“Biz işğaldan azad olunmuş ərazilərin təhlükəsizliyini bu gün kifayət qədər təmin edirik, müntəzəm reydlər keçiririk, pilotsuz uçuş aparatları vasitəsilə və vizual şəkildə monitorinq aparırıq. Buna görə vəziyyət tam nəzarət altındadır. Bundan əlavə, əlbəttə, ərazilərin minalanması əsas çətinlikdir.
Ona görə ki, erməni tərəfi minalanmış sahələrin xəritələrini bizə təqdim etməyib. Yeri gəlmişkən, bu da cinayət hesab edilə bilər. Ona görə ki, hərbi əməliyyatlar başa çatandan sonra bizdə həm hərbi qulluqçular, həm də mülki şəxslər arasında bir neçə hadisə olub, bu insanlar yalnız ona görə həlak olub ki, minalanmış sahələrin xəritələri bizə təqdim edilməyib”. Bunu Prezident İlham Əliyev yerli və xarici media nümayəndələri üçün keçirdiyi mətbuat konfransında bildirib.
“Bu gün bizdə mövcud olan resurslarla ərazilərin minalardan tezliklə təmizlənməsi mümkün deyil. Yəni, əlbəttə, burada erməni tərəfin qeyri-səmimi davranmasını bir daha yəqin edirik. Onlar sözdə bir cür danışır, əməldə isə başqa cür hərəkət edirlər. Biz onların hərbi əsirlərini, həlak olanların cəsədlərini verdik. Müharibədən sonra işğaldan azad olunmuş ərazilərdə erməni tərəfin nümayəndələri, sülhməramlı missiya və bizim nümayəndələr birlikdə mindən çox həlak olmuş erməni hərbi qulluqçusunun cəsədlərini tapdılar və erməni tərəfə verdilər”, - deyə dövlət başçısı əlavə edib.
Prezident deyib ki, biz özümüzü əxlaq normalarına və ümumbəşəri davranış normalarına müvafiq şəkildə aparırıq: “Lakin minalanmış sahələrin xəritələrini bizə verməmək dinc vətəndaşları və hərbi qulluqçuları bilərəkdən ölümə və şikəstliyə məhkum etmək deməkdir. Hansı əməkdaşlıqdan söhbət gedə bilər? Belə olan təqdirdə birtərəfli əməkdaşlıq ola bilməz”.
Ermənistanın minalanmış ərazilərin xəritəsini Azərbaycana təqdim etməməsi bütün aidiyyəti beynəlxalq konvensiyalara ziddir və bu, böyük bir müharibə cinayətidir.
Minalanmış ərazilərin xəritəsinin Azərbaycana verilməsi istiqamətində beynəlxalq təşkilatların, xüsusilə də, birinci növbədə, ATƏT-in Minsk Qrupunun həmsədr ölkələri olan Rusiyadan, ABŞ-dan və Fransadan Ermənistana hər hansı bir təzyiq nişanəsi, əlaməti görsənirmi?
Ekspertlər deyirlər ki, müharibə başa çatdıqdan sonra, ilk növbədə, Ermənistan özü beynəlxalq konvensiyaların tələblərinə uyğun olaraq, bu xəritəni Azərbaycana verməli idi, amma məğlub ölkə hələ də bu addımı atmayıb. Ekspertlərin qeyd etdiyinə görə, bu tələbi Ermənistan qarşısında həmsədr ölkələr və beynəlxalq təşkilatlar qoymalı idilər, lakin onların hələ də bu məsələ ilə bağlı səslərinin eşidilməməsi, Ermənistana hər hansı bir təzyiq göstərməməsi bu təşkilatların da Ermənistanın cinayətlərinə şərik olduqlarını göstərir.
“Həm müxtəlif dövlətlərin, həm də beynəlxalq təşkilatların regiona gələn missiyalarının qarşısında ciddi şəkildə məsələ qaldırılmalıdır ki...”
Qarabağ Azadlıq Təşkilatının (QAT) sədri Akif Nağı baki-xeber.com-a bildirdi ki, Ermənistanın bu cinayətindən zərər çəkənlər var, bunlar həm hərbi qulluqçular, həm də mülkü şəxslərdir. “Bu, Azərbaycanı çox narahat edən bir məsələdir. Azərbaycan tərəfdən Ermənistan tərəfə dəfələrlə minalanmış ərazilərin xəritəsinin təqdim edilməsi ilə bağlı müraciətlər edilib. Beynəlxalq hüquq normalarına görə, Ermənistan o xəritəni Azərbaycana təcili şəkildə verməlidir. Bu, dünyada qəbul olunmuş normadır və beynəlxalq konvensiyalarda da öz əksini tapıb. Amma Ermənistan indi və torpaqlarımızı işğal altında saxladığı 30 ildə heç bir beynəlxalq hüquq normasına əməl etməyib. Sanki belə bir təsəvvür yaranır ki, bu beynəlxalq hüquq normaları Ermənistana aid deyil. Çox təəssüflər olsun ki, ayrı-ayrı beynəlxalq təşkilatlar da, dövlətlər də buna göz yumurlar. Açıq görsənir ki, bu təşkilatlar tərəfindən Ermənistana fərqli yanaşma var. Düşünürük ki, Azərbaycan dövləti davamlı şəkildə, dayanmadan tələblərini irəli sürməlidir. Bilirsiniz ki, baş nazirlərin müavinləri səviyyəsində danışıqlar gedir və yenə də görüş gözlənir. Bunlar deyirlər ki, Minsk Qrupu həmsədrlərinin fəaliyyəti bərpa olunsun. O müstəvidə də Azərbaycan bu məsələni sərt şəkildə qoymalı və əsas müzakirə mövzusuna çevirməyi bacarmalıdır. Görürsünüz ki, ermənilər 62 terrorçunun məsələsini “hərbi əsir” kimi gündəmdə saxlayırlar. Hətta beynəlxalq təşkilatların da bununla bağlı mövqeyini alıb ictimailəşdirirlər”.
A.Nağının sözlərinə görə, Azərbaycan beynəlxalq təşkilatlar qarşısında Ermənistanın minalanmış ərazilərimizin xəritəsini verməməsi məsələsini qaldırmalı və bu qurumları davamlı olaraq Ermənistana təzyiq göstərməyə çağırmalıdır. “Minalanmış ərazilərin xəritəsinin hələ də Ermənistan tərəfindən təqdim olunmaması barədə beynəlxalq təşkilatlara daha israrla, daha təkidlə müraciət edilməlidir ki, onlar Ermənistana “xəritəni ver” desinlər. Azərbaycan bu barədə beynəlxalq təşkilatlara müraciət edir, lakin bizə həmişə ikili standartlarla yanaşan təşkilatlar bunu görməzdən gəlirlər. Ona görə də bu müraciətlər daha böyük tələb və təkidlə edilməlidir. Həm müxtəlif dövlətlərin, həm də beynəlxalq təşkilatların regiona gələn missiyalarının qarşısında ciddi şəkildə məsələ qaldırılmalıdır ki, Ermənistanın minalanmış ərazilərin xəritəsini Azərbaycana təqdim etməsi məsələsini həll etsinlər. Çünki ən vacib məsələ hazırda budur. Azərbaycan məsələni bu şəkildə qoymalıdır. Yoxsa, biz gözləsək ki, beynəlxalq təşkilatlar, yaxud ATƏT-in Minsk Qrupunun həmsədrləri bu istiqamətdə Ermənistana təzyiq göstəcəklər, bu gec olacaq. Bəlkə də onlar bunu heç zaman etməyəcəklər. Çünki indiyə qədər ATƏT-in həmsədr ölkələri və digər beynəlxalq təşkilatlar tərəfindən Ermənistanın bu davranışına hər hansı bir münasibət bildirilməyib. Ona görə də özümüz tərəfindən bu məsələ ciddi şəkildə qoyulmalı və davam etdirilməlidir. Yəni danışıqların hansısa formatının davam etdirilməsi, hansısa məsələnin razılaşdırılması üçün minaların xəritəsinin verilməsini Azərbaycan şərt olaraq ortaya qoymalıdır” - deyə A.Nağı qeyd etdi.
İradə SARIYEVA
