Ermənistan diktatorları büdcənin böyük hissəsini Azərbaycan torpaqlarının minalanmasına sərf edib - xalq azı 340 milyon dolların sovrulmasını bağışlayacaqmı...

Əli Orucov: “Ermənilərin ərazilərimizi kütləvi şəkildə minalamaqda mənfur məqsədi o olub ki, əhali geri qayıtmasın”

img

Rusiyanın tanınmış “Svobodnaya Pressa” portalı yazır ki, Ermənistan 2020-ci il üçün hərbi büdcəsinin 50, rəsmi valyuta ehtiyatlarının 15 və ya dövlət büdcəsinin 10 faizini Azərbaycan ərazilərinin minalanmasına xərcləyib.

Portalda dərc olunan məqalədə bununla bağlı bir sıra məqamlara aydınlıq gətirilib: “27 kvadratkilometrlik təmizlənmiş kiçik bir ərazidə tapılan mərmilərin ümumi dəyəri 3 milyon dollara çatır. İstehkamçıların qiymətləndirməsinə görə, işlərin artıq aparıldığı və ya gələcəkdə aparılması planlaşdırıldığı ərazilərdə, ümumilikdə, təxminən 4,5 milyon mina basdırıla bilər”.  Yazıda o da qeyd olunur ki, mütəxəssislərin hesablamalarına görə, Ermənistan tərəfinin basdırdığı minaların ümumi dəyəri 340 milyon dollara çata bilər: “Ermənilərdən “miras qalan” mina sahələri əsasən Azərbaycanın artıq nəzarəti bərpa etdiyi və bu illər ərzində Dağlıq Qarabağın statusu ətrafındakı danışıqlarda əsas sövdələşmə elementi olan Dağlıq Qarabağ ətrafındakı yeddi rayonun ərazisində yerləşir”.

Belə məlum olur ki, işğalçı Ermənistan hakimiyyəti Dağlıq Qarabağın ətrafında yerləşən rayonlarda çoxsaylı mina basdırıb. Necə deyərlər, bu mənfur məqsədlərini reallaşdırmaq üçün büdcədən vəsait əsirgəməyiblər.

  • “Təmas xəttinə yaxın olmayan ərazilərin kütləvi minalanması 44 günlük müharibə dövründə və ondan sonra olub”

Məsələyə münasibət bildirən AMİP funksioneri Əli Orucovun sözlərinə görə, bütün bunlar erməni tərəfinin məkrli niyyətlərindən xəbər verir: “Ermənistan ən çox Ağdam, Füzuli və Tərtər rayonlarının ərazilərini minalayıb. Ərazilər azad edilənə qədər təmas xətti bu rayonlardan keçirdi. Ərazi düzənlik olduğu üçün bütün təmas xətti minalanmışdı. Xüsusən də Ağdam rayonu. Eyni zamanda, Ağdam və Füzulidə güclü mühəndis-istehkam qurğuları yaratmışdılar. 1994-cü ildə əldə olunan atəşkəsin 26 il uzanması ermənilərə bununla bağlı çoxsaylı iş görməyə imkan verdi. Onlar düşünürdülər ki, Azərbaycan Ordusu əsasən Ağdam istiqamətindən hücum edəcək. Bu zaman minalanmış əraziləri və möhkəmləndirilmiş istehkam xətlərini keçmək mümkün olmayacaq. Nəticədə ciddi itkilərlə üzləşəcəyik. Ancaq ordumuz uğurli hərbi strategiya və taktikaya əsasən düşmənin planlarını pozdu. Bu zaman pərakəndə formada geri çəkilən Ermənistan ordusu hara gəldi oranı minaladı. Təmas xəttinə yaxın olmayan ərazilərin kütləvi minalanması 44 günlük müharibə dövründə və ondan sonra olub. Yəni dekabrın 1-nə qədər harada imkan olubsa, ermənilər oranı minalayıblar. Ermənilərin ərazilərimizi kütləvi şəkildə minalamaqda mənfur məqsədi o olub ki, əhali geri qayıtmasın. Qorxsun, çəkinsin və həmin ərazilərdə məskunlaşmaq mümkün olmasın. O üzdən, nə qədər desən, mina alıblar. Ətraf rayonlarda bütün yaşayış məntəqələri məhv edilib. Sonra gördülər ki, məcburi köçkünlər öz dədə-baba torpaqlarına qayıtmaqda qərarlıdırlar, bu zaman necə gəldi ərazilərdə mina basdırdılar. Ancaq bunun da bir xeyri olmayacaq. Azərbaycan zamanla bütün əraziləri minalardan təmizləyəcək. Əhali öz yurdlarına qayıdacaq. Erməni cəmiyyəti bütün bunlara görə çətin ki, hakimiyyətdən hesabat tələb etsin. Ona görə ki, bu millət xəstə düşüncəyə sahibdir”.

Partiya funksioneri hesab edir ki, Azərbaycan bütün müasir texniki vasitələrdən istifadə edərək minaların təmizlənməsini sürətləndirməlidir.

Vidadi ORDAHALLI

Son xəbərlər