İrəvanda küçələr qarışdı, Paşinyandan "küçələrə çıxın" çağırışı… - FOTO

img

Ermənistan Silahlı Qüvvələrinin Baş Qərargahı ölkənin Baş naziri Nikol Paşinyanın istefasını tələb edib. Bu barədə Ermənistanın Baş Qərargah rəisi Onik Qasparyan, onun bütün müavinləri, bütün böyük hərbi birliklərin idarə rəhbərləri və komandirləriin imzaladığı bəyanatda bildirilir.

Hərbçilər qeyd ediblər ki, Ermənistan Baş Qərargah rəisinin birinci müavini Tiqran Xaçatryanın istefaya göndərilməsi barədə qərarın milli və dövlət maraqları nəzərə alınmadan, yalnız şəxsi ambisiyalara əsaslanaraq verildiyini hesab edirlər. "Belə çətin şəraitdə verilən qərar dövlət əleyhinə olan və məsuliyyətsiz addımdır", - deyə bəyanatda bildirilir.

Silahlı Qüvvələrin Baş Qərargahının istefa tələbi Paşinyanın bu həftənin əvvəlində Baş qərargah rəisinin müavinini işdən çıxarmasından sonraya təsadüf edib.

Ermənistanın yüksək rütbəli ordu rəsmilərinin Paşinyanın və onun hökumətinin istefasına çağırmasından sonra baş nazir ölkədə çevriliş cəhdinin olduğu barədə xəbərdarlıq edib və tərəfdarlarını meydana çıxmağa çağırıb.

"Tərəfdarlarımızı elə indi Respublika meydanına çıxmağa dəvət edirəm…", - deyə Paşinyan qeyd edib. Ardınca da ölkənin Silahlı Qüvvələrinin Baş Qərargah rəisi Onik Qasparyanı istefaya göndərib.

Sonradan Paşinyan Respublika meydanında öz tərəfdaşlarının yanına gəlib və yürüşə qatılıb. N.Paşinyan bugünkü hadisələrlə bağlı ölkəni tərk etmək niyyətində olmadığını deyib.

"Birincisi, təhlükə (qarşıdurma) həmişə var. Lakin biz hamımız razılaşmalıyıq ki, belə bir şey Ermənistan Respublikasında baş verməməlidir. Ən vacib olanı budur ki, biz hamımız sakitik. Ölkə daxilində düşmənlərimiz yoxdur. Bu ən önəmli faktdır. Lakin müzakirə olunmalı məsələlər var", - deyə Paşinyan qeyd edib.

"Ermənistan Silahlı Qüvvələri kimə tabe olur" sualına cavab olaraq Paşinyan bildirib: "Xalqa və Baş nazirə. Digər variant yoxdur".

O, həmçinin qeyd edib ki, çevriliş təhlükəsi idarəolunandır: "Hesab edirəm ki, bu emosional reaksiyadır və biz qardaşlarımıza sərt yanaşmamalıyıq".

O, öz tərəfdarlarını bir daha Respublika meydanına toplaşmağa çağırıb. Müxalifət də sakinləri küçələrə çağıraraq N.Paşinyanın istefasını tələb edib.

Eyni zamanda, baş nazirin meydana çıxmaq çağırışına etiraz olaraq bir sıra nazirliklərin əməkdaşları istefa ərizələri yazıb.

Ermənistan Polisi, Milli Təhlükəsizlik Xidməti və Baş Prokurorluğu birgə bəyanat yayaraq ölkə vətəndaşlarını təxribatlara uymamağa, sabitliyi qorumağa çağırıb. Qeyd olunub ki, hüquq-mühafizə orqanları qanunazidd hərəkətlərə adekvat reaksiya verəcək.

Bəyanatda vurğulanır ki, hazırda Ermənistanın dövlət orqanları öz funksiyalarını tam şəkildə yerinə yetirir.

Bu arada etiraz aksiyalarının davam etdiyi bir vaxtda İrəvan səmasında qırıcılar manevr edib. Ermənistan KİV-i yazır ki, baş nazir Nikol Paşinyanın istefasını tələb edən etirazçılar bu hadisəni alqışla qarşılayıb.

Ermənistanın ikinci prezidenti Robert Köçəryan isə erməni xalqına müraciət edərək Paşinyanın istefasına dair Silahlı Qüvvələrin Baş Qərargahının tələbini dəstəkləməyə çağırıb.

"Bu həlledici anda ölkəmizin ağaları olmaq, silahlı qüvvələrin və ordunun yanında dayanmaq lazımdır. Müharibəni uduzmuş və torpağı vermiş hakimiyyət getməlidir. Biizm milli dirçəlişimizin rəhni budur", - o özünün Telegram səhifəsində yazıb.

Ermənistan Silahlı Qüvvələrinin Baş Qərargahı ikinci dəfə bəyanat yayaraq qurumun rəhbər heyətinin bəyanatının heç kim tərəfindən istiqamətləndirilmədiyini və hər hansı təzyiq altında hazırlanmadığını bildirib.

"Bu, məqsədi belə məsuliyyətli vaxtda Vətənin qurtuluşuna xidmət etmək olan general zabitlərin qəti fikri və mövqeyidir. Növbəti dəfə aydın mövqeyimizi təsdiqləyirik", - deyə bəyanatda bildirilir.

Ermənistan bir qrup polis zabiti də baş nazir Paşinyanın istefası tələbinə qoşulub.

Erməni KİV-i yazır ki, onlar bu barədə bəyanat yayıb. Bəyanatda qeyd olunur ki, sənədi imzalayanlar ordu komandanlığının çağırışını dəstəkləyir. Bəyanatı aralarında general-mayor və general-leytenantlar olmaqla 30 zabit imzalayıb.

Ermənistandakı hadisələrə xaricdən ilk reaksiya Rusiyadan gəlib. Kremlin rəsmi sözçüsü Dmitri Peskov bildirib ki, Moskva Ermənistanda baş verənləri narahatlıqla izləyir.

"Biz Ermənistandakı vəziyyətin inkişafını narahatlıqla izləyirik. Biz hesab edirik ki, bu yalnız Ermənistanın – bizim Qafqazda çox önəmli və yaxın tərəfdaşımızın daxil işidir", - deyə Peskov bildirib.

Bu arada, Rusiya və Ermənistan xarici işlər nazirləri Sergey Lavrov və Ara Ayvazyan arasında telefon danışığı olub. Tərəflər Ermənistanda yaranmış vəziyyəti müzakirə edib.

Sergey Lavrov ölkəsinin Ermənistandakı vəziyyətin dinc müstəvidə həll olunacağına ümid etdiyini söyləyib. “Rusiya Ermənistandakı vəziyyətə bu ölkənin daxili işi kimi baxır”, - o bildirib.

Tahir TAĞIYEV

Son xəbərlər