiqamətdə bütün məsələləri operativ həll edən orqanlar hesab olunurlar. Rayon ərazisində baş verən bütün hadisələr, məsələlər bu gün icra orqanlarının ixtiyarındadı, onlardan tələb olunur. Tez bir zamanda icra orqanlarını ləğv etmək, düşünürəm ki, hazırda real görünmür. Onun yerinə hansısa bir alternativ orqan olmalıdır. Hələ yoxdur. Bəzən bunu bələdiyyə adlandırırlar. Bələdiyyələrin də maddi-texniki bazası, kadr potensialı, hadisələrə müdaxiləsi yoxdur. Amma icra orqanlarında savadlı mütəxəssislər var, uzun müddətdir işləyirlər, idarəetmə məktəbi keçiblər. Bu, böyük bir idarəetmə orqanıdır, ona görə də birdən-birə ləğvi real görünmür. Ola bilər ki, bir neçə il keçsin, müəyyən qaydada alternativ bir struktur mövcud olsun, əsaslandırılsın və bundan sonra icra orqanlarının səlahiyyətləri həmin struktura keçsin. Cənab Prezident bütün dövlət proqramlarında, layihələrində idarəetmənin təkmilləşməsini əsas vəzifələrdən biri kimi qarşıya qoyur. Ölkə rəhbəri bütün çıxışlarında bunu deyir. Yeni icra başçıları ilə görüşdə də mütləq idarəetmənin təkmilləşdirilməli olduğu, buradakı kadrların bacarıqlı, daim əhali ilə təmasda olmağı xüsusi vurğulanır. Bu gün elə rayon var ki, 250-150 min əhalisi var. Bu qədər insanı razı salmaq çətindir”.
Günel CƏLİLOVA
