Əslən azərbaycanlı olan milyarderlərin böyük əksəriyyəti Rusiyada yaşayır və orada fəaliyyət göstərir. Onların Azərbaycanla maraqlanmadığını desək, yanılarıq. Böyük əksəriyyətinin biznes imperiyalarının Azərbaycana qədər uzantıları da var. Hətta bir çox hallarda Azərbaycanda hakimiyyətə olan iddialarını da gizli və ya açıq şəkildə ortaya qoyurlar.
Biz 2013-cü il prezident seçkilərində Rusiyanın ölkəmizə təzyiq layihəsində azərbaycanlı iş adamlarından ibarət “Milyarderlər İttifaqı” klubunun fəaliyyətini də yaxşı xatırlayırıq. Bir çox tanınmış azərbaycanlı zənginin yer aldığı həmin layihənin başlıca məqəsədi Azərbaycanda hakimiyyət dəyişikliyinə nail olmaq idi. Həmin plan tam iflasa uğrayandan sonra milyrderlərimiz yenə öz bizneslərinin başına qayıtdılar. Ancaq onların fəaliyyətini izlədikdə məlum olur ki, Azərbaycanda hakimiyyət dəyişikliyi və ya seçkilərlə bağlı vəziyyət müzakirə mövzusi olan kimi yenidən aktivləşirlər.
Lakin nədənsə, onların timsalında bu aktivliyi biz Azərbaycanın həyata keçirdiyi 44 günlük müharibə dönəmində görmədik. Bəlkə də Rusiyada yaşayan hansısa milyarder ordumuza gizli yardım edib, bunu deyə biləmərik. Ancaq ümumi müşahidələr onu deməyə əsas verir ki, belə hala kütləvi rast gəlmədik. Rusiyadakı azərbaycanlı milyarderlərin bu yöndə olan passivliyini nə ilə izah edə bilərik?
Mirkazım Seyidov: “Öz bizneslərini, maraqlarını qorumağı vətənpərvərlik hissindən üstün tutublar”
Uzun müddət Rusiyadakı Azərbaycan diasporunun rəhbərliyində təmsil olunan ictimai-siyasi xadim Mirkazım Seyidov qəzetimizə açıqlamasında bildirdi ki, Rusiya dünyanın başqa ölkələrindən fərqlənən və Azərbaycana xüsusi münasibətilə seçilən bir dövlətdir: “Bizim ən böyük diaspor təşkilatımız orda olduğu üçün, Rusiyanın əlaqədar qurumları diasporumuzun parçalanmasında maraqlı olublar. Təəssüf ki, belə proseslərdə bizim sapı özümüzdən olan baltalarımız Rusiya hökumətinə dəstək verib. Bu 30 illik tarixmizdə Rusiyadakı diasporumuz ciddi siyasi qüvvəyə çevrilə bilməyib. Bu, bir tarixi faktdır. Bütün bunlara baxmayaraq, Rusiyadakı diasporumuzda dövlətimizə, Prezidentimizə sadiq olan adamlar da vardı. Lakin “Milyarderlər İttifaqı”, “AzerRos”un fəaliyyəti göstərdi ki, burada bizim dövlətçilyimizin əleyinə fəaliyyət göstərən kifayət qədər qüvvə var. Rusiya çox məharətlə bu amildən Azərbaycana təzyiq rıçaqı kimi istifadə edib. Ən qorxulu amil budur ki, bizim rəsmi qurumlar arasında da ziddiyyət var. Rusiyadakı səfirliyimizlə Diaspor Komitəsi uzun illərdi vahid mövqedən çıxış edə bilmir. Hətta açıq formada bir-birilə intriqa da aparırlar. Bu gün Rusiyadakı diaspor təşkilatları arasında gərgin mübarizə gedir. Hamısı da özlərini Azərbaycan dövlətinə yaxın göstərmək istəyir. 44 günlük müharibə dönəmində Rusiyadan Azərbaycana ciddi yardımlar edildi. Razıyam ki, bunu adı dillər əzbəri olan milyarderlər deyil, sadə diaspor nümayəndələri edirdi. Görünən budur ki, iri çaplı diaspor nümayəndələrimiz daha böyük oyunlara cəlb olunur. Onlar istəməyiblər ki, Rusiya vətəndaşı kimi həmin ölkədə güclü olan erməni diasporu ilə üz-üzə dayansınlar. Cəmi bir nəfər milyarderin kömək etdiyinin şahidi oldum. Digər milyarderlər bu məsələdə daha çox Rusiya dövlətinin marağından çıxış ediblər. Öz bizneslərini, maraqlarını qorumağı vətənpərvərlik hissindən üstün tutublar”.
Məhəmmədəli QƏRİBLİ
