Məlum olduğu kimi, vəzifə səlahiyyətindən, tutduğu postdan dövlət malını talamaq, mənimsəmək üçün istifadə edən məmurların cəzalandırılması prosesi davam edir. Bu proses yalnız vəzifədə olan deyil, sabiq məmurları da əhatə etməyə başlayıb. Sabiq əmək və əhalinin sosial müdafiəsi naziri Səlim Müslümovun həbsi bunu bir daha sübut etdi.
Bu günlərdə mediada Qaçqınların və Məcburi Köçkünlərin işləri üzrə Dövlət Komitəsinin keçmiş sədri, baş nazirin sabiq müavini Əli Həsənovun 2 milyard manat vəsait mənimsədiyi barədə məlumat səslənib. Belə məlumatlar yayılır ki, 2 milyard manata yaxın dövlət vəsaiti və xarici yardımların mənimsənilməsinə dair dəlillər var. O da məlumdur ki, qaçqın və məcburi köçkünlərə ev paylanması, onların kommunal xərclərinin qarşılanması sahəsində ciddi problemlərin olduğuna dair ölkə mətbuatı uzun illər dayanmadan faktlar və materiallar dərc edib. Zaman-zaman sözügedən məsələ ilə bağlı şikayətlər səslənib.
Məlumat üçün qeyd edək ki, Ə.Həsənovun “Qaçqınkom”a rəhbərlik etdiyi dövrdə köçkünlərin problemlərinin həlli, müavinətlərin verilməsi, evlərin tikilməsi üçün 7 milyard manatdan çox vəsait xərclənib. Daha dəqiqini desək, 1993-2018-ci illər ərzində, ümumilikdə, 7,1 milyard manat vəsait sərf edilib. Bunun 3,4 milyard manatı dövlət büdcəsinin, 2,3 milyard manatı Dövlət Neft Fondunun, 1,4 milyard manatı isə beynəlxalq maliyyə qurumları və ölkəmizdə fəaliyyət göstərən beynəlxalq humanitar təşkilatların vəsaiti olub.
Yeri gəlmişkən onu da qeyd edək ki, bu günlərdə baş prokuror Kamran Əliyev korrupsiyaya qarşı mübarizədə mətbuatın da rolunun böyük olduğunu qeyd edib. Onun sözlərinə görə, mətbuatda müxtəlif vəzifəli şəxslər tərəfindən korrupsiya hallarına yol verilməsi barədə yayımlanan məlumatlar araşdırılır və həmin məlumatlar öz təsdiqini tapdığı halda müvafiq tədbirlər görülür. Bütün bu deyilənlərin fonunda, mətbuatda Əli Həsənovla bağlı 2 milyard manat mənimsəmə ittihamı cinayət işi qaldırmağa əsas deyilmi?
“Həmin layihələrlə bağlı dövlət büdcəsindən ayrılan vəsaitlərin təyinatı üzrə xərclənməsi ilə əlaqədar ciddi şübhələr var”
Məsələyə münasibət bildirən ekspert Rəsul Cahangirlinin sözlərinə görə, mətbuatda bu cür ciddi ittiham varsa, ən azından, Baş Prokurorluq tərəfindən araşdırmalara start verilməlidir: “Çünki ölkədə korrupsiyaya qarşı ciddi mübarizə aparılır. Kimliyindən və vəzifəsindən asılı olamayaraq, hər kəs yol verdiyi pozuntulara görə cavab verməlidir. Baş prokuror mətbuatın bu məsələdə rolunu nəzərə alaraq, sözügedən şəxslə bağlı müvafiq ölçü götürə bilər. Məsələ ondadır ki, Əli Həsənov uzun illər “Qaçqınkom”a rəhbərlik edib. Bu müddət ərzində qaçqın və məcburi köçkünlərin mənzillə təmin edilməsi ilə əlaqədar olaraq bir sıra böyük layihələr həyata keçirilib. Sözügedən layihələrlə bağlı dövlət büdcəsindən ayrılan vəsaitlərin təyinatı üzrə xərclənməsi ilə əlaqədar ciddi şübhələr var. Bununla bağlı müxtəlif dövrlərdə bəzi iddialar səslənib. Məcburi köçkünlərin mənzillə təminatı məsələsində narazılıqlar baş verib və s. O baxımdan, mətbuatda Ə.Həsənovun 2 milyard manat vəsait mənimsədiyi haqda səslənən fikirlər Baş Prokurorluğa əsas verir ki, müvafiq ölçü götürsün. Bir daha qeyd edim ki, sözügedən qurumun şəffaf işləməsi ilə bağlı ictimaiyyətdə birmənalı fikir yoxdur”.
Ekspert hesab edir ki, bütün bunlar Ə.Həsənov barəsində ölçü götürməyə tam əsas verir.
Vidadi ORDAHALLI
