Yayılan məlumata görə, Ermənistanın baş naziri Nikol Paşinyan bütün ermənilərdən üzr istəyib: “Son 10 ayda hökumətimiz hər cür səhv etdi. Və Ermənistandakı, Qarabağdakı, diaspordakı bütün ermənilərdən üzr istəmək istəyirəm. Səhvlərimə görə məni bağışlayın”.
Pasinyanın bu üzr istəməsi Ermənistanda onun növbəti mərhələlərdə siyasi perspektivinə necə təsir edə bilər?
Bəzi ekspertlər hesab edirlər ki, qarşıdan seçki prosesi gəlir və belə bir vaxtda Paşinyanın bu addımı ölkəsində ona xalqın münasibətini daha da müsbətə doğru dəyişə bilər. Ekspertlərın fikrincə, Paşinyan üzr istəməklə indiyə qədər etdikləri səhvlərə görə xalqdan üzr istəməyən rəqiblərini özündən bir addım arxada qoyub.
Rasim Quliyev: “...buna ehtiyac duyan təbəqəsini öz ətrafında toplamaq üçün belə geniş səviyyədə üzr istədi”
“Resurs” Analitik İnformasiya Mərkəzinin rəhbəri, politoloq Rasim Quliyev “Bakı-Xəbər”ə bildirdi ki, peşəkar siyasətlə məşğul olan bir şəxsin belə geniş miqyasda üzr istəməsi hər halda yolverilməzdir.
“Biz əvvəlcədən demişdik ki, Ermənistanın müharibədəki məğlubiyyəti həm iqtisadi, həm siyasi, həm də hərbi böhrana çevriləcək, siyasi böhran isə dərinləşib hakimiyyət böhranı yaradacaq və bu, vətəndaş müharibəsinə qədər gedib çıxa bilər. Ermənistanda hazırkı qarşıdurma şəraiti ilə bağlı proqnozlar əvvəlcədən verilmişdi. Ermənistan vətəndaş müharibəsinin bir addımlığındadır. Hesab edirəm ki, Paşinyan öz xoşuna hakimiyyəti verməyəcək. Çünki Sarkisyanla mübarizə aparıb küçə qələbəsini hüquqi qələbəyə çevirə bildi. Ancaq hazırda Paşinyan artıq o metodla hakimiyyətdən getməyəcək, yeganə yolu odur ki, hərbi çevriliş nəticəsində devrilsin, amma indiki şəraitdə bu da proqnozlaşdırılmır. Dünyanın bir çox ölkəsi buna münasibət bildirdilər ki, hərbi çevriliş perspektivləri Ermənistanın təcrid olunmasına gətirib çıxara bilər və nəzərə alsaq ki, müharibədən yenicə çıxmış və uduzmuş bir vəziyyətdə hərbi çevriliş Ermənistanın sosial-iqtisadi vəziyyətini həll edə bilməyəcək. Təcrid isə Ermənistanı məhvə aparan bir yolun başlanğıcı ola bilər”.
R.Quliyevin sözlərinə görə, bu səbəbdən də hərbi çevrilişdən də ehtiyat edirlər. Rusiyanın Ermənistanı əldən buraxmaq istəmədiyini deyən R.Quliyev hesab edir ki, son variant kimi ya hərbi çevriliş, ya da Paşinyana qarşı sui-qəsd ola bilər. “Ancaq normal məntiqlə, normal gedişlə o, Ermənistana heç nə vəd etmir. Bu səbəbdən də Paşinyan siyasi müxalifətin ona qarşı etdiyi təzyiqlərin, müqavimətin qarşısına həm əlində olan hakimiyyət rıçaqları, inzibati qaydalarla və hüquqi metodlarla sərt müqavimət qoydu, dedi ki, mən heç də hakimiyyəti qoyub getmək fikrində deyiləm. İkinci tərəfdən də etirazçılara, revanşistlərə, küçə müxalifətinin qarşısına da öz elektoratını çıxardı. Paşinyanın bu şəkildə üzr istəməyinin səbəbi yalnız və yalnız xalq arasında səmimi obrazını, səmimi imicini daha da möhkəmlətmək idi. Paşinyan Ermənistanın sosial-iqtidadi vəziyyətinin inkişaf etməsində maraqlı olan və buna ehtiyac duyan təbəqəsini öz ətrafında toplamaq üçün belə geniş səviyyədə üzr istədi. Sözsüz ki, o, etdiyi səhvləri də izah edərkən müqayisə edəcək ki, mənim səhvlərim zərurətdən yaranan səhvlər idi. Paşinyan özünə qədərki hakimiyyətin səhvlərini izah edərkən Köçəryan və Sarkisyanın etdiyi səhvlərin qurbanına çevrildiyini deyəcək. Onun üzr istəməsinin alt mənaları təxminən bu istiqamətdədir” - deyə R.Quliyev qeyd etdi.
Məhərrəm Zülfüqarlı: “Həm üzr istəməyinə, həm də hazırda onu hakimiyyətdə əvəz edəcək bir şəxsin olmamasına...”
AVCİYA-nın vitse-prezidenti, politoloq Məhərrəm Zülfüqarlı “Bakı-Xəbər”ə şərhində qeyd etdi ki, Paşinyanın üzr istəməsi müəyyən qədər onun hakimiyyətinin ömrünün uzanmasına gətirib çıxaracaq. “Paşinyanın bəxti onda gətirib ki, erməni xalqı Ermənistan müxalifətinə inanmır. Eyni zamanda, Paşinyana da inananların, onu müdafiə edənlərin sayı həddindən artıq azalıb. Paşinyanın gələcək siyasi perspektivi haqda elə də müsbət fikirlər söyləmək olmaz, bilirsiniz ki, xalq ona inanmır. Ona görə də indiki dövrdə bu, Ermənistana nə vəd edir? Paşinyan geci-tezi hakimiyyətdən gedəcək, amma, sadəcə olaraq, onu əvəzləyəcək şəxsin kimliyi məsələsi Ermənistan əhalisini də düşündürür, ona kənardan dəstək verənləri də düşündürür. Çünki ortada şəxsiyyət yoxdur. Paşinyandan əvvəlkilər də cinayətkardır, o özü də xalqa vəd verməklə cinayətlərin başında durdu. Ermənistanı xilas edəcək, sülhü bərqərar edəcək şəxsin olmaması xalqı çox düşündürür. Erməni xalqının beynini zərərli, düşmənçilik ideologiyası ilə o qədər zəhərləyiblər ki, onlar çıxış yolu tapa bilmirlər. Ona görə də beş-on nəfər bir yerə yığışır. Ermənistan hakimiyyətinin apardığı siyasət artıq Ermənistanı iflas edib.
Paşinyanın xalqdan üzr istəməsi onun hakimiyyətinin ömrünün müəyyən qədər uzanmasına təsir edə bilər. Düzdür, o, üzr istədi, etiraf etdi, amma xalqı nahaq qırğına verən adam üzr istəməklə bağışlanmır. Sadəcə olaraq, Paşinyan özündən əvvəlkilərdən fəqrli olaraq, yol verdiyi səhvləri etiraf edib, özündə güc tapıb üzr istəyib. Ona görə də, ola bilsin, erməni xalqı bu üzürə görə ona müəyyən qədər güzəşt etsin. Həm üzr istəməyinə, həm də hazırda onu hakimiyyətdə əvəz edəcək bir şəxsin olmamasına görə xalq hələ onu hakimiyyətdə saxlayacaq. Ola bilsin bir aya, beş aya, ola bilsin payıza qədər” - deyə M.Zülfüqarlı vurğuladı
İradə SARIYEVA
