“İqtisadi Əməkdaşlıq Təşkilatının üzv dövlətlərini Zəngəzur dəhlizindən faydalanmağa dəvət edirik”. Bunu Prezident İlham Əliyev İqtisadi Əməkdaşlıq Təşkilatının XIV onlayn Zirvə toplantısında çıxışı zamanı deyib.
Prezident İƏT üzvlərini Zəngəzur dəhlizindən faydalanmağa dəvət edərək qeyd edib ki, Azərbaycanın Ermənistan üzərində şanlı qələbəsindən sonra Dağlıq Qarabağ münaqişəsinə son qoyuldu: “Dağlıq Qarabağ münaqişəsi tarixdə qaldı. Biz indi gələcək haqqında düşünürük. Biz bölgədə sülh və sabitliyi təmin etmək üçün bir çox ölkələri birləşdirən nəqliyyat layihələrini müzakirə etməyə başlamışıq”.
Dövlət başçısı onu da qeyd edib ki, Azərbaycan, Türkiyə və İran bölgədə nəqliyyat layihələrinin icrası ilə bağlı vahid mövqe sərgiləyirlər: “Ermənistan da özünü normal apararsa, bu prosesdən faydalana bilər. Bu xüsusda qeyd etmək istərdim ki, Azərbaycanın tarixi ərazisi olan Zəngəzurdan keçəcək və Azərbaycanın əsas hissəsi ilə ölkəmizin ayrılmaz hissəsi Naxçıvan Muxtar Respublikasını və Türkiyəni birləşdirəcək yeni bağlantı dəhlizi regionda nəqliyyat sektorunda yeni imkanlar yaradacaq. Biz İqtisadi Əməkdaşlıq Təşkilatının üzv dövlətlərini Zəngəzur dəhlizindən faydalanmağa dəvət edirik”.
Görünən odur ki, Prezident Zəngəzur dəhlizini İƏT üzvlərinə rəsmən açıq elan etdi. Ümumilikdə, sözügedən məsələ ilə bağlı ölkə başçısının səsləndirdiyi fikirləri ekspertlər necə dəyərləndirirlər?
“Azərbaycan gələcək perspektivdə İslam dünyasında yeni tranzit əlaqələrinin qurulmasına, inkişafa və sülhə töhfə verəcək”
Sözügedən məsələni “Bakı-Xəbər”ə şərh edən politoloq Məhəmməd Əsədullazadə buna bir neçə aspektdən yanaşdı: “İqtisadi Əməkdaşlıq Təşkilatında Prezidentin çıxışı, buradan verdiyi mesajlar əsasən ölkəmizin müharibədən sonra regionda və müsəlman dünyasında mövqeyinin güclənməsini göstərir. Reallıq ondan ibarətdir ki, artıq Azərbaycan müsəlman ölkələri ilə yüksək səviyyədə əlaqələr qurur. Bununla yanaşı, lazım gəldikdə müəyyən məsələlərdə öz mövqeyini diktə edir. Qeyd edim ki, Prezidentin çıxışı sülhə və tərəfdaşlığa, İslam ölkələri arasında münasibətlərin yüksək inkişafına çağırışa əsaslanırdı. Məhz Prezident İlham Əliyev Zəngəzurdan -Mehri dəhlizindən İslam ölkələrinin və bu təşkilatın istifadə etməsinin zəruriliyini qeyd etdi. Bu onu göstərir ki, ölkəmiz gələcək perspektivdə İslam dünyasında yeni tranzit əlaqələrinin qurulmasına, həmçinin, inkişafa və sülhə töhfə verəcək. Hesab edirəm ki, Prezidentin İƏT çıxışı təşkilata üzv ölkələrin bundan sonrakı mərhələdə əlaqələrinin inkişafı üçün bir zəmin yaradar. Azərbaycan məhz bu təşkilata üzv ölkələr arasında siyasi-iqtisadi əlaqələrin moderatoru ola bilər”.
Politoloq hesab edir ki, bu, çox önəmli faktordur.
Vidadi ORDAHALLI
