Müşfiq Ələsgərli: “Azərbaycan Prezidenti dünyanın ən informasiyalı adamlarından biri olduğundan, onunla söhbət, proseslərə aydınlıq gətirilməsi beynəlxalq media üçün olduqca əhəmiyyətlidir”
Məlum olduğu kimi, fevralın 26-da Prezident İlham Əliyev yerli və xarici media nümayəndələri üçün mətbuat konfransı keçirdi. Xocalı soyqırımının 29-cu ildönümü ilə bağlı Azərbaycanda keçirilən tədbirləri işıqlandırmaq üçün ölkəmizdə olan 30-dan çox xarici KİV nümayəndəsinin iştirak etdiyi mətbuat konfransı 4 saatdan çox davam etdi.
Bu müddət ərzində dövlət başçısına 50-yə yaxın sual ünvanlandı. Azərbaycan Prezidenti mətbuat konfransında natiqlik məharətini nümayiş etdirərək bütün suallara səlis, əsaslı arqumentlərlə, məntiqli cavablar verdi, güclü liderlərə, böyük dövlət xadimlərinə xas peşəkar xüsusiyyətləri ilə xarici media nümayəndələrini bir daha heyrətləndirdi.
Təbii ki, mətbuat konfransına nüfuzlu media qurumlarının nümayəndələrinin bu cür marağı da səbəbsiz deyil. Son 17 ildə Azərbaycanın keçdiyi böyük inkişaf yolu, həyata keçirilən irimiqyaslı, qlobal əhəmiyyətli layihələr, regional və beynəlxalq platformalarda əldə edilən nailiyyətlər, Vətən müharibəsində qazanılan Qələbə... Bütün bunlar birmənalı olaraq Azərbaycana, onun liderinə olan böyük hörmət və rəğbəti şərtləndirən əsas amillərdir.
Pandemiya səbəbindən onlayn formatda keçirilən mətbuat konfransının Azərbaycan tarixinin ən ağrılı səhifələrindən biri olan Xocalı soyqırımının ildönümü günündə təşkil olunması, ilk növbədə, faciə ilə bağlı məlumatların dünya ictimaiyyətinə çatdırılması və Ermənistanın xalqımıza qarşı soyqırımı siyasətinin ifşası baxımından mühüm əhəmiyyət kəsb etdi. Digər tərəfdən, bu tədbir İkinci Qarabağ müharibəsindən sonra regionda yaranmış yeni reallıqların müxtəlif media platformaları vasitəsilə dünya ictimaiyyətinə çatdırılması üçün əlverişli imkan kimi qiymətləndirilə bilər.
İnformasiya platformalarının imkanlarından səmərəli istifadə olunması çox böyük önəm kəsb edib. Təcrübə göstərir ki, bu sahədə ləngimə olarsa, o zaman qarşı tərəf bu boşluqdan faydalanaraq saxta informasiyaları dünya ictimaiyyətinə “həqiqət” kimi təqdim edəcək.
İkinci Qarabağ müharibəsi dövründə Azərbaycan informasiya müharibəsində də qələbə qazanmağı bacardı. Vətən müharibəsi dövründə informasiya siyasətinə birbaşa rəhbərlik edən Prezident İlham Əliyev dünyanın 30-dan çox nüfuzlu media qurumuna müsahibələr verdi. Beləliklə, döyüş meydanı ilə yanaşı, informasiya cəbhəsində də düşmənin bütün təxribatlarının qarşısı alındı, onun yalanları ifşa olundu. Məhz Prezident İlham Əliyevin qətiyyətli, əsaslı arqumentlərə söykənən çıxışları sayəsində bütün dünya Azərbaycan xalqının ədalət uğrunda mübarizə apardığının şahidi oldu.
Görünən budur ki, İlham Əliyevin keçirdiyi mətbuat konfransına olan beynəlxalq jurnalistikanın marağı heç də müharibə dönəmindən az deyildi, hətta bir çox hallarda onları üstələyib. Bu marağın kökündə duran amillər nələrdi?
Media eksperti Müşfiq Ələsgərli “Bakı-Xəbər”ə açıqlamasında bildirdi ki, dünyada hazırda aktiv siyasi proseslər cərəyan edir: “Azərbaycanın yerləşdiyi regionda da qütbləşmə və qarşıdurmalara gedilir. Bu siyasi düzəndə hər kəs özünün yerini, təsir dairəsini müəyyən etməyə çalışır. Cənubi Qafqaz dünyanın maraq dairəsində olan regionlardandır. Məsələ budur ki, bu regionda da əsas söz sahibi olan ölkə məhz Azərbaycandır. Bütün qlobal proseslərin içərisində Azərbaycan bölgədəki proseslərə yön verə bilmək gücündədir. Bizə hər zaman maraq böyük olub. Eyni zamanda bizim Ermənistan tərəfdən işğal edilmiş ərazilərimiz vardı. Son vaxtlar Azərbaycanın Ermənistanı hərb müstəvisində məhv etməsi, bizə olan maraqla yanaşı, hörmətimizi də artırıb. Dünyanın siyasi mərkəzləri qəti olaraq bu qənaətə gəliblər ki, Azərbaycanın iştirakı, marağı olmadan regionda hər-hansı bir addımın atılması mümkün deyil. Prezidentin çıxışında da var ki, Azərbaycan həm də verdiyi bütün sözləri yerinə yetirən ölkədir”.
Ekspertin sözlərinə görə, Prezidentin keçirdiyi son mətbuat konfransı bir tərəfdən bizim Qarabağdakı gələcək planlarımızın öyrəniləməsinə həsr edilmişdirsə, digər tərəfdən regonda cərəyan edən proseslərə Azərbaycanın marağının öyrənilməsinə həsr olunmuşdu: “Suallara diqqət etsəniz görərsiniz ki, region və dünyada gedən proseslərlə bağlı ölkə başçısına suallar ünvanlandı. Bunu təbii qarşılamaq lazımdır. Azərbaycan Prezidenti dünyanın ən informasiyalı adamlarından biri olduğundan, onunla söhbət, proseslərə aydınlıq gətirilməsi beynəlxalq media üçün olduqca əhəmiyyətlidir”.
Məhəmmədəli QƏRİBLİ
