Ermənistanda proseslər vətəndaş müharibəsinə nə qədər yaxındır…

img

Ermənistanda siyasi böhran davam edir, Fevralın 25-də səhərdən vəziyyət gərginləşib, çünki SQ Baş Qərargahı bəyanat yayıb və açıq mətnlə baş nazir Nikol Paşinyanın istefasını tələb edib. Nikol Paşinyan baş verənləri hərbi çevriliş cəhdi adlandırıb və bildirib ki, Baş Qərargah rəisinin vəzifədən kənarlaşdırılması üçün sənədləri hazırlayıb.

Ermənistan prezidenti Armen Sarkisyan Baş Qərargah rəisinin istefası haqda sərəncamı imzalamayıb. Onun bütün “lehinə” və “əleyhinələri” nəzərdən keçirib qərar qəbul etmək üçün üç günü var.

Hərbçilərin bəyanatından sonra, günün ikinci yarısında İrəvanda eyni zamanda iki izdihamlı mitinq keçirilib. Birini 2020-ci ilin noyabrından Nikol Paşinyanın istefasını tələb edən birləşmiş müxalifət partiyaları təşkil edib. Digər mitinqə isə baş nazirin çağırışı ilə onun tərəfdarları toplaşıb. Nikol Paşinyan bütün siyasi qüvvələri küçələrdən getməyə və danışıqlara bağlamağa, Baş Qərargah rəhbərliyini isə vəzifələrinin başına qayıtmağa çağırıb. Müxalifətçilər mübarizəni dayandırmaq niyyətində deyillər, onlar Nikol Paşinyan istefaya gedənə qədər küçələrdə gecələmək qərarına gəliblər.

Ermənistandakı vəziyyətə Rusiyadan reaksiya verilib. Moskva İrəvanda baş verənlərə respublikanın daxili məsələsi kimi yanaşır. Bununla yanaşı, Rusiya XİN rəhbəri Sergey Lavrov bildirib ki, Moskva vəziyyətin dinc yolla nizamlanmasına ümid edir.

Ankara “çevriliş cəhdini qətiyyətlə qınayıb” – bu haqda ölkənin xarici işlər naziri Mövlut Çavuşoğlu bildirib. Ermənistandakı ABŞ səfirliyi hakimiyyəti və müxalifəti kəskin addımlardan çəkinməyə və məsələni “dinc və aqressiyasız” yolla həll etməyə çağırıb. Ermənistanın ilk prezidenti Levon Ter-Petrosyan hakimiyyəti və müxalifəti vətəndaş müharibəsi ehtimalını istisna etməyə çağırıb.  Ter-Petrosyan Ermənistanda vətəndaş müharibəsinin təkcə Türkiyə və Azərbaycanın xəyallarını deyil, həm də erməni xalqının sonunun başlanğıcını həyata keçirəcəyini qeyd edib.

Ermənistanın Baş prokurorluğu vətəndaşları ölkədəki qayda-qanunu və asayişi təhdid edən istənilən təşəbbüsdən çəkinməyə çağırıb. Baş prokurorluğun açıqlamasında deyilir: "Silahlı Qüvvələrin Baş Qərargahının bəyanatında yer alan risqlər, ictimai və sosial platformalardakı müzakirələr və şərhlər ölkədə sabitliyin pozulması üçün ilkin şərtlər yaratdı. Vəziyyətin mümkün inkişafı dövlətin və xalqın təhlükəsizliyi baxımından gözlənilməz, fəlakətli nəticələrə, habelə hüquq sisteminə və konstitusiya quruluşuna yönəlmiş ən ciddi təhdidlərə gətirib çıxara bilər. Bununla əlaqədar olaraq, Ermənistan Baş prokurorluğu Konstitusiya çərçivəsindən kənara çıxmamağa, məsuliyyətsiz addımlardan çəkinməyə, ölkədəki qanunun aliliyinə təhlükə yaradan hər hansı bir təşəbbüsdən, silahlı qüvvələri daxili proseslərə cəlb etmək cəhdlərindən çəkinməyə çağırır".

ATƏT-in fəaliyyətdə olan sədri, İsveçin xarici işlər naziri Ann Linde Ermənistandakı vəziyyətdən narahatlığını ifadə edib. Bu barədə Ann Linde “Twitter”də bildirib: “Ermənistandakı son hadisələrdən narahatam. Bütün tərəfləri ATƏT-in demokratik proseslər və qanunun aliliyi ilə bağlı öhdəliklərinə münasibətdə sülh yolu ilə hərəkət etməyə çağırıram. Vəziyyət zorakılıq olmadan həll olunmalıdır”.

Birləşmiş Millətlər Təşkilatı (BMT) da Ermənistandakı vəziyyətdən narahatdır və tərəfləri təmkinli olmağa, siyasi ziddiyyətləri dialoq yolu ilə həll etməyə çağırır. Bu barədə BMT baş katibinin rəsmi nümayəndəsi Stefan Düjarrik bildirib: “Ermənistanda gördüklərimiz bizi çox narahat edir. Bütün tərəflərin sakitliyə riayət etməsi çox vacibdir. Biz təmkinli olmağa, həmçinin gərginliyin aradan qaldırılması və siyasi ziddiyyətlərin həlli üçün inklüziv dialoqa çağırırıq”.

Bununla yanaşı, o, Konstitusiyaya və demokratiyaya hörmət edilməsinin zəruriliyini qeyd edib.

Prezident İlham Əliyev də  Ermənistandakı hadisələr barədə danışıb. O bildirib ki, Ermənistanı bu vəziyyətə salan onların rəhbərləridir: "İndi baxın, Ermənistan nə gündədir. Orada böhran yaşanır, gündə toqquşmalar, həbslər baş verir, demokratik əsaslar demək olar ki, tamamilə pozulub. Ermənistan heç vaxt bu cür acınacaqlı vəziyyətdə olmamışdı. Onları bu vəziyyətə salan onların rəhbərləridir. Həm 20 il Ermənistana başçılıq edən xunta rəhbərləri - Köçəryan-Sarkisyan xuntası, həm ondan sonra gələn hakimiyyət".

Bütün bunlar bir daha sübut edir ki, Ermənistanda vəziyyət idarəolunmaz fazaya qədəm qoyub. Hakimiyyət daxilində ciddi böhran var. Baş nazirin verdiyi qərarı Prezident imzalamır. Ordu ilə siyasi hakimiyyət arasında ziddiyyət çox dərindir. Bütün bunların fonunda ölkədəki iqtisadi vəziyyət də acınacaqlıdır. Əminliklə demək olar ki, Ermənistan postmüharibə dönəmindən sonra  ilk dəfədir vətəndaş müharibəsinin astanasına gəlib çatıb.

Məhəmmədəli QƏRİBLİ

Son xəbərlər