“Azərbaycan Avrasiyada enerji təhlükəsizliyini təmin edən mühüm tərəfdaş ölkədir. “Cənub Qaz Dəhlizi” 2020-ci il dekabrın 31-də istismara verildi. Yeddi ölkəni birləşdirən, 3500 kilometr uzunluğu olan “Cənub Qaz Dəhlizi” dünyanın ən böyük enerji infrastrukturu layihələrindən biridir”.
Bu barədə Prezident İlham Əliyev İqtisadi Əməkdaşlıq Təşkilatının XIV onlayn Zirvə toplantısındakı çıxışında bildirib.
Dövlət başçısı sözügedən məsələ ilə bağlı qeyd edib ki, Azərbaycan Avrasiyanın etibarlı nəqliyyat və logistika mərkəzlərindən birinə çevrilib: “Azərbaycan Şərq-Qərb, Şimal-Cənub və Şimal-Qərb nəqliyyat dəhlizləri kimi regional bağlantı layihələrində fəal iştirak edir və ölkəmiz Avrasiyanın əsas və etibarlı nəqliyyat və logistika mərkəzlərindən birinə çevrilib. Biz öz tərəfdaşlarımızla birgə Azərbaycanın nəqliyyat infrastrukturunu Lapis Lazuli nəqliyyat dəhlizi ilə birləşdirdik və nəqliyyat sahəsində çoxtərəfli əməkdaşlıq üçün geniş imkanlar yaratdıq”.
Görünən odur ki, Azərbaycanın nəqliyyat mərkəzi olaraq rolu artmaqda davam edir. Bu isə ölkənin dünyada önəminin daha da yüksəlməsinə təkan verir.
“Orta Asiya ölkələrinin enerji resurslarının sərfəli şərtlərlə...”
Sözügedən məsələ ilə bağlı fikirlərini “Bakı-Xəbər”lə bölüşən AMİP funksioneri Əli Orucovun sözlərinə görə, bununla bağlı reallıq ortadadır: “Reallıq ondan ibarətdir ki, Avrasiyanın enerji və nəqliyyat dəhlizləri Azərbaycanda kəsişir. Çünki Azərbaycan Cənubi Qafqazda çox önəmli bir mövqedə yerləşir. Şərq-Qərb və Şimal-Cənub nəqliyyat dəhlizləri Azərbaycandan keçməklə yanaşı, əlaqələndirmədə ən qısa yol hesab edilir. Məsələn, Şimal-Cənub nəqliyyat dəhlizi tam hazır olandan sonra Rusiya daha tez İran körfəzinə çıxış əldə edəcək. İran körfəzinə çıxış Hind okeanı regionuna çıxış deməkdir. Şimal-Cənub nəqliyyat dəhlizi qədər Rusiyanı sözügedən regionla tez əlaqələndirə biləcək ikinci yol praktiki baxımdan təsəvvür etmək mümkün deyil. Çünki xəritəyə baxsaq görərik ki, digər alternativ yollar çox uzaqdır. Eyni zamanda, Azərbaycan Orta Asiyanı Avropa ilə birləşdirən ən yaxın körpüdür. Orta Asiya ölkələrinin enerji resurslarının sərfəli şərtlərlə Avropa bazarına çıxarılması Azərbaycan vasitəsilə mümkündür. Üstəlik, 44 günlük Vətən müharibəsindən sonra tamamilə yeni reallıqlar yaranıb. Söhbət Zəngəzur dəhlizindən gedir. Hansı ki, 27 sentyabrdan əvvəl bu, xəyal belə edilmirdi. Bunun sayəsində Naxçıvan və Türkiyə ilə bağlantı qurmaq böyük məsafə tələb etməyəcək. Eyni zamanda, bütün bunlar region dövlətlərinin də maraqlarına uyğundur”.
Bütün bunlardan çıxış edən partiya funksioneri hesab edir ki, Azərbaycan bölgədə böyük logistika mərkəzinə çevriləcək.
Vidadi ORDAHALLI
