Son zamanlar müxtəlif mətbuat orqanlarında və sosial şəbəkələrdə Xocalı soyqırımı qurbanlarının sayı ətrafında müxtəlif şayiələr, uydurmalar dolaşmaqdadır. Hətta bəzi iddialara görə, Xocalıda şəhid edilənlərin sayı 613 deyil, daha çoxdur.
Xocalı soyqırımı qurbanlarının sayı ilə bağlı yayılan şayiələrin haradan qaynaqlandığı aydındır. Bu məsələnin niyə əvvəllər yox, məhz Azərbaycan 44 günlük müharibədə zəfər qazandıqdan sonra meydana atılması da təsadüfi deyil.
Bütün rəsmi sənədlərdə Xocalı qətliamı qurbanlarının sayının 63-ü uşaq, 106-sı qadın, 70-i qoca və qarı olmaqla 613 nəfər olduğu və 1275 nəfərin düşmən tərəfindən əsir götürüldüyü qeyd edilir. Xocalı soyqırımı zamanı 8 ailə tamamilə məhv edilib, 25 uşaq hər iki valideynini, 130 uşaq valideynlərindən birini itirib, düşmən gülləsindən 76-sı uşaq olmaqla, 487 nəfər yaralanıb. Əsir götürülənlərdən 150 nəfərinin, o cümlədən, 68 qadın və 26 uşağın taleyi bu günədək məlum deyil. Bütün bunlar rəsmi məlumatlardır.
Ekspertlər deyirlər ki, ortada konkret rəsmi rəqəmələr olduğu halda, başqa rəqəmlər ətrafında müzakirə açmaq gərəkli deyil. Onların sözlərinə görə, ermənilər Azərbaycanın rəsmi rəqəmləri ətrafında ziddiyyətli görüntü yaradıb sonra da dünyaya bunun “uydurma” olduğunu demək istəyirlər. Tarixçilər deyirlər ki, Xocalı soyqırımı zamanı 613 nəfər Xocalı sakininin şəhid edildiyi, 1275 nəfərin isə əsir götürüldüyü məlumdur.
Bu gün Xocalı soyqırımı qurbanlarının sayının təhrif edilməsi, saxtalaşdırılması birbaşa erməni daşnaklarının, ideoloqlarının adı ilə bağlıdır. Erməni ideoloqları bu rəqəmləri mümkün qədər ziddiyyətli formaya salıb təqdim etməklə çalışırlar ki, indiyə qədər dünyaya təqdim edilən rəqəmlər ətrafında manipulyasiya etsinlər. Ekspertlərin sözlərinə görə, erməni ideoloqları bu cür təbliğat aparmaqla istəyirlər ki, ziddiyyətli rəqəmlər ətrafında oyunlar qursunlar. Əvvəlki dövrdə ermənilər Xocalı qətliamının qurbanlarının sayının 613-dən az olduğunu iddia edirdilərsə, indi onların sayının artıq olduğunu iddia edirlər. Erməni ideoloqları bununla tarixi həqiqətləri gizlətmək istəyirlər, bizim üçün də, dünya üçün də mənzərə aydındır, şəhid edilənlərin, yaralananların, əsir götürülənlərin hamısının dəqiq siyahısı Azərbaycan dövləti tərəfindən həm yerli, həm də beynəlxalq aləmə təqdim edilir.
“Erməni ideoloqlarının ortaya atdıqları bu fikirlər ziddiyyətlər yaratmağa xidmət etsə də, bütün hallarda, onların özlərinin əleyhinə işləyir”
Azərbaycan Milli Elmlər Akademiyasının (AMEA) Fəlsəfə və Sosiologiya İnstitutunun aparıcı elmi işçisi, tarix üzrə fəlsəfə doktoru Faiq Ələkbərli “Bakı-Xəbər”ə bildirdi ki, Xocalı soyqırımı qurbanlarının sayı ətrafında erməni ideoloqlarının manipulyasiya etməsinin müxtəlif səbəbləri ola bilər. F.Ələkbərli hesab edir ki, bu məsələnin məhz 2021-ci ildə meydana çıxarılması səbəbsiz deyil. Onun sözlərinə görə, hazırda Azərbaycan dövləti Ermənistana qarşı beynəlxalq səviyyədə məhkəmə iddiası qaldırmağa hazırlaşır və bu istiqamətdə işlərə başlanıb. “Burada müxtəlif məqsədlər ola bilər. Ola bilsin ki, ermənilər 613 deyil, daha çox sayda insanın Xocalıda şəhid edildiyini iddia etməklə Azərbaycanın Ermənistana qarşı açacağı məhkəmə prosesinin uzadılmasına, yubadılmasına nail olmaq üçün indidən bu cür manipulyasiyalara əl atırlar. Yəni onlar bu məsələni gündəmə gətirməklə həmin məhkəmə prosesində ziddiyyətlərin, fikir müxtəlifliyinin yaradılmasına nail olmaq və prosesi yubatmaq, uzatmaq məqsədi güdə bilərlər. Ancaq, digər tərəfdən, burada başqa amilləri də hiss etməyə bilmirik. Bu, ola bilsin, həm də Azərbaycana qarşı bir psixoloji basqı metodudur. O mənada ki, biz 44 günlük Vətən müharibəsində həm torpaqlarımızı işğaldan azad etdik, həm də düşmən tərəfi bu müharibədə çox böyük insan tələfatı verdi. Azərbaycan tərəf də rəsmi olaraq bildirib ki, düşmənin itkisi bizdən qat-qat çox olub. Erməni ideoloqları indi guya buna cavab kimi “Xocalıda qətlə yetirilənlərin sayı daha çox olub” deyə bildiriblər. Əlbəttə, ermənilər psixoloji anlamda bunu da hesablaya bilərlər. Çünki ermənilər deyirlər ki, Xocalıda şəhid olanların sayı 613 deyil, 2 mindən artıq olub, erməni ideoloqlarının ortaya atdığı bu fikirlər ziddiyyətlər yaratmağa xidmət etsə də, bütün hallarda, onların özlərinin əleyhinə işləyir. Rəsmən deyilir ki, Xocalıda 613 nəfər azərbaycanlı ermənilər tərəfindən şəhid edilib, 1275 nəfər əsir götürülüb”.
F.Ələkbərli qeyd etdi ki, ermənilər əsir götürülən Xocalı sakinlərini də ya həmin dövrdə, ya da ondan sonrakı vaxtlarda qətlə yetiriblər. Onun sözlərinə görə, ermənilər Xocalıda əsir götürdükləri günahsız insanları o səbəbdən daha şox “ölü” kimi qələmə vermək istəyirlər ki, Azərbaycan tərəfi onları ölmüş zənn edib, onların geri qaytarılmasını Ermənistandan tələb etməsin. “Məsələyə birtərəfli yanaşmaq olmaz, onun bütün tərəflərini nəzərə almaq lazımdır. Xüsusən də Xocalı soyqırımının ildönümü ərəfəsində və soyqırımı günü belə informasiyaların yayılmasını da təsadüfi saymaq olmaz. Bütün hallarda, biz düşmənin bir deyil, bir neçə istiqamətdə bizə qarşı təxribat apardığını və məkrli niyyətlərini gerçəkləşdirmək, ortaya qoymaq istədiyini aydın şəkildə görürük. Azərbaycan Xocalı soyqırımı qurbanlarının sayını rəsmən dəqiqləşdirib və beynəlxalq ictimaiyyətə təqdim edir. Bununla yanaşı, dövlətimiz Xocalı soyqırımı zamanı itkin düşənlərin, əsir götürülənlərin taleyi barədə də dəqiqləşdirmələr aparmalıdır. Çünki bunlar bizə məhkəmə prosesində lazım olacaq. Həmin dövrdə itkin düşən, əsir götürülən insanların hazırkı aqibəti məlum deyilsə, onlar öldürülübsə, onda Xocalı soyqırımında qətlə yetirilənlərin sayı 2 mindən artıq olmalıdır. Əsir və itkin düşənlərlə bağlı bütün məsələlər dövlət tərəfindən araşdırılmalı, dəqiqləşdirilməlidir. Bilirik ki, ermənilər uzun illər o insanların taleyi haqqında bizə hər hansı bir informasiya verməyiblər. Biz cəbhədə qazandığımız qələbəni beynəlxalq məhkəmədə də qazanmalıyıq, döyüş meydanında sözümüzü dediyimiz kimi, məhkəmədə öz sözümüzü deməliyik və ermənilərin hər hansı bir təxribatına uymadan daha obyektiv və inamlı şəkildə Azərbaycan bu məsələləri öz xeyrinə həll etməlidir” - deyə F.Ələkbərli qeyd etdi.
İradə SARIYEVA
