Biz vaksinlərin inkişaf etmiş və inkişaf etməkdə olan dövlətlər arasında qeyri-bərabər və ədalətsiz şəkildə bölünməsini pisləyirik. Bunu Prezident İlham Əliyev martın 4-də İqtisadi Əməkdaşlıq Təşkilatının XIV onlayn Zirvə toplantısında çıxışı zamanı deyib. Dövlət başçısı bildirib:
"Azərbaycan yanvar ayının 18-dən peyvəndləmə prosesinə başlayıb. Biz regionda peyvəndləməyə start vermiş ilk ölkələrdən biriyik. Biz vaksinlərin inkişaf etmiş və inkişaf etməkdə olan dövlətlər arasında qeyri-bərabər və ədalətsiz şəkildə bölünməsini pisləyirik. Bəzi ölkələr özlərinin ehtiyacları ilə müqayisədə bir neçə dəfə çox həcmdə vaksin alır. Aydındır ki, belə olduğu təqdirdə, bəzi ölkələrə peyvənd çatmayacaq. Azərbaycan bu məsələ ilə bağlı BMT-nin İnsan Hüquqları Şurasında Qoşulmama Hərəkatı adından qətnamə layihəsi ilə çıxış etməyi planlaşdırır və mən İqtisadi Əməkdaşlıq Təşkilatının üzv dövlətlərini həmin təşəbbüsü dəstəkləməyə dəvət edirəm".
Göründüyü kimi, Azərbaycanın peyvəndlərin ədalətsiz bölünməsi ilə bağlı məsələyə Prezident səviyyəsində etiraz etməkdə tam haqlı olduğu üzə çıxdı. Çünki yaranmış vəziyyət dünyadakı insanların sağlamlığı üçün ciddi təhdid yaradıb. Azərbaycan bu ədalətsiz bölgüyə qarşı mübarizə aparanlar sırasında daim ilk sıralarda olub. Xatırladaq ki, Prezident İlham Əliyev yerli və xarici kütləvi informasiya vasitələrinin nümayəndələri üçün keçirdiyi mətbuat konfransında yenidən bu məsələyə toxunaraq, vaksinlərin bölüşdürülməsi ilə bağlı ədalətsizliyə qarşı çıxdı. Bundan əvvəl İlham Əliyev Qoşulmama Hərəkatının sədri kimi sözügedən məsələni qlobal səviyyədə qaldırıb. Dövlət başçısı ötən ilin dekabrında BMT Baş Assambleyasının COVID-19-a həsr edilən xüsusi sessiyasında peyvəndlərin ədalətli bölgüsünün vacibliyini diqqətə çatdırıb, zəngin ölkələrin kasıb dövlətlərin vətəndaşları üçün peyvəndlər almasını təklif edib. Ölkəmizin vaksinasiya mövzusunda təklif etdiyi humanist ideyalara baxmayaraq, bir çox inkişaf etmiş ölkələr tamamilə əks mövqe sərgiləyir. Elə Prezident İlham Əliyevin mətbuat konfransında qeyd etdiyi kimi, onlar sözdə bərabərlik, insan haqları, demokratiya tərəfdarları kimi çıxış edir, praktikada isə milyonlarla insanın, yoxsul ölkələrdə yaşayan və buna imkanı olmayan insanların hüquqlarını tapdalayırlar. İnkişaf etmiş bəzi ölkələrin vaksinlərin bölgüsü ilə bağlı addımları bərabərlik, insan haqları, demokratiya kimi prinsiplərlə bir araya sığmır. Bunlar fonunda Ümumdünya Səhiyyə Təşkilatı dünya ölkələrini vaksin istehsalçıları ilə ikitərəfli müqavilələr bağlamamağa çağırıb: “Vaksin olmasa, pulun əhəmiyyəti yoxdur. Hətta əlimizdə vəsait olduğu şəraitdə zəngin dövlətlər istehsalçılarla ikitərəfli müqavilələr bağlamaqdan çəkinsələr, biz yalnız bu halda vaksinləri yoxsul ölkələrə çatdıra bilərik”.
Çox təəssüflə qeyd etməliyik ki, bu bəşəri problemə qarşı dünyanın əksər siyasi liderləri heç bir addım atmır. İlham Əliyev bu məsələdə əsl prinsipiallıq göstərir. Bu, Azərbaycanın yalnız özünün deyil, həm də bütün dünyanın problemlərinə acıyan bir ölkə olduğunu şərtləndirir. Qoşulmama Hərəkatının sədri kimi quruma üzv ölkələrə edilən çağırış çox effektiv bir təzyiq metodudur. Ümid etmək olar ki, bu sahədəki hərcmərclik aradan qalxacaq. İlham Əliyev bu cür mövqeyilə dünya səviyyəli siyasətçi olduğunu bir daha təsdiqləmiş oldu.
Məhəmmədəli QƏRİBLİ
