Prezident İlham Əliyev yerli və xarici jurnalistlər üçün videoformatda keçirdiyi mətbuat konfransında Vətən müharibəsi dövründə, Ermənistanın da iddia etdiyi kimi, bu ölkəyə məxsus qırıcı təyyarənin vurulması ilə bağlı xəbərlərə də toxunub:
“Təsəvvür edin, onların təyyarəsi itir. Onlar bilmirlər ki, təyyarələri haradadır. Təyyarə bir istiqamətə uçub, digər istiqamətə uçub, pilotlar gizlənib, təyyarə itib, onlar oturub fikirləşirlər ki, təyyarəni kim qaçırıb və ya oğurlayıb. Sonra Əbu-Dabidə ADEX sərgisində Ermənistan stendi heç vaxt olmadığı dərəcədə tərtəmiz idi, orada bir dənə də eksponat yox idi. Bir tərəfdən onlar orada nə sərgiləyə bilərdilər, axı onların hərbi sənayesi yoxdur. Lakin digər tərəfdən, onların orada stendi olması üçün, necə deyərlər, təlxəklik etmək və kiminsə dalınca qaçmaq nəyə lazım idi. Bütün dünya qarşısında biabır oldular. Deməli, hamı öz məhsulunu gətirib, Ermənistan stendində isə hansısa kitabçalar var. Axı bu biabırçılıqdır. Daha sonra bəyanat vermək ki, “İsgəndər” buraxılıb. Bəs o haraya buraxılıb? 10 faiz partlayıb. Axı bu, sadəcə olaraq gülməlidir. Bu gün məhz bu tragikomediya orada baş verənləri xarakterizə edir. Onlar “Skad”, “Toçka U” raketlərini yaşayış məntəqələrinə tuşlayırdılar, özü də məqsədyönlü şəkildə, gecə vaxtı yatmış Gəncə şəhərinə. Bütün bunlar izlənilib. Biz, təbii ki, bu məlumatı dərhal Rusiya tərəfinə çatdırdıq. Mən Prezident Putinlə söhbət zamanı bu barədə dedim, Rusiya tərəfini erməniləri bundan çəkindirməyə çağırdım. Əks halda, bizim seçimimiz olmayacaq, biz onların şəhərlərini bombalayacağıq. Bizdə hər şey nişan altında idi. Bizim raketlərimiz təkcə Naxçıvan Muxtar Respublikasından deyil, digər regionlardan da rahatlıqla Yerevanadək çatar. Biz bunu hər an nümayiş etdirə bilərik. Buna görə də mənim bu çağırışım artıq bütün qırmızı xətləri keçmiş, azğınlaşmış Ermənistan hərbi-siyasi rəhbərliyini vəziyyətin sağlam düşüncəli təhlilinə çağırış idi. Yoxsa biz onları, sadəcə, tamamilə məhv edərik. Hesab edirəm ki, Rusiya tərəfinin təsiri özünü göstərdi. Çünki Gəncəyə son zərbələrdən sonra bir daha belə cəhdlər olmadı. Hərçənd, buna qədər onlar müntəzəm hücuma keçirdilər. Yeri gəlmişkən, bundan sonra da həm artilleriya silahlarından, həm də minaatanlardan bizim şəhərlərimizə daim hücum edirdilər. Tərtərə, məncə 16, yaxud 18 min bomba düşüb, o cümlədən dəfn mərasiminə hücum ediblər. Yəni dinc əhaliyə maksimum ziyan vurmaq istəyiblər. Görünür, bu onların acizliyinin, zəifliyinin, döyüş meydanında məğlub olmalarının nəticəsi idi. Onlar düşünürdülər ki, bizi bu yolla dayandıracaqlar. Hərçənd, mən demişdim ki, öz yaxınlarını itirmiş və ya uçqunların altından çıxmış, tamamilə qan içində olan adamlar deyirdilər ki, yalnız irəli gedin, təki dayanmayın.
Nə etmək, hansı çəkindirmə mexanizmlərindən istifadə etmək lazım olması barədə sualınıza gəldikdə, Ermənistana “İsgəndər” raketləri veriləndə mən bunu Rusiya rəhbərliyinə demişdim. Mən demişdim ki, bu düzgün addım deyil, bu addım sabitliyin möhkəmlənməsinə yönəlməyib, bu bizi heç nədən çəkindirməyəcək. Yeri gəlmişkən, müharibə dövründə də demişəm və Rusiya tərəfinə “İsgəndər” raketlərini geri almalarını təklif etmişəm. Bəli, demişəm, bu gün də fikrim belədir ki, regionlarda hadisələrin belə faciəli inkişafının qarşısını ala biləcək yeganə yol bu silahları geri almaq və ermənilərə bir daha pulsuz silah verməməkdir. Mən bunu həmişə deyirəm. Təəssüf ki, belə olub. Müharibədən sonra belə hallar yoxdur. Biz bunu müsbət addım kimi qiymətləndiririk”.
Bu biabırçılıqdan sonra İlham Əliyevin etdiyi təklif əsasında Rusiyanın “İsgəndər” raketlərini Ermənistandan geri alması mümkündürmü?
“Rusiya onun silah sənayesinin reytinqinə vurulan böyük anti-piarı əsas götürüb həmin raketləri geri ala bilər”
Hərbi ekspert, ehtiyatda olan polkovnik-leytenant Daşdəmir Əliyev “Bakı-Xəbər”ə açıqlamasında bildirdi ki, Ermənistan baş naziri Nikol Paşinyanın Rusiyanın “İsgəndər” ballistik raketləri barədə həqiqətləri deməsi, bu silahın əslində mədh edildiyi kimi yüksək keyfiyyətlərə malik olmamasını açıqlaması Moskvada əsl hiddət fırtınasına səbəb olub: “Rusiyanın rəsmi şəxsləri, millətçi ekspertlər, hətta “5-ci kolon” təmsilçiləri “İsgəndər”ləri dünyanın az qala ən mükəmməl silahı kimi təqdim etməyə cəhd edirlər. Lakin Ermənistanın keçmiş müdafiə naziri Seyran Ohanyan bəyan edib ki, bu raketlərlə bağlı heç bir problem ola bilməzdi.
Nikol Paşinyan “İsgəndər” barədə fikirlərini keçmiş prezident Serj Sarkisyanın tənqidinə cavab olaraq bəyan etmişdi. Sarkisyan demişdi ki, o bu raketlərin niyə müharibənin üçüncü və dördüncü günündə, Azərbaycan Horadiz ətrafında və başqa yerlərdə böyük canlı qüvvə və hərbi texnika cəmləşdirəndə atılımadığını başa düşmür. Keçmiş prezident bunu da iddia etmişdi ki, onda “İsgəndər” raketinin Şuşa istiqamətində istifadə olunduğuna dair mötəbər informasiya var. Şuşa uğrunda döyüşlər müharibənin son günlərinə təsadüf edirdi. Rusiyalı ekspertlər isə hesab edir ki, “İsgəndər” raketləri yüksək dəqiqliyə malik müasir silahdır və bundan əvvəl dəfələrlə hərbi təlimlərdə özünü doğruldub”.
Ekspertin sözlərinə görə, Ermənistan Moskvanın keçmiş sovet məkanında “İsgəndər” raket sistemini satdığı ilk ölkə olub: “Yerevan bu raketləri 2016-cı ildə keçirdiyi hərbi paradda nümayiş etdirib. Ermənistana 4 “İsgəndər” kompleksi verilib. Həmin komplekslər çox bahalıdır. Mən inanmıram ki, Ermənisatnın nağd pul ödəyib həmin raketləri alamağa gücü çatsın. Bu baxımdan da Rusiya ya onları Ermənistana havayı verib, ya da uzun illik kredit əsasında. Hər iki halda Rusiya onun silah sənayesinin reytinqinə vurulan böyük anti-piarı əsas götürüb həmin raketləri geri ala bilər”.
Məhəmmədəli QƏRİBLİ
