“Mən tam əminəm ki, Qarabağın bu gün sülhməramlı missiyasının nəzarətində olan torpaqlara da azərbaycanlılar qayıtmalıdırlar, qayıdacaqlar”. Bunu Prezident İlham Əliyev yerli və xarici jurnalistlər üçün videoformatda keçirdiyi mətbuat konfransında deyib.
Prezident bildirib ki, bu qələbədə Azərbaycanda yaşayan hər bir xalqın öz qiymətli və dəyərli payı var: “O ki, qaldı gələcəkdə ermənilərlə birgə yaşamağımıza, mən bir daha demək istəyirəm ki, müxtəlif ölkələrdə bu baş verir, o cümlədən, Azərbaycanda. Bu yaxınlarda mənə verilən məlumata görə, hətta bizim jurnalistlər Azərbaycanda yaşayan keçmiş Ermənistan müdafiə nazirinin bacısını da tapmışdılar. Baxın, Ermənistan müdafiə naziri 90-cı illərdə olub, hansı ki, azərbaycanlılara qarşı soyqırımın törədilməsində iştirak edib, onun doğmaca bacısı Azərbaycanda yaşayır. Ona bir söz deyən var? Yox. Bax, Azərbaycan xalqının əxlaqı budur, mənəvi durumu budur. Biz bundan sonra da buna hazırıq. Mən tam əminəm ki, Qarabağın bu gün sülhməramlı missiyasının nəzarətində olan torpaqlara da azərbaycanlılar qayıtmalıdırlar, qayıdacaqlar. Noyabrın 10-da imzalanmış bəyanatda bu göstərilir. Bəli, bu bir qədər zaman tələb edəcək, birgə səylər tələb edəcək. Amma bu, qaçılmazdır. O cümlədən, biz Xocalıya da qayıdacağıq, başqa yolu yoxdur. Ermənistan tərəfi də bunu anlamalıdır. Süni əngəllər yaratmaq istəsə, ancaq özünə zərbə vurmuş olar”.
Görünən odur ki, Azərbaycan bütün ərazilərin qaytarılmasında qərarlıdır. Bütün bunlarla ynaşı, sülhməramlıların nəzarətində olan ərazilərin qaytarılma mexanizmi necə təsəvvür olunur?
“BMT-nin köçkünlər üzrə komitəsinin mandatı altında azərbaycanlı köçkünlər bu ərazilərə qayıdacaqlar”
Sözügedən məsələni “Bakı-Xəbər”ə şərh edən politoloq Məhəmməd Əsədullazadə bununla bağlı bir sıra məqamlara aydınlıq gətirdi: “10 noyabr bəyannaməsinə uyğun olaraq, azərbaycanlı məcburi köçkünlərin Rusiya sülhməramlı qüvvələrinin məsuliyyət zonasında olan ərazilərə köçürülməsi təsbit edilib. Ancaq biz görürük ki, Rusiya sülhməramlı qüvvələri bunda o qədər də maraqlı deyil və anlaşmanın bəndələrinin yerinə yetirilməsi istiqamətində addımları yubadır. Əksinə, ermənilərin köçürülməsini həyata keçirir. Ona görə də bu, ilk növbədə, bəyannamənin bəndələrinə ziddir və düşünürəm ki, Prezident İlham Əliyevin mövqeyi Moskvaya mesajdır. Göründüyü kimi, Prezident də bu məsələdə mövqeyini ortaya qoyub. Demək, azərbaycanlı köçkünlərin bu ərazilərə qayıdışı mütləq olacaq. İlk növbədə, sülhməramlı qüvvələrin məsuliyyət zonasından silahlı erməni birləşmələri çıxarılmalıdır. Çünki onlar çıxarılmasa, bu proses təhlükəlidir. Düşünürəm ki, Azərbaycan bu istiqamətdə çalışır. BMT-nin köçkünlər üzrə komitəsinin mandatı altında azərbaycanlı köçkünlər bu ərazilərə qayıdacaqlar. Rusiya tərəfi burada vasitəçidir və mandatı neytral qalmaqdır. İlk növbədə, burada iki icma arasında sülh və təhlükəsizlik təmin edilməlidir. Ona görə də bu məsələ gündəmdədir və erməni silahlı birləşmələri çıxarıldıqdan sonra azərbaycanlıların bu ərazilərə köçürülməsi baş verəcək”.
Politoloq onu da qeyd etdi ki, bu yöndə səylərimizi artırmalıyıq.
Vidadi ORDAHALLI
