Xocalı - tarixdə foto-video sübutları olan yeganə real soyqırım cinayəti...

Qasım Hacıyev: “...onun videosu, fotoçəkilişləri var, eyni zamanda, faciənin şahidləri sağdırlar”

img

29 il bundan əvvəl beynəlxalq aləmin gözü qarşısında baş verən Xocalı soyqırımının dünya tarixində foto-video sübutu olan yeganə genosid aktı olduğu məlumdur. Xocalıya qədər törədilən heç bir soyqırım cinayətinin video-fotokadrları yoxdur.

Erməni faşistləri tərəfindən həyata keçirilən Xocalı soyqırımının bütün dəhşətləri video və fotolarda əks olunub. Bu soyqırımın həm real göstəriciləri var, həm onun şahidləri sağdır, həm də xocalılara qarşı bu genosidi törədənlərin kimliyi məlumdur. Ortada bütün faktlar gerçəkliyin özünü ifadə etdiyi, reallığı aydınlığı ilə göstərdiyi halda, bəs nə üçün dünya birliyi, beynəlxalq təşkilatlar, beynəlxalq hüquq Xocalı hadisəsinə azərbaycanlıların soyqırımı kimi yanaşıb ədalətli qiymət vermək istəmir? Dünyada Xocalı soyqırımı kimi gerçək soyqırımlardan biri Holokost qırğınıdır ki, onu da bütün dünya yəhudilərin genosidi olaraq qəbul edir.

Bəs biz nə etməliyik ki, Xocali soyqırımını birmənalı olaraq dünya birliyinə qəbul etdirək, azərbaycanlılara qarşı soyqırım törədənləri, onların təşkilatçılarını və icraçılarını müttəhim kürsüsündə oturda bilək.

Ekspertlər deyirlər ki, indiyə qədər Xocalı soyqırımının azərbaycanlıların soyqırımı kimi bütün dünya tərəfindən tanınmamasının kökündə bizə qarşı ikili yanaşma dayanır.

  • “Beynəlxalq aləm Xocalı soyqırımına münasibətdə də ədalətli mövqe tuta bilmir, çünki buna da ikili standartlardan yanaşır”

Azərbaycan Milli Elmlər Akademiyasının (AMEA) Qafqazşünaslıq İnstitutunun ermənişünaslıq şöbəsinin müdiri, professor Qasım Hacıyev bizimlə söhbətində bildirdi ki, Xocalı soyqırımını azərbaycanlıların genosidi olaraq dünyanın birmənalı şəkildə qəbul etməsi üçün indiyə qədər ermənilərin beynəlxalq aləmdə formalaşdırdıqları saxta rəyləri dağıtmalıyıq. Q.Hacıyev hesab edir ki, bu 29 ildə ermənilər və onların havadarları Xocalı soyqırımının beynəlxalq aləm tərəfindən qəbul edilməsinin qarşısının alınması üçün çox saxta təbliğat aparıblar. Q.Hacıyevin sözlərinə görə, Xocalı soyqırımının beynəlxalq aləm tərəfindən qəbul edilməsi üçün əlavə faktlara ehtiyac yoxdur, çünki soyqırım bütün dəhşətləri ilə video və foto görüntülərdə öz əksini tapıb. “Olduqca aktual və vacib bir məsələni gündəmə gətirmisiniz. Doğrudan da Xocalı soyqırımı tarixdə baş verən yeganə soyqırımdır ki, videolentə alınıb və onun videosu, fotoçəkilişləri var, eyni zamanda, faciənin şahidləri sağdırlar. Bundan başqa, bu soyqırımın kimlər tərəfindən törədildiyi də təkzibolunmaz sübutlarla ortadadır. Biz həmişə televiziyada, radioda çıxışlarımızda deyirik ki, Xocalı soyqırımı XX əsrin ən dəhşətli soyqırımdır və biz bunu yalnız yerli mətbuatda deyil, dünya mətbuatında səsləndirməliyik. Xocalı soyqırımı sübuta ehtiyacı olmayan bir soyqırım cinayətidir, bütün faktlar göz qabağındadır, bu real mənzərə video və fotolarda əks olunub. Beynəlxalq aləm Xocalı soyqırımına münasibətdə də ədalətli mövqe tuta bilmir, çünki buna da ikili standartlardan yanaşır.

Amma elə ölkələr, xalqlar var ki, onlar erməninin xislətini bilir, onların başqa xalqlara qarşı soyqırım törətdikləri haqda dərin məlumatı var, bunlar Xocalı soyqırımını azərbaycanlıların soyqırımı kimi qəbul edirlər. Bilirsiniz ki, erməni lobbisi həddindən artıq həyasızdır və onlar indiyə qədər xaricdə bizim əleyhimizə şər-böhtan kampaniyası aparıblar. Hətta dünyaya Xocalı soyqırımı barədə yalan, saxta məlumat da verirlər, yalançılıq ermənilərin siyasətidir. Onlar saxtakarlıq etməyi bacarırlar. Amma dünyada heç kəs Xocalı soyqırımını, erməni faşistləri tərəfindən günahsız körpələrin, uşaqların, qadın və qocaların, mülkü şəxslərin genosidə məruz qaldığını inkar edə bilməz. Amma ermənilərin apardıqları saxtakarlıq kampaniyası, Azərbaycana şər atması bu kimi məsələlərdə maneçilik törədir. Hətta ermənilər bizə şər atmaqdan, bu soyqırımı “özümüzün törətdiyini” iddia etməkdən də çəkinmirlər. Biz xaricdə çıxan kitablardan, məqalələrdən bütün bunları oxuyuruq və kimlərin bizə böhtan atdığını bilirik. Bəzən öz içimizdən erməni dəyirmanına su tökənlər olub.

Hesab edirəm ki, düşmənin saxta təbliğatının qarşısı birdəfəlik alınmalıdır. Biz heç nəyə baxmayaraq, Xocalı soyqırımının dünyada XX əsrin ən dəhşətli soyqırımlarından biri kimi tanıdılması istiqamətində daha çox iş görməliyik. Bütün imkanlarımızdan istifadə edərək Xocalı soyqırımını real şəkildə özündə əks etdirən bütün video və fotomaterailları dünya mediasında daha çox yaymalıyıq. Çünki həqiqətin bir üzü var, onu görməzdən gələnlər olsa da, inkar edənlər ola bilməz. Əlimizdə bu qədər fakt ola-ola biz beynəlxalq birliyi öz gerçək soyqırımımıza inandıra bilməmişik, çünki bu cinayəti törədən düşmənlərimiz və onların havadarları dünyanı aldatmağa nail olublar. Biz isə artıq bu yalanları öz həqiqətlərimizlə məhv etmək istiqamətində irəliləməliyik, geriyə yol yoxdur. Yolumuz həqiqətimizi, birmənalı olaraq, dünyaya qəbul etdirməkdir ki, buna da nail olacağıq” - deyə

Q.Hacıyev qeyd etdi.

İradə SARIYEVA

Son xəbərlər