Aprelin 12-də Prezident, Ali Baş Komandan İlham Əliyevin açılışını etdiyi Hərbi Qənimətlər Parkı Ermənistanda əsl isterikaya səbəb olub. Məsələyə baş nazir Nikol Paşinyan da münasibət bildirib və belə bir parkın açılmasının ölkəsi üçün qəbuledilməz olduğunu iddia edib.
Ermənistandan gələn reaksiyalar bir daha təsdiq edir ki, sözügedən parkın açılışı 44 günlük Vətən müharibəsindəki tarixi qələbəmizdən sonra düşmənə və onun havadarlarına verilən növbəti dərs oldu. Azərbaycan Ermənistana və onun havadarlarına Hərbi Qənimətlər Parkının açılışı ilə növbəti məğlubiyyət acısı yaşatdı. Bu mənada təsadüfi deyil ki, Ermənistanla yanaşı, daim onun havadarı qismində çıxış etmiş Fransa da Hərbi Qənimətlər Parkıтın açılışından ciddi narahat olub. Hər halda, Fransanın Ermənistandakı səfiri Conatan Lakotun açıqlamaları da bunu təsdiq edir. Ermənistanın 44 günlük savaşda uduzmasını “ləyaqətli məğlubiyyət” kimi dəyərləndirən səfir Azərbaycanda Hərbi Qənimətlər Parkının açılmasını tənqid edir. Onun bu qəbuledilməz yanaşmasına Xarici İşlər Nazirliyinin Mətbuat xidməti idarəsinin rəisi Leyla Abdullayeva müvafiq cavab verib: "Fransanın Ermənistandakı səfirinin hər hansı bir məsələ ilə bağlı şərh bildirmədən öncə öz ölkəsinə nəzər salması, bu və ya digər məsələlərin onun ölkəsində nə şəkildə həyata keçirildiyinə diqqət yetirməsi yaxşı olardı". Leyla Abdullayeva Fransanın Ermənistandakı səfirinin Azərbaycanda Hərbi Qənimətlər Parkının açılışı ilə bağlı “müharibə tamaşa predmeti olmamalıdır” şərhinə münasibət bildirərkən daha sonra deyib: "Tarix boyu çoxsaylı müharibələrdən keçən və bu müharibələrlə bağlı kompozisiyaları, səfirin dili ilə desək, “tamaşaları” müxtəlif muzeylərdə sərgiləyən Fransa səfiri bizə düşməndən götürülən qənimətlərlə necə davranacağımızımı deyəcək?!". L.Abdullayeva bildirib ki, Fransa səfirlərinin Ermənistanın məğlubiyyətini “ləyaqətli məğlubiyyət” adlandırması da maraq doğurur: "Bəlkə, Fransa səfirinə görə, Ermənistanın 30 ilə yaxın davam edən təcavüzkar siyasəti də “ləyaqətli işğal” olub? Ləyaqətli davranan ölkə, birinci növbədə qonşu ölkənin ərazilərinə iddia ilə çıxış edib, bu ərazilərin bir hissəsini uzun illər işğal altında saxlamaz, bir milyon insanın hüququnu kobudcasına pozmaz, mülki şəxslər də daxil olmaqla, insanları məqsədli şəkildə qətlə yetirməz. Ləyaqətli ölkə hərbi əməliyyatların dayandırılmasına razılıq verdikdən sonra digər ölkə ərazilərinə terrorçu qrupu göndərməz və mina xəritələrini gizlətməklə insan həyatına təhlükə törətməz. Görünür, Fransa səfirinin ləyaqət anlayışı fərqlidir. Uzun illərdir vasitəçi rolunda çıxış edən bir ölkənin rəsmi nümayəndəsinin verdiyi şərhlərə daha məsuliyyətlə yanaşması gərəkdir".
Burada bir məsələni də xatırladaq ki, Hərbi Qənimətlər Parkı kimi dünyada bir çox model mövcuddur. Məsələn, Danimarka Müharibə Muzeyində İkinci Dünya Müharibəsində qəddar aktlar törətmiş nasistlərin uniformaları nümayiş etdirilir. Belə muzeylər Böyük Britaniyada, Polşada da fəaliyyət göstərir. 1944-cü ildə Fransanın özündə isə hərbi parad zamanı əsir düşən nasist əsgərlərin keçidi olub. Cənubi Koreyanın paytaxtı Seulda da hərbi muzey mövcuddur və burada Şimali Koreya-Cənubi Koreya müharibəsində ələ keçirilmiş qənimətlər nümayiş olunur. Amma Fransa nədənsə bunları unudur. Conatan Lakot isə Ermənistanın Azərbaycan ərazilərini minalamasına və müharibədən sonra müvafiq xəritələri hələ də ölkəmizə verməməsinə heç bir etiraz etməyərək ikiüzlü mövqe sərgiləyir. Minsk Qrupunun həmsədrlərinin, o cümlədən də Fransnın bu istiqamətdə fəaliyyətsizliyi səbəbindən 2020-ci il noyabrın 10-da Azərbaycan, Ermənistan və Rusiya liderləri tərəfindən bütün hərbi əməliyyatlara son qoyulduğunu elan edən üçtərəfli bəyanat imzalandığı vaxtdan bugünədək işğaldan azad olunmuş ərazilərdə mina partlaması nəticəsində, 14 nəfəri mülki şəxs olmaqla, Azərbaycanın 20 nəfər vətəndaşı həlak olub, 86 nəfər yaralanıb.
O da faktdır ki, Fransa rəsmiləri Azərbaycan və Ermənistan arasında yaşanan 44 günlük müharibədə sülhü təmin edən bəyanatlar vermək əvəzinə, qızışdırıcı və regionda sabitliyə xələl gətirən çıxışlar etdi. 30 il ərzində münaqişənin nizamlanması ilə bağlı heç nə etməyən, Cənubi Qafqaza heç bir təsir mexanizmi olmayan Paris yaxşı olardı ki, artıq həmsədr kimi mandatını təhvil versin və öz daxili problemləri ilə məşğul olsun. Bu gün dinlərarası və xalqlararası toqquşma meydanına çevrilən Fransa Azərbaycanla, Azərbaycanın daxili işi ilə bağlı açıqlamalar verərkən, nədənsə bunları nəzərə almır. Conatan Lakotun açıqlamaları bir daha təsdiq edir ki, Fransanın rəsmi şəxsləri tərəfindən ATƏT-in Minsk Qrupunun həmsədri kimi Parisin mandatına zidd olaraq birtərəfli, qərəzli və qeyri-obyektiv bəyanatlar hələ də səsləndirilməkdədir. Mandatına uyğun olaraq, Fransa neytral tərəf kimi çıxış etməli olduğu halda, açıq-aşkar ermənipərəst siyasət yürüdür və tamamilə əsassız şəkildə Azərbaycana qarşı ittihamlar irəli sürür. Bu səbəbdən Fransanın Minsk Qrupunun həmsədri vəzifəsindən uzaqlaşdırılması vacibdir. Bu qrup onsuz da heç vaxt bir işə yaramayıb. ATƏT-in Minsk Qrupunun amerikalı keçmiş həmsədri Riçard Hoqlandın “The International Conflict Resolution Center”ə verdiyi son açıqlama qurumun iç üzünü açmağa kifayət edir: “Biz beşulduzlu otellərdə, ayrıca yemək otağı, içərisi dolu barı olan, heç bir əlavə xərc tələb etməyən lüks nömrələrdə qalırdıq. Biz olduğumuz şəhərlərdə ən yaxşı restoranlarda yeyirdik. Yaxşı yaşayırdıq və arabir ATƏT bayrağını qaldıraraq Bakı və Yerevanın yadına Minsk Qrupunun mövcud olduğunu salırdıq. Amma lap açıq danışsam, çox-çox az iş görülürdü”.
Ramil QULİYEV
