"Benilüks" ölkələri erməni lobbisinin təsiri altında Azərbaycana qarşı postmüharibə düşmənçiliyini artırır...

Yeganə Hacıyeva: “Ənənəvi xristian təəssübkeş və tərəfkeşliyi də göz önündədir”

img

İnsan hüquqları məsələsini siyasi qərəzlilik mövzusuna çevirmək heç kimsəyə, o cümlədən Lüksemburq xarici işlər nazirinə başucalığı gətirməz. Bu barədə Xarici İşlər Nazirliyinin Mətbuat Xidməti İdarəsinin Lüksemburq xarici işlər nazirinin BMT-nin İnsan Hüquqları Şurasının 46-cı iclasında çıxışı zamanı səsləndirdiyi bəzi fikirlərə dair şərhində deyilir.

Qeyd edilir ki, 24 fevral 2021-ci il tarixində Lüksemburq xarici işlər və Avropa məsələləri üzrə naziri Jan Asselbornun BMT İnsan Hüquqları Şurasının 46-cı iclasında çıxışı zamanı “Azərbaycanı Dağlıq Qarabağda çoxlu dağıntılara səbəb olan hərbi hücumda və Türkiyəni onu dəstəkləməkdə” ittiham etməsi bu dövlət rəsmisinin bölgədəki vəziyyətdən xəbərsiz şəkildə və beynəlxalq hüququn müvafiq prinsiplərinə tamamilə zidd olaraq nümayiş etdirdiyi qərəzli mövqeyinin göstəricisidir: "Özünü insan hüquqları keşikçisi kimi qələmə verməyə çalışan Jan Asselborn, Ermənistanın 30 ilə yaxın müddət ərzində Azərbaycanın beynəlxalq tanınmış ərazilərinin 20 faizini işğal altında saxlayıb, bu ərazilərdə qanlı etnik təmizləmə həyata keçirərkən, 1 milyondan çox Azərbaycanlının fundamental hüquqlarını kobud şəkildə pozarkən nə səbəbdən bu məsələni bir dəfə də olsun BMT İnsan Hüquqları Şurasında və ya digər müvafiq beynəlxalq platformada qaldırmayıb? Bəlkə Lüksemburq XİN-in Ermənistanın 27 sentyabr tarixində əl atdığı növbəti hərbi təxribat nəticəsində başlayan hərbi əməliyyatlar zamanı Ermənistan silahlı qüvvələrinin məqsədyönlü şəkildə döyüş əməliyyatları zonasından uzaqda yerləşən mülki insanları hədəfə aldığı, 100-dən çox günahsız azərbaycanlını qətlə yetirdiyi barədə məlumatı yoxdur?"

Maraqlıdır ki, xüsusilə də 44 günlük müharibədən sonra Benilüks ölkələrinin Azərbaycana düşmən münasibəti intensivləşib. Bunun kökündə hansı səbəblər dura bilər?

Politoloq Yeganə Hacıyeva “Bakı-Xəbər”ə açıqlamasında bildirdi ki, 44 günlük müharibədən sonra erməni lobbisinin güclü olduğu və ən əsası daxili siyasətlərinə Rusiya kəşfiyatının aktiv təsir edə bildiyi, Rusiyadan hibrid siyasi-maliyyə asılılığı olan Avropa ölkələrinin Azərbaycana münasibətdə qərəz nümayiş etdirməsi gözlənilən idi: ”Bu mənada, təhlükəsizliyin izlənməsi üzrə ixtisaslaşmış beynəlxalq təşkilatlarda "Rusiya xüsusi xidmətinin Avropa mənzil qərərgahı" adlandırdıqları Benilüks ittifaqı ölkələrinin aktiv rol oynayacağı da aydın idi. 44 günlük Vətən müharibəsi günləri və sonrası ittifaqın 3 ölkəsindən biri olan Hollandiyanın Azərbaycan və Türkiyə əleyhinə bəyanatları, sanksiya çağırışı və s. oldu. İndi də Hollandiya bu növbəni ittifaqın ikinci üzvü Lüksemburqa ötürüb. 2 gün öncə Lüksemburq xarici işlər və Avropa məsələləri üzrə naziri BMT İnsan Hüquqları Şurasının 46-cı iclasında çıxışı zamanı Azərbaycanı Dağlıq Qarabağda çoxlu dağıntılara səbəb olan hərbi hücumda və Türkiyəni onu dəstəkləməkdə ittiham etdi.

Lüksemburq xarici işlər və Avropa məsələləri üzrə nazirinin Cənubi Qafqaz regionundakı, Qarabağdakı vəziyyətdən tam xəbərsiz çıxışı, beynəlxalq hüququn prinsiplərinə heçə sayan qərəzli mövqeyi bizi təəccübləndirmədi. Eyni mövqeyi digər beynəlxalq tədbirdə Belçika rəsmilərinin də ifadə edəcəyi gözləniləndir. Bu, məsələnin bir tərəfidir, digər tərəfi isə iqtisadi-siyasi maraqların təmin olunması üçün Dağlıq Qarabağ mövzusunun istifadə olunmasıdır”.

Politoloqun sözlərinə görə, bu gün Ermənistanın müdafiəsi adı altında Hollandiya  NATO daxilində tənlükəsizlik və maliyyə maraqlarını, Fransa Cənubi Qafqaz və Aralıq dənizi hövzəsində iqtisadi maraqlarını təmin etmək məqsədilə  media və QHT resurslarını səfərbər edib: “Əlbəttə ki, bəzi Qərb dairələrinin Azərbaycan və Türkiyəyə münasibətdə qərəzli  davranışını təkcə Avropa ölkələrinin hökumətlərindəki, media və QHT-lərindəki erməni lobbisi, onların nüfuzu və ya təsiri ilə izah etmək doğru deyil: “Ənənəvi xristian təəssübkeş və tərəfkeşliyi də göz önündədir. Dünyanın 193 ölkəsini, onlardan asılı 500 ərazini, Antarktida, Qərbi Səhra, Dünya okeanı daxil bütünlükdə Yer kürəsinin 80-% ərazisini mandatına daxil etmiş BMT  Ermənistanı işğalçı və aqressor ölkə kimi tanıyıb. BMT Təhlükəsizlik Şurasının Dağlıq Qarabağ münaqişəsi ilə bağlı  4 qətnaməsi Ermənistanı işğalçı dövlət olmasını sübut edib. Buna rəğmən, bəzi Avropa ölkələrinin hökumətləri, QHT-ləri, mediası Ermənistan kimi işğalçı, barbar bir ölkəni müdafiə edir və bu fakt özlüyündə, universal dəyər dediyimiz Qərb dəyərlərini gözdən salır. Məhz bu yanaşma, Qərb təsisatlarının ikili, riyakar standartları ümumilikdə dünyada sülhü, təhlükəsizliyi qorumaq və möhkəmlətmək təşəbbüslərini şübhə altına alır.

Türkiyə Avropa, Balkan yarımadası, Aralıq dənizinin şərqi, Yaxın Şərq, Şimali Afrika, Cənubi Qafqaz, Orta Asiya və bütün Avrasiyanın əsas güc ölkəsindən biridir. Əsas İslam ölkəsi kimi Türkiyə həm də müasir dünyanın və Avropanın bir hissəsidir. Avropanın bu qədər qərəzli  davranışının məğzində NATO üzvü olan, dünyada ikinci güclü orduya məxsus Türkiyənin Avropaya hər gün daha çox artan təsirini azaltmaq məqsədi durur. Bizə qarşı olan hücumların bir səbəbi də bununla bağlıdır. Çünki biz faktiki olaraq Türkiyə ilə eyni maraqları bölüşürük”.

Məhəmmədəli QƏRİBLİ

Son xəbərlər