Roma papası erməni lobbisinin xidmətində - “Benemerenti” medalı erməni rejissorun “ayaqlarına atıldı”...

Seyid Camal Əzimbəyli: “Papa o addımı atmaqla düşmənçiliyi körükləyir”

img

Erməni mənşəli amerikalı həkim, Türkiyədə qondarma  "erməni soyqırımı"ndan bəhs edən  "Vəd" Hollivud filminin prodüseri Erik İsraelyan Roma Papası Fransisk tərəfindən "Benemerenti" medalı ilə təltif edilib.

Bu barədə Ümumerməni Xeyriyyə Birliyinin ("AGBU") mətbuat xidməti məlumat yayıb.

Qeyd olunur ki, Vatikan lideri mükafatı E.İsrailyana humanitar fəaliyyətinə və xristian dininə xidmətinə görə verib. O, "Benemerenti" medalına layiq görülən ilk ermənidir.

Belədə Roma Papası Qarabağla bağlı sülh çağırışı edir, müxtəlif sülh məzmunlu fikirlər səsləndirir, amma reallıqda bunun əksinə olan addımlar atır. İllər əvvəl Qarabağla bağlı kiçik bir əraziyə görə müharibə etməyə dəyməz deyən Papanın bu davranışı nə deməkdir?

  • “Bu, dinlə uzlaşmayan bir hərəkətdir”

Məsələyə münasibət bildirən şərqşünas Seyid Camal Əzimbəylinin fikrincə, Papanın məlum addımı ali din xadiminə yaraşmır: “Papa o addımı atmaqla düşmənçiliyi körükləyir. Bu həm də dinlərarası ədavəti qızışdırmaq məqsədi daşıyır. Belə addım atmaqla qondarma “soyqırım”ın guya baş verdiyini göstərmək istəyir. Əslində Roma Papasının sözügedən riyakarlığı yeni deyil. 2015-ci ildə Roma Papası I Fransisk Müqəddəs Pyotr kilsəsində çıxışı zamanı Türkiyədə 1915-ci ildə baş verən hadisələri "soyqırımı" kimi təqdim edib. Həmçinin "erməni soyqırımı"nı XX əsrin ilk soyqırımı adlandırıb. Vatikan uzun illərdir erməni təəssübkeşliyini çəkir. Hər vasitə ilə ermənilərə dəstək verir. Roma Papasının son addımı da bütün bu siyasətin davamıdır. Vatikan illərdir ki, erməni lobbisinin maraqlarını təmin edir. Üstəlik, qondarma “erməni soyqırımını” rəsmən tanıyıb. Roma Papası belə bir addım atmaqla Türkiyəni hədəf alır. Bu isə dinlə uzlaşmayan bir hərəkətdir. Onlar ermənilərin əli ilə Türkiyəyə problem yaratmağa çalışırlar. Roma Papasının məlum addımını Azərbaycan da pisləməlidir. Çünki bu məsələdə Azərbaycanla Türkiyə eyni mövqedədir. Biz qardaş ölkə ilə birlikdə erməni lobbisinə qarşı mübarizə aparırıq. Erməni lobbisi belə “təqdimatlardan” təbliğat məqsədi üçün istifadə edir. Ona görə də hesab edirəm ki, din adına yaraşmayan bu cür hallara son qoyulmalıdır”.

Şərqşünas onu da əlavə etdi ki, Papanın bu addımı pislənməlidir.

Vidadi ORDAHALLI

Son xəbərlər