Postmüharibə dövrünün bir sıra təhdidləri, xidmətin xüsusiyyətlərini, qulluq və sosial-məişət şəraitinin mürəkkəbliyi nəzərə alınaraq, Müdafiə nazirinin müvafiq əmrinə əsasən hərbi qulluqçuların vəzifə maaşlarına müddətli əlavələr müəyyən edilib.
Müdafiə Nazirliyinin Mətbuat Xidmətindən bildirilib ki, əmrə əsasən, Azərbaycan Ordusunun Ermənistanla dövlət sərhədində və Azərbaycanın Qarabağ bölgəsində Rusiya Federasiyası sülhməramlı kontingentinin yerləşdirildiyi zonaya bitişik ərazilərdə hərbi xidmət keçən hərbi qulluqçuların vəzifə maaşlarına 100 faiz həcmində müddətli əlavələr təyin edilib: "İşğaldan azad edilmiş və hazırda infrastruktur qurulmayan ərazilərdə hərbi xidmət keçən hərbçilərin vəzifə maaşlarına isə 50 faiz həcmində müddətli əlavələr təyin olunub. Qeyd edək ki, əmr cari ilin yanvar və fevral ayları üçün ödəniləcək pul təminatına da şamil edilir".
Məlumdur ki, sözügedən kateqoriyadan olan hərbçilərin əmək haqlarına əlavələrin edilməsi ləğv edilmişdi. Bir qrup hərbçi narazı salınandan, bu mövzu ilə bağlı söz-söhbət bütün dünyaya yayılandan sonra bunu bərpa etmək qərarına gəldilər. Əslində bu addımı atanlar ölkə başçısının yürütdüyü siyasətə xələl gətirmiş olurlar. Bunun məsuliyyətini kim daşımalıdır, olmazdımı ki, əvvəldən belə addım atılmayaydı?
Hərbi-siyasi ekspert Ramil Məmmədli “Bakı-Xəbər”ə açıqlamasında bildirdi ki, bu kimi məsələlərdə əsas məsuliyyəti daşıyacaq tərəf ordunun rəhbərliyidir: “Bizdə qəribə bir tendensiya yaranıb. Aşağıda çalışan qurum rəhbərləri, sanki təşəbbüslə çıxış etməkdən ehtiyat edirlər. Elə düşünürlər ki, bu təşəbbüs ölkə rəhbərliyi tərəfindən etirazla qarşılana bilər. Mən yaxşı xatırlayıram, mərhum Heydər Əliyev məhz bu cür məsələlərlə bağlı tənqidi çıxış etmişdi. Həmin çıxışın ümumi məğzi beləydi ki, mərhum prezident məmurlardan gileylənirdi. Deyirdi ki, niyə hər məsələdə onun nəsə fikir bildirməsini gözləyirlər? Məmurları təşəbbüskar olmamaqda günahlandırırdı. Çox mənfi tendensiyadır. Yaxşı olardı ki, həmin bölgələrdəki hərbi hissələrə rəhbərlik edən komandanlıq hərbçilərin əmək haqqının azaldılmasına etirazlarını bildirəydi. Bununla bağlı yuxarı komandanlıq qarşısında məsələ qaldırmalıydılar. Dövlət başçısının bütün məsələlərə nəzarət edə bilməsi mümkün deyil. Çünki onun işi həddən artıq çoxdur. Prezident qlobal məsələlrlə, xarici siyasətlə məşğul olur. Çox ağır prosesi çiynində aparır. Lazımdır ki, digər kiçik məsələlərlə bağlı aidiyyəti şəxslər ciddi məşğul olsunlar. Belə hallardan biri də sizin dediyiniz məsələdir. Müharibədən sonra yaranmış bu vəziyyət ciddi narazılığa səbəb oldu. Yaxşı ki, bu problem həllini tapdı. Yenə də ölkə başçısının müdaxiləsindən sonra. Niyə belə olmalıdır? Hər bir balaca məsələyə gərək Prezident müdaxilə edə?”
Ekspert bildirdi ki, Azərbaycanda ən yüksək əmək haqqı almağa layiq olan kateqoriyalardan biri də hərbçilərdi: “Onlara verilən əmək haqqının azaldılmasını istəyənlər məsuliyyət hissindən uzaq adamlardır”.
Məhəmmədəli QƏRİBLİ
