Ermənistan son günlər yenidən yalançı hay-küy salmaqda, özünə məsafəcə yaxın və uzaq ölkələri “köməyə” çağırmaqda davam edir. Niyə çağırır, nə üçün çağırır, məlum deyil.
Sosial mediada və saytlarda yayılan xəbərlərə görə, Ermənistanın İrandakı səfiri İrandan dəstək gözlədiklərini deyib: “Ermənistan öz ərazi bütövlüyünün qorunması üçün İrandan dəstək gözləyir”.
Söhbət nədən gedir, Ermənistan hansı “ərazi bütövlüyü”ndən danışır? İran nə üçün Ermənistana kömək etməlidir? Ermənistanın İrandakı səfiri nə üçün İrana bu şəkildə çağırış edib?
“İran da Ermənistana hər hansı bir hərbi yardım edən deyil”
Qarabağ Azadlıq Təşkilatının (QAT) sədri, politoloq Akif Nağının sözlərinə görə, Ermənistan elə bir vəziyyətdədir ki, hər kəsdən kömək istəyir, umur, bu barədə ən müxtəlif formalarda müraciətlər edir. “Ermənistan Rusiyaya, Fransaya hərbi yardım üçün müraciət edib, amma heç yerdən də bir kömək görmür, görə də bilməz. Çünki Azərbaycanın mövqeyi haqlıdır. Azərbaycan 30 il müddətində Ermənistanın haqq yoluna gələcəyini gözləyib, danışıqların qaydalarına əməl edib, bütün beynəlxalq təşkilatlar qarşısında öhdəliyini yerinə yetirib, bütün qətnamələrə, qərarlara əməl edib, lakin Ermənistan bu qətnamə və qərarları yerinə yetirmədiyinə görə ölkəmiz hərbi yolla öz torpaqlarını işğaldan azad etmək istiqamətində hərəkət edib. Azərbaycan ərazisinin müəyyən bir hissəsi - Xankəndi, Xocalı, Ağdərə Azərbaycanın nəzarətində deyil. Azərbaycan tədricən o ərazilərini də özünə qaytarır. Ermənistanın hay-küyləri onların Sünik dediyi ərazi ilə bağlıdır. Sünik sözü də Azərbaycan sözüdür. Sünik vilayəti də bizim ərazimizdir, bura həmişə Azərbaycanın olub. Biz bu əraziyə Sünik də demişik, Zəngəzur da. Yəni ona görə də Azərbaycan qanunauyğun olaraq öz ərazisini, öz mövqeyini bərpa edir. Həmin Zəngəzur istiqamətində də addımlar atır. Yəni Gorus, Qaragöl istiqaməti Sovet dövrünün rəsmi xəritəsinə görə, Azərbaycan ərazisidir. Həmin əraziləri də Azərbaycan bərpa edir”.
A.Nağı dedi ki, çünki müstəqillik dövrünün ilk illərində Ermənistan qarışıqlıqdan, bizim ölkənin daxilindəki hakimiyyət böhranından istifadə edərək bu ərazimizi də zəbt edib. Bu ərazinin də, Kərkinin də, Qazax istiqamətindəki kəndlərin də Azərbaycana qaytarılmalı olduğunu deyən A.Nağı hesab edir ki, buna Azərbaycanın tam haqqı var və o ərazilərimizi qaytarmaq yönündə addımlar atır. “Hər kəs də bunu başa düşür. 4-5 gündür ki, Azərbaycan, Ermənistan və Rusiya nümayəndələri arasında danışıqlar gedir. Yəni Azərbaycan hərbçiləri Gorus, Qaragöl istiqamətində mövqeləri və ədalətli bir mövqe tutublar. Rusiya da bunu başa düşür və 5 gün ərzində Rusiya rəsmiləri də, ən azından, diplomatik dillə həmin ərazilərin Azərbaycan olduğunu qəbul edirlər və Azərbaycana heç nə deyə bilmirlər. Ermənistan əlacsız vəziyyətdə qalıb, ən çox kömək umduğu Rusiya və Fransadan dəstək ala bilmir, ona görə də səfir vasitəsilə İrana üz tutur. Hər yerdən əli üzülən Ermənistan indi də İrandan yardım istəyir və bu ölkənin dəstəyini qazanmağa can atır. Amma Ermənistanın bu mövqeyi yanlış mövqedir, heç nəyə nail ola bilməyəcək. İran da Ermənistana hər hansı bir hərbi yardım edən deyil. Çünki Azərbaycan regionda yeni bir format, yeni bir reallıq yaradıb və Azərbaycanın yaratdığı bu reallıqla hər kəs, o cümlədən, İran da hesablaşır, digər dövlətlər, beynəlxalq təşkilatlar da hesablaşırlar. Ona görə, suda boğulan Ermənistan “saman çöpündən” yapışır və ayrı-ayrı ölkələrə müraciət edir. Eyni zamanda da Ermənistan bu müraciəti ilə İranla Azərbaycanın münasibətlərini korlamağa çalışır. Amma məqsədlərinə nail ola bilməyəcək. Bu məsələ ilə bağlı İranın siyasəti də aydındır, İran Azərbaycanın ərazi bütövlüyünü dəstəkləyir. İranın Azərbaycanın ərazi bütövlüyünü dəstəkləməkdən başqa yolu da yoxdur. Ermənistanın bu müraciəti səfir səviyyəsində edilib, bunu heç ciddiyə almaq lazım deyil”.
Bununla yanaşı, Ermənistanın müxtəlif yollarla başqa dövlətlərdən dəstək almaq istədiyini deyən A.Nağının sözlərinə görə, bu ərazi bütövlüyü məsələsini də öz məqsədlərinə nail olmaq üçün ortaya atırlar, amma onların cəhdləri əbəsdir. Hər kəs Azərbaycanın regionda yaratdığı reallıqla hesablaşır, Ermənistanın da yeganə çıxış yolu bu reallıqla hesablaşmaqdır” - deyə A.Nağı vurğuladı.
İradə SARIYEVA
