Lamiyə İsazadə: “Tarazlığa və praqmatizmə əsaslanan uğurlu xarici siyasət”

img

Hər bir suveren dövlət beynəlxalq münasibətlərin subyekti kimi, özünün xarici siyasətini həyata keçirir.

İham Əliyevin rəhbərliyi ilə həyata keçirilən beynəlxalq aləmlə bərabərhüquqlu və qarşılıqlı faydalı əməkdaşlığa, tarazlığa və praqmatizmə əsaslanan uğurlu xarici siyasətin nəticəsinə Prezidentin 26 fevral tarixli yerli və xarici mətbuata açıqlamalarını daxil etmək olar. Dövlət başçısının mətbuat konfransındakı 4 saatdan artıq 4 dildə 35-dən çox dünya mediasının 50-yə yaxın suallarını cavablandırması xarici jurnalistləri təəccübləndirməklə yanaşı, bir daha sübut etdi ki, bu dövlətin beynəlxalq aləmdəki yüksək nüfuzu və bugünkü Zəfəri birbaşa İlham Əliyevin adı ilə bağlıdır. Dövlət başçımız ölkəyə rəhbərlik etdiyi müddətdə intellektə böyük yer verməklə modern cəmiyyətlərin nəbzini tutduğunu bütün dünyaya hər zaman nümayiş etdirdi. Azərbaycanın qısa zaman ərzində nail olduğu bugünkü inkişafı və gələcəyə doğru hesablanmış hədəfləri, ələlxüsus da 44 günlük müharibədə qazandığı Zəfəri beynəlxalq miqyasda maraq doğuran hadisə kimi qiymətləndirilir. Azərbaycanın bugünkü reallıqlarına nəzər salaraq görmək olar ki, ölkəmiz sözün əsl mənasında müstəqil dövlət kimi dünya xəritəsində öz yerini tuta bilib. Bütün regional məsələlərdə fəal iştirak edən Azərbaycan, regional sabitlik və inkişaf amilinə çevrilib. İlham Əliyevin beynəlxalq aləmdə artan nüfuzu həm ölkəmizi gücləndirir, həm də regionda gedən proseslərə çox müsbət təsir göstərməkdədir. Azərbaycanın beynəlxalq münasibətlər sistemində rolunun artmasına böyük təsir göstərməklə yanaşı, ölkə başçımızın beynəlxalq aləmdə şəxsi nüfuzunun günbəgün artması cənab Prezidentin regionda mübaliğəsiz lider olduğunu isbat edib və onu dünya siyasətində bütün siyasi qütblərin hesablaşdığı və rəğbət bəslədiyi fenomen siyasi liderə çevirib. Məhz bunun nəticəsidir ki, xarici mətbuat nümayəndələri tez-tez ölkəmizə səfər edir, dövlət başçımızdan müsahibə götürmək arzusundadırlar. Bu da onu deməyə əsas verir ki, Azərbaycan Prezidentinin söylədiyi hər kəlmə beynəlxalq aləmdə maraq doğurur, ciddiyyətlə qarşılanır. Uğurlarımızın təməlində düşünülmüş siyasət, konkret proqramlar, möhkəm iradə və Azərbaycanın suverenliyi, müstəqilliyi dayanır.
Son otuz ildə ölkəmizin işğal məsələsi ilə məşğul olan beynəlxalq qurumlar, bəzi ölkələr dövlətimizə açıq şəkildə, bəzən də qeyri-rəsmi mesajlar göndərirdilər ki, bu işğalı qəbul edib, ərazi bütövlüyünüzün bərpasından imtina edin. Çünki Azərbaycan birinci Qarabağ müharibəsində məğlub edilmiş tərəf idi və bəzi ölkələr bu məğlubiyyətin əbədi olacağına inanırdılar. Lakin Azərbaycan dövlət başçısı öz prinsipial mövqeyindən  geri çəkilməyərək,  hər zaman beynəlxalq tribunalardan  Qarabağın Azərbaycan ərazisi olduğunu çəkinmədən səsləndirirdi. Cənab Prezident onu da qeyd edirdi ki, sülh danışıqlarının səmərə verməyəcəyi təqdirdə, Azərbaycan öz ərazi bütövlüyünü hərbi yolla bərpa edəcəkdir. Bu bəyanatların arxasında kifayət qədər böyük bir ciddiyyət dayanırdı. Ancaq Ermənistan bu ciddiyyəti anlamayacaq dərəcədə axmaq idi. İndi isə Azərbaycanın qarşısında acı məğlubiyyətlə üzləşən Ermənistanda aylardır başlayan və bugünə qədər davam edən xaos vəziyyəti, son yaşanan qarşıdurma onu göstərir ki, Ermənistanda bu dövləti idarə edə bilən ağlı başında, öz səlis mövqeyi olan bir siyasətçi belə yoxdur. Hal-hazırda  Ermənistan cəmiyyəti kifayət qədər ciddi problemlərlə üz-üzədir. Ölkədə yaranmış vəziyyət isə Ermənistanın bütövlükdə ciddi siyasi böhrana yuvarlandığından xəbər verir. Bu böhran ölkənin iqtisadiyyatını sürətlə məhvə doğru aparır, bu da əhalinin sosial vəziyyətinin indikindən də acınacaqlı hala gətirib çıxaracağını göstərir. Paşinyan hakimiyyətə gələn ərəfədə vəd etdiyi hər hansı islahatı və ya işi məntiqi sonluğa çatdıra bilmədiyi üçün bu gün Ermənistanda bütün dövlət  idarəetmə sistemi xaosa sürüklənməkdədir. Küçə həyatından hakimiyyətə gəlməyin sonu gec-tez bu cür qarşıdurmalarla nəticələnəcəkdi. İllər boyu yaltaqlıqla da olsa, olmayan əxlaqi-mənəvi dəyərlərini güclü ölkələrə satmaqla ayaqda dayanan bu “dövlət”, bu gün dövlət kimi mövcudluğunu davam etdirməkdə çətinlik çəkir. Vaxtında Azərbaycanın təklifləri ilə razılaşsaydılar bu gün Ermənistanda rifah, sabitlik, sakitlik hökm sürərdi. İndi isə Ermənistanın bir seçimi var, 10 noyabr Bəyanatının müddəalarını icra edərək, Azərbaycanın şərtlərinə əməl etmək. Azərbaycanın məqsədi bölgədə davamlı, dayanıqlı sülh və təhlükəsizlik yaratmaqdır. Cənab Prezidentin də qeyd etdiyi kimi, “Bizim hədəfimiz sülhdür. Müharibə bizə lazım deyildi. Bu, məcburi tədbir idi. Bu tədbir bütün otuz illik səmərəsiz danışıqlardan daha effektli oldu. Biz özümüzə məxsus olanı qaytarmışıq və nümayiş etdirmişik ki, bizim sözümüz və əməlimiz eyni dəyərə malikdir. Əgər bu sülh baş tutsa, burada Ermənistan da mənfəət əldə edəcək, onlar sülhün xeyrini görəcəklər. Əks təqdirdə Ermənistan siyasi dairələri anlamalıdır ki, hər hansı bir revanş və ya qisas cəhdləri Azərbaycan tərəfindən ciddi şəkildə cəzalandırılacaqdır. Dövlət başçısı mətbuat konfransında 30 ildir Azərbaycana edilən haqsızlıqlardan danışarkən onu da qeyd etdi ki, Sovetlər Birliyi dağılandan sonra Amerika Konqresi azadlığa dəstək aktı qəbul etmişdi. Həmin aktın 907-ci düzəlişi bizə sanksiyalar tətbiq edib və bugünə qədər həmin sanksiya qüvvədədir. Bu qədər ədalətsizlik ola bilərmi? Sadəcə olaraq, 30 il bundan əvvəl hakimiyyətdə olanlar buna qarşı heç bir addım ata bilmədilər. Uzun illər lazım oldu ki, biz dünyanın fikrini dəyişdirə bilək, həqiqətləri təqdim edə bilək. Açıq-aydın olan həqiqətləri təsdiq etmək üçün, onları sübut etmək üçün biz nə qədər səy göstərməli olduq.  Haqlı olduğumuzu döyüşərək sübut etməyə çalışırdıq və buna nail olduq”. Azərbaycan bütün bu çətin sınaqlardan şərəflə çıxa bildi. Bu gün müstəqil Azərbaycan sürətlə inkişaf etməkdədir. Hazırda Azərbaycan regionda və dünyada öz mövqelərini sürətlə möhkəmləndirən bir ölkədir. Uğurlarımızın təməlində əlbəttə ki, ciddi islahatlar dayanır.  Son illər müxtəlif sahələrdə ciddi uğurlara imza atmış Azərbaycan dünyanın ən islahatçı ölkəsi kimi tanınır və bu reallığımız bir sıra beynəlxalq təşkilatların hesabatlarında öz əksini tapır. Bütün bunlar bir daha təsdiqləyir ki, dövlət başçımızın rəhbərliyi altında həyata keçirilən hərtərəfli islahatlar konkret nəticələrə hesablanmışdır və yürüdülən siyasət Azərbaycan vətəndaşının rihafının daha da yaxşılaşdırılmasına yönəlmişdir. 
Lamiyə İsazadə,
“Kimsəsiz Uşaqların Sosial Müdafiəsi” İB-nin sədri

Son xəbərlər