Seyid Camal Əzimbəyli: “Ermənilər milli məsələlərdə bir olsaydılar, it kimi bir-birini qırmazdılar”
“Hər zaman xarici nümayəndələr bizə deyirdilər ki, Ermənistan cəmiyyəti birlik nümayiş etdirir və Ermənistan cəmiyyətində milli birlik var”. Bunu Prezident İlham Əliyev şəhid ailələrinin üzvləri və müharibə əlilləri ilə görüşündə çıxışı zamanı deyib.
Ölkə başçısının sözlərinə görə, müharibədən sonra indi hər kəs görür ki, Azərbaycanda inkişaf gedir, quruculuq işləri başlayıb: “Ermənistanda isə böhran hökm sürür, bir-birilərini ittiham edirlər, bir-birilərini didirlər. Hər zaman xarici nümayəndələr bizə deyirdilər ki, Ermənistan cəmiyyəti birlik nümayiş etdirir və Ermənistan cəmiyyətində milli birlik var. İndi biz görürük haradadır bu milli birlik. Bu məğlubiyyətdə bir-birilərini ittiham edirlər, bir-birilərini günahlandırırlar, kütləvi həbslər baş verir. Amma, nədənsə, demokratiyadan dəm vuran bəzi qeyri-hökumət təşkilatları və bəzi hökumətlər buna göz yumurlar. Necə olur, Ermənistanda müxalifət gündəlik formatda əzilir, dağıdılır, həbs edilir, öldürülür, amma buna heç kim reaksiya vermir. Bu, nəyi göstərir? Necə deyərlər, həmin 30 illik tarix bir daha əks etdirir ki, biz bu qələbəni təkcə Ermənistan üzərində qazanmamışıq. Bizə qarşı mütəşəkkil və güclü dairələr birləşib, bizim torpağımızı əbədi işğal altında saxlamaq istəyirdilər”.
90-cı illərdə Ermənistanın arxasında dayanan dairələr ərazilərimizin işğalına şərait yaratdılar. O vaxtdan belə bir mif uydurulmuşdu ki, guya ermənilər hər zaman milli birlik göstəriblər. Ancaq 44 günlük müharibə göstərdi ki, bu barədə deyilənlər, sadəcə, uydurmadır.
- “Ölkədə zorakılıq halları artır, amma, nədənsə, demokratiya qoruyucuları olan Qərb...”
Sözügedən məsələ ilə bağlı fikirlərini “Bakı-Xəbər”lə bölüşən şərqşünas Seyid Camal Əzimbəylinin fikrincə, ermənilər milli məsələlərdə bir olsaydılar, it kimi bir-birini qırmazdılar: “Necə ki, bu gün bu baş verir. Ermənistanın hazırkı siyasi mənzərəsi göz qabağındadır. Müharibədə ağır məğlubiyyətə uğradıqdan sonra erməni cəmiyyətində ciddi parçalanma müşahidə edilir. Müxalifət iqtidarı, əks tərəf isə müxalifəti ittiham edir. Adətən, ölkə üçün kritik olan məqamlarda millət birləşərək dövləti çətin vəziyyətdən çıxarır. Ermənistanın tarixi, dövlətçilik ənənələri olmadığı üçün, bunların heç biri nəzərə alınmır. Çünki müasir Ermənistan terrorçuluq ideologiyasına söykənir. Onlar terrora əsaslanaraq dövləti idarə edirlər. Tarixə nəzər salsaq, bununla bağlı çoxsaylı misal gətirmək olar. Əvvəlki hakimiyyətlər kimi, demokratiya adı altında iqtidara gələn Paşinyan da ona qarşı olanlara yönəlik repressiyalara əl atır. Ölkədə zorakılıq halları artır, amma, nədənsə, demokratiya qoruyucuları olan Qərb və onun təsisatları bütün bunları görmürlər. Çünki Ermənistandan bir alət kimi region ölkələrinə qarşı istifadə edirlər”.
Şərqşünas hesab edir ki, Azərbaycan parlaq qələbəsi ilə Ermənistanın və onun himayədarlarının böyük planlarını alt-üst etdi.
Vidadi ORDAHALLI
