Mayın 12-də Azərbaycanın mədəniyyət paytaxtı Şuşa “Xarıbülbül” musiqi festivalına ev sahibliyi etdi. Qədim mədəniyyət beşiyi olan Şuşa 29 ildən sonra yenə doğmalarını, qonaqlarını layiqincə qarşıladı.
Azərbaycan Respublikasının Prezidenti İlham Əliyev, birinci xanım Mehriban Əliyeva, qızları Leyla Əliyeva və Arzu Əliyeva Şuşada Cıdır düzündə təşkil olunan “Xarıbülbül” musiqi festivalında iştirak ediblər. Bildirilib ki, bundan sonra “Xarıbülbül” festivalı Şuşada hər il keçiriləcək.
Biz bu dəfə dünyaya milli birliyimizin əbədi olması ilə bağlı mesajı Şuşadan, qədim torpağımızdan verdik…
Builki festival Azərbaycanda yaşayan xalqların nümayəndələrini əhatə etdi. Festivalda ölkəmizdə yaşayan müxtəlif xalqların nümayəndələri öz istedadlarını göstərdilər. Ölkə başçısı çıxışında bildirdi ki, bu tövsiyəni festivalın təşkilatçısı olan Heydər Əliyev Fonduna onun özü verib, çünki Vətən müharibəsində Azərbaycanda yaşayan bütün xalqların böyük payı var. Vətən müharibəsi bir daha onu göstərdi ki, Azərbaycanda bütün xalqlar dostluq, qardaşlıq, həmrəylik şəraitində yaşayır. 44 günlük müharibə bir daha onu göstərdi ki, ölkəmizdə milli birlik, milli həmrəylik lazımi səviyyədədir. Təsadüfi deyil ki, birinci festivalda Azərbaycanda yaşayan xalqların nümayəndələri çıxış etdi. Biz bu dəfə dünyaya milli birliyimizin əbədi olması ilə bağlı mesajı Şuşadan, qədim torpağımızdan verdik. Ölkə başçısı festifalda çıxışında bildirib ki, ölkələr belə inkişaf etməlidir, ancaq çoxkonfessiyalı, çoxmillətli ölkələrdə, cəmiyyətlərdə inkişaf olur, birlik olur, milli həmrəylik olur, sülh olur: “Biz dünyanın müxtəlif yerlərində baş verən hadisələri izləyirik, görürük və deyə bilərəm ki, bir neçə il bundan əvvəl bu gün mövcud olan vəziyyəti görürdük. Ona görə həm ölkə daxilində, həm beynəlxalq müstəvidə, o cümlədən ölkəmizdə keçirilmiş çoxsaylı tədbirlərdə multikulturalizmi təbliğ edirdik, müxtəlif xalqların birgəyaşayışını təbliğ edirdik və deyirdik ki, bu, mümkündür. Azərbaycanın timsalında deyirdik ki, bu, mümkündür və göstərirdik, öz təcrübəmizi bölüşürdük, öz fikirlərimizi bölüşürdük və hesab edirəm ki, bizim bu səylərimiz nəticə verdi. Çünki bu gün dünyada bu məsələ ilə bağlı daha dəqiq təsəvvür vardır”.
Azərbaycanda mövcud olan tolerantlıq mühitinin və bu istiqamətdə aparılan siyasətin Vətən müharibəsi zamanı böyük töhfəsini gördük…
Doğrudan da biz Azərbaycanda mövcud olan tolerantlıq mühitinin və bu istiqamətdə aparılan siyasətin Vətən müharibəsi zamanı böyük töhfəsini gördük. Tarixən Qərblə Şərqin kəsişməsində yerləşən bir ölkə kimi bir çox xalqların nümayəndələri Azərbaycanda məskunlaşıb, tolerant mühitdə yaşayıblar və onların burada tarixi abidələri də mövcuddur. Azərbaycanlıların böyüklüyü hər zaman ondan ibarət olub ki, buraya pənah gətirən və məskunlaşan bütün xalqların nümayəndələrinə hər zaman qardaşlıq, dostluq münasibəti bəsləyib və buradakı insanlar həmişə dostluq, qardaşlıq və həmrəylik mühitində yaşayıblar. Bu cür birgəyaşayış qoballaşan dünyada inkişafın ən mühüm amillərindən biridir. Prezident İlham Əliyev daim öz siyasətində tolerantlıq mühitinin, multikulturalizm ənənələrinin qorunmasına böyük önəm verib. Bu istiqamətdə ölkəmizdə böyük işlər aparılıb, bir çox beynəlxalq tədbirlər məhz Azərbaycanda baş tutub. Digər tərəfdən, Heydər Əliyev Fondu tərəfindən dünyanın bir çox ölkələrində bu istiqamətdə böyük işlər görülüb.
Azərbaycanda mövcud olan tolerantlıq mühitinin və bu istiqamətdə aparılan siyasətin Vətən müharibəsi zamanı böyük töhfəsini gördük, çünki Vətən müharibəsində əldə olunan qələbədə ölkəmizdə olan bütün icmaların payı və töhfəsi oldu. Bütün xalqlardan, etnik və dini icmalardan olan nümayəndələr vahid amal və vahid bayraq altında birləşərək çiyin-çiyinə döyüşməklə Azərbaycanda multikultural dəyərlərə böyük önəm verildiysini və Azərbaycanda bütün xalqlara hər zaman eyni münasibətin olduğunu bir daha göstərdilər.
Azərbaycanın Şuşada Qazançı kilsəsinin təmirinə başlaması ölkəmizin tolerantlığının göstəricisidir
Ermənistanın rəsmi təbliğatı, xüsusi qurumları münaqişənin ilk günlərindən etibarən Azərbaycanda müxtəlif dini, etnik icmalar arasında təfriqə yaratmaq, Azərbaycan dövlətçiliyini zəiflətmək, parçalamaq üçün davamlı iş apardı, bu məqsədlə mərkəzlər, təşkilatlar, KİV-lər quruldu, milyonlarla vəsait xərcləndi. Bu işdə xaricdəki erməni lobbisi, onların havadarları da kifayət qədər fəaliyyət göstərdilər. Lakin 44 gün ərzində torpaqlarımızın işğaldan azad olunması üçün bütün etnik və dini icmaların nümayəndələri vahid amal, vahid bayraq altında birləşərək çiyin-çiyinə döyüşməklə bu təbliğatın, bu fəaliyyətin öz hədəfinə çatmadığını, mənasızlığını ortaya qoydu.
Qədim Azərbaycan torpağı olan Şuşada keçirilən “Xarıbülbül” festivalında da Azərbaycanda olan bütün xalqların nümayəndələrinin iştirakı Azərbaycanda multikultural dəyərlərin təcəssümü idi. Orada da xalqlar bunu musiqi, mədəniyyət dili ilə göstərdilər və bütün dünyaya bir mesaj verdilər ki, Azərbaycanda hər zaman milli birlik, milli həmrəylik olub və burada bütün xalqlara xoş qardaşlıq münasibəti var. Bu festival Azərbaycanın Vətən müharibəsində əldə etdiyi böyük Zəfərin mədəniyyət sahəsində davamı idi. Bunun ardınca, Azərbaycan Prezidenti İlham Əliyevin və birinci xanım Mehriban Əliyevanın Qəbələnin Nic qəsəbəsində yerləşən Müqəddəs Məryəm Ana Alban kilsəsini, Müqəddəs Yelisey adına Cotari kilsəsini ziyarət etmələri də Azərbaycanda multikulturalizm və tolerantlıq ənənələrinin qorunub saxlanmasına verilən diqqətin göstəricisidir. Bu bir daha onu göstərir ki, Azərbaycanda bütün xalqların dini və mədəni abidələrinə böyük önəm verilir, onların qorunub saxlanması və bərpa olunması istiqamətində dövlət tərəfindən zəruri tədbirlər görülür. Ermənilərin dağıtdığı və təhqir etdiyi məscidlərin fonunda Azərbaycanın Şuşada Qazançı kilsəsinin təmirinə başlaması ölkəmizin tolerantlığının göstəricisidir.
Kilsədə bərpa işlərinin 44 günlük Vətən müharibəsi zamanı başa çatdırılaraq təhvil verilməsi dünyaya mesajdır
Alban-Udi Xristian İcmasının sədri Robert Mobili deyib ki, ölkə başçısı və birinci xanım Mehriban Əliyevanın "Xarıbülbül" festivalından qayıdar-qayıtmaz Qəbələyə gəlib Müqəddəs Məryəm Ana Alban kilsəsini və digər dini yerləri ziyarət etməsi ölkədə dinlərə olan diqqətin bariz nümunəsidir. O qeyd edib ki, Azərbaycanda bütün etnik qruplar, bütün dinlərin nümayəndələri bir ailə kimi yaşayır və burada multikulturalizm ənənələri qorunub saxlanılır:
“Biz həmişə Prezident İlham Əliyev və birinci xanım Mehriban Əliyevanın udi xalqına olan diqqətini hiss edirik və bu diqqət günbəgün artır. Biz bunu cənab Prezidentin son səfərindən də hiss etdik. Onun və ailəsinin məhz Şuşadan qayıdaraq Qəbələyə gəlməsi, Nic qəsəbəsində Alban kilsələrinə baş çəkməsi bir daha onu sübut edir ki, Azərbaycan multikultural ölkədir və burada bütün xalqlar bir ailə kimi yaşayır”.
R.Mobili Müqəddəs Məryəm Ana Alban kilsəsinin bərpası barədə də danışıb. O qeyd edib ki, kilsədə bərpa işlərinin 44 günük Vətən müharibəsi zamanı başa çatdırılaraq təhvil verilməsi dünyaya mesajdır:
“Kilsə Heydər Əliyev Fondu tərəfindən 2019-cu ildə bərpa olunmağa başlandı və 2020-ci ilin noyabr ayında işlər başa çatdırıldı. Müharibə olmasına baxmayaraq, məhz kilsənin təmiri dayanmadı, davam etdi. Bu da öz növbəsində onu deməyə imkan verir ki, Azərbaycan dünyəvi bir ölkədir. Burada bütün xalqlara və dinlərə böyük diqqət və qayğı var, udi xalqı da bu modelin əsaslarındandır. Azərbaycanda xalqlar hər zaman bir-birinə dəstəkdir. Biz bunu 44 günlük Vətən müharibəsində də gördük. Dini və etnik mənsubiyyətindən asılı olmayaraq, hər kəs Qarabağın azadlığı uğrunda canından keçməyə hazır idi. Bu gün biz o torpaqlara qayıtmışıq və artıq Qarabağdayıq. Burada ermənilər tərəfindən dağıdılmış abidələr də ölkə rəhbərliyinin birbaşa diqqəti nəticəsində əvvəlki görkəminə geri qaytarılacaq".
Şuşada yeni məscidin də təməlinin qoyulması bir daha Azərbaycanın İslam dəyərlərinə, bizim milli-mənəvi dəyərlərimizə bağlılığımızın göstəricisidir
Cənab Prezidentin festivaldakı çıxışında bir məqama diqqət çəkmək lazımdır. Prezident İlham Əliyev qeyd etdi ki, bizi güclü edən milli-mənəvi dəyərlərimiz, bu dəyərlərə olan bağlılığımızdır. Festivalın Ramazan bayramı ərəfəsində keçirilməsi, həmin vaxt orada Yuxarı Gövhərağa məscidinin bərpa olunması, digər yeni məscidin təməlinin qoyulması, bayram namazının qılınması göstərdi ki, Azərbaycan xalqı, Prezident İlham Əliyev və birini vitse-prezident Mehriban Əliyeva milli-mənəvi dəyərlərimizə sıx bağlıdırlar. Bu festivalı keçirməkdə də əsas hədəf və başlıca məqsəd bu dəyərlərin yaşadılmasıdır. Yəni burada artıq biz həm festival keçirdik, həm Ramazan bayramını qeyd etdik, həm də Şuşanın mədəniyyət paytaxtı elan olunmasının şahidi olduq.
Ermənilər işğal altında saxladıqları bütün ərazilərimizdə, o cümlədən də Şuşada müsəlman və xristian abidələrini dağıdıb, saxtalaşdırıblar. Bəzilərində donuz, inək saxlayıblar. Ümumiyyətlə, onlar Qarabağda müsəlmanlığın, İslamın izini silməyə çalışıblar. Azərbaycan artıq Şuşadan başlayaraq digər ərzilərimizdə də bu dəyərlərə sahib çıxır. Biz görürük ki, Şuşada Yuxarı Gövhərağa məscidi təmir olunur və burada yerləşən kilsə də dövlətin bilavasitə diqqət və qayğısı ilə əhatə olunub. Orada da müəyyən təmir və bərpa işləri həyata keçiriləcək. Bu onu göstərir ki, Azərbaycan qısa müddətdə bu ərazilərdəki bütün tarixi-mədəni və dini abidələri bərpa edəcək. Bu, həm müsəlman abidələrinə, həm də qeyri-müsəlman abidələrinə aiddir. Bu dəyərlərin hər birinə bərabər, eyni münasibət göstərilir. Ermənistandan fərqli olaraq, biz bütün dinlərə eyni münasibət bəsləyirik və onlar arasında hansısa bir fərq qoymuruq. Bu da bizim dəyərlərimizə sıx bağlı olmağımızın göstəricisidir.
Şuşada yeni məscidin də təməlinin qoyulması bir daha Azərbaycanın İslam dəyərlərinə, bizim milli-mənəvi dəyərlərimizə bağlılığımızın göstəricisidir. Azərbaycan həm də nümayiş etdirir ki, müsəlman ölkəsidir, demokratik, tolerant və multikultural dövlətdir, amma öz dəyərlərinə də bağlıdır. Dövlətimiz müəyyən mənada qədimiliklə müasirliyin sintezini yaradır və orada biz qədim məscid olan Yuxarı Gövhərağa məscidini bərpa edirik. Digər tərəfdə isə müasir, rəmzi xarakterə malik, yəni Şuşanın işğaldan azad olunduğu ay, eləcə də günü ifadə edən müasir məscidin də təməlini qoymuşuq və inşasını həyata keçirəcəyik.
Məhəmmədəli QƏRİBLİ
Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
