Prezidentin şəxsi nüfuzu YAP-ın nüfuzunu qat-qat üstələyir - normaldırmı, çarə varmı...

Məhərrəm Zülfüqarlı: “...elə şəxslər seçilməlidirlər ki, onların nüfuzu olsun və aktiv mövqe ortaya qoya bilsinlər”

img

Son vaxtlar belə iddialar səslənir ki, yaxın vaxtda Yeni Azərbaycan Partiyasında ciddi dəyişikliklər olacaq. İddialara görə, qarşıdakı günlərdə hakim partiyanın qurultayı keçiriləcək.

Məlumata görə, qurultay qərarı hələlik ictimaiyyətdən gizli saxlanılır. İddia olunur ki, qurultayda çox sayda məşhur YAP-çı rəhbər strukturlardan kənarlaşdırılacaq. Onlar yaşlı və gözdən düşmüş, ictimai rəydə neqativ işarə ilə tanınan simalardır. Onların yerinə gənc kadrların  seçiləcəyi ilə bağlı fikirlər var. Hədəf partiyanı fəallaşdırmaq və onun böyük potensialını hərəkətə gətirməkdir.

Bütün bunlarla yanaşı, o da vurğulanır ki, Prezident İlham Əliyevin şəxsi nüfuzu partiyanın ümumi nüfuzunu qat-qat üstələyir. O baxımdan, YAP özünü Prezidentin reytinqinə yaxınlaşdırmaq üçün daha hansı addımları atmalıdır?

  • “O zaman partiyanın reytinqi artacaq”

Məsələyə münasibət bildirən AVCİYA-nın vitse-prezidenti, professor Məhərrəm Zülfüqarlının sözlərinə görə, YAP-ın nüfuzunu qaldırmaq üçün bir sıra işlər görülməlidir: “Əvvəla hakim partiyanın qurultayı keçirilməlidir. Buna ciddi zərurət var. Hakim partiyaya üzv olanları bir neçə qrupa bölmək olar. Birincisi, partiyaya, onun ideologiyasına, dövlətçiliyə sədaqətli insanlar. Belə insanlar üçün sözügedən dəyərlər vacib əhəmiyyət kəsb edir. Ancaq partiyada digər qrup üçün bu deyilənlər önəmli deyil. Belələri vəzifə xatirinə partiyaya daxil olaraq, öz şəxsi mənafeləri üçün siyasi təşkilatdan istifadə edirlər. Çox güman ki, bunu Prezident və digər şəxslər görürlər. Məsələn, 44 günlük Vətən müharibəsi dövründə Prezident İlham Əliyevin reytinqi həddən artıq yüksəldi. Bütün dünyada qalib Prezident kimi çox böyük nüfuz qazandı. Xalqla Prezident arasında yumruq kimi birlik yarandı. Ancaq çox təəssüflər olsun ki, müharibədən sonra Prezidentə yönəlik tənqidi fikirlərə, ədalətsiz hücumlara YAP-çıların çoxu seyrçi mövqedən yanaşdı. Hansı ki, onlar ən azı partiya təəssübkeşliyi nümayiş etdirib ortaya adekvat mövqe qoymalı idilər. Yəni Prezidenti müdafiə etməli idilər. Ancaq biz görürük ki, Prezidenti YAP-çılar yox, əsasən müstəqil ekspertlər, digər partiyaların nümayəndələri müdafiə edirlər. Düzdür, dövlət başçısı hamının Prezidentidir. Ancaq Prezident həm də YAP-ın sədridir. Çox təəssüf ki, sözügedən məsələdə YAP-çıların çoxu gözləmə mövqeyi tutdu. Prezidentə yönəlik hücumlar varsa, birinci növbədə, YAP-çılar buna qarşı mübarizə aparmalıdırlar. Lakin biz bunu görmürük. Bu da müasir dövrün siyasətinə uyğun gəlmir. Belə tendensiya YAP-ın nüfuzunu daha da zəiflədir. O üzdən, partiya mütləq yenilənməlidir. Partiyanın rəhbər strukturlarına elə şəxslər seçilməlidirlər ki, onların nüfuzu olsun və aktiv mövqe ortaya qoya bilsinlər. Tənqidi qəbul edib, haqqı müdafiə etsinlər və s. Partiyada elə şəxslər var ki, xalqın gözündən düşüblər. Bu səbəbdən daha sanballı şəxslər önə çəkilməlidirlər. O zaman partiyanın reytinqi artacaq”.

Bütün bunlardan çıxış edən professor hesab edir ki, partiyada dəyişikliklər zəruridir.

Vidadi ORDAHALLI

Son xəbərlər