Ramil Məmmədli: “Əməliyyatların düzgün planlaşdırılması az itki ilə böyük ərazilərin azad edilməsinə gətirib çıxardı”
“İkinci Qarabağ müharibəsində şəhidlərimizin sayı müharibənin miqyasına görə həddindən artıq azdır”. Bunu Prezident İlham Əliyev şəhid ailələrinin üzvləri və müharibə əlilləri ilə görüşündə çıxışı zamanı deyib.
Ölkə başçısının sözlərinə görə, İkinci Qarabağ müharibəsində 3 minə yaxın şəhidimiz olub: “Birinci Qarabağ müharibəsində 12 mindən çox şəhidimiz olmuşdur və 4 minə yaxın hərbçimiz itkin düşmüşdür, təqribən 16 min itkimiz olmuşdur və torpaqlarımız işğal altına düşmüşdür. İkinci Qarabağ müharibəsində şəhidlərimizin sayı müharibənin miqyasına görə həddindən artıq azdır. Əlbəttə, hər bir şəhidimizin xatirəsi bizim üçün əzizdir. Hər bir insanın həyatı qiymətsizdir. Ancaq nəzərə alsaq ki, genişmiqyaslı müharibə aparılıb və ilk günlərdən əks-hücum əməliyyatı, əslində, hücum əməliyyatına çevrilmişdir. Ermənilərin otuz il ərzində qurduqları istehkamları, 5-6 xətt müdafiə istehkamlarını və o bölgənin relyefini nəzərə alsaq, tam qətiyyətlə deyə bilərik ki, biz istədiyimizə az itkilərlə nail olduq. Hətta dünyanın aparıcı ölkələrinin hərbi ekspertləri təəccüb edirlər ki, biz torpaqlarımızı işğalçılardan belə az itkilərlə azad etdik. Nəyə görə? Çünki bütün əməliyyatlar planlaşdırılanda ən vacib amillərdən biri itkilərin az olması idi. Hər gün əməliyyat planını təsdiq edərkən o amil ön planda idi”.
Adətən, hücum edən tərəfin itkiləri müdafiə olunan tərəfdən çox olur. Ancaq 44 günlük müharibə zamanı bunun tam əksi baş verdi. O baxımdan, Azərbaycan ordusunun əldə etdiyi bu qələbənin üstünlüklərini hərbi ekspertlər necə dəyərləndirirlər?
- “Müharibənin taktiki gedişatını öz xeyrimizə dəyişmək imkanlarından maksimum istifadə etdik”
Məsələyə münasibət bildirən hərbi ekspert Ramil Məmmədlinin sözlərinə görə, müharibənin aparıldığı ərazi və ümumilikdə, hərbi əməliyyatların keçirilmə miqyası, ordumuzun hücumda olması, əslində, itkilərimizin çox olmasına gətirib çıxarmalı idi: “Çünki, adətən, hücum edən tərəfin itkiləri çox olur. Ancaq Azərbaycan Ordusu bütün dünyanı təəccübləndirəcək unikal hərbi strategiya ilə əməliyyatlar apardı. Nəticədə itkilərimizin sayı müharibənin miqyasına görə çox aşağı oldu. Çünki Silahlı Qüvvələrin qoşun növlərinin hər biri ayrı-ayrılıqda uzun illər ixtisaslaşıb. Nəticədə peşəkar ordu birləşmələrinin yaradılmasına nail olduq. Həmçinin, müharibənin taktiki gedişatını öz xeyrimizə dəyişmək imkanlarından maksimum istifadə etdik. Bu zaman müdafiə olunan tərəfə nəinki güclü zərbələr endirildi, həm də onların geri çəkilməsinə səbəb olan əməliyyatlar həyata keçirildi. O cümlədən, müasir pilotsuz zərbə aparatlarından düzgün istifadə edilməsi də itkilərin az olmasında mühüm rol oynadı. PUA-lar vasitəsilə düşmənin nəinki ön xətdə yerləşən mövqelərinə, həm də dərinlikdə yerləşən mövqelərinə zərbələr endirdik. Ali Baş Komandanın rəhbərliyi altında hücumun düzgün təşkili və döyüşü birbaşa idarə edən bölük, taqım, tabor komandirlərinin peşəkarlığı qələbənin əldə edilməsini sürətləndirdi. Bunların hər birinin üzərinə böyük məsulyət düşürdü ki, şəxsi heyəti qorusunlar. Yəni itkilərin sayı minimum olsun. Bir sözlə, əməliyyatların düzgün planlaşdırılması və digər amillər az itki ilə böyük ərazilərin azad edilməsinə gətirib çıxardı”.
Hərbi ekspertin fikrincə, bütün bunların nəticəsidir ki, Azərbaycanın uğurlu hərbi əməliyyatları dünya ölkələri tərəfindən öyrənilir.
Vidadi ORDAHALLI
