Paşinyan revanşistlərə sərt mövqe göstərir – “Naxçıvan dəhlizi biz ermənilərə də lazımdır...”

Vüqar Rəhimzadə: “Paşinyanı devirmək üçün belə cəfəng iddialar səsləndirirlər”

img

10 noyabr razılaşmasından sonra Ermənistanda revanşistlər, o cümlədən, bəzi erməni iqtisadçılar bəyan edirdilər ki, guya kommunikasiya xətlərinin açılması ölkəyə fayda gətirməyəcək. Onlar bu gün də iddia edirlər ki, nəqliyyat əlaqələrinin fəaliyyətə başlaması hansısa iqtisadi canlanma vəd etmir və s.

Ancaq Ermənistanın baş naziri Nikol Paşinyan rəqiblərini susdurmaq, revanşistlərin arqumentlərini zəiflətmək üçün yerli televiziya kanallarından birinə geniş müsahibə verib. Paşinyan müsahibəsində kommunikasiya xətlərinin açılması ilə bağlı məqamlara da toxunub. Bu kontekstdə Paşinyan 10 regional layihədən danışarkən kommunikasiya xətlərinin önəminə diqqəti cəlb edib: “Regional layihədə bütün dövlətlər, o cümlədən, Rusiya, Gürcüstan, İran, Türkiyə və Azərbaycan maraqlıdırlar. Bu, Ermənistanın da maraqlarına uyğundur. Kommunikasiya xətlərinin açılması bölgəyə sülh və inkişaf gətirəcək. Bunun Ermənistan iqtisadiyyatına da müsbət təsiri olacaq”. 

Paşinyan bu açıqlamasıyla rəqiblərinə mesaj göndərir ki, regional layihələrdə iştirak iqtisadi baxımdan Ermənistanın xeyrinədir. Bu isə o deməkdir ki, sözügedən məsələ ilə bağlı revanşistlərin arqumentləri əsassızdır.

  • “Ermənistanın nicat yolu bu dəhlizlərin açılmasından və Azərbaycana yönəlik ərazi iddialarından əl çəkməsindən keçir”

Məsələyə münasibət bildirən “İki Sahil” qəzetinin baş redaktoru Vüqar Rəhimzadənin sözlərinə görə, Ermənistanda sabitlik və iqtisadi inkişaf kommunikasiya xətlərinin bərpasından asılıdır: “Onlar bunu istəyirlərsə, o zaman 10 noyabr razılaşmasında əksini tapan şərtlərlə barışmalıdırlar. Yox, bununla razı olmasalar, o zaman bu ölkənin məhvi labüddür. Həm siyasi, həm də sosial-iqtisadi baxımdan ölkədə tənəzzül dərinləşəcək. Paşinyan nə qədər səriştəsiz dövlət xadimi olsa da, bütün bunların fərqindədir. Anlayır ki, ölkənin inkişafı nəqliyyat xətlərinin açılması ilə bu və ya digər dərəcədə sıx bağlıdır. Yoxsa, əmək qabiliyyətli əhali kütləvi şəkildə ölkəni tərk edəcək. Revanşistlərin məqsədi, nə yolla olur-olsun, hakimiyyətə gəlməkdir. Əslində, onlar da sözügedən nəqliyyat dəhlizlərinin əhəmiyyətini anlayırlar, sadəcə, Paşinyanı devirmək üçün belə cəfəng iddialar səsləndirirlər. Ermənistanın nicat yolu bu dəhlizlərin açılmasından və Azərbaycana yönəlik ərazi iddialarından əl çəkməsindən keçir. Digər tərəfdən, əminəm ki, Naxçıvan dəhlizi açılacaq. Çünki proseslər buna doğru gedir. 10 noyabr razılaşmasında əksini tapan bütün müddəalar reallaşacaq. O üzdən, mənim buna şübhəm yoxdur. Bir sözlə, Ermənistan tərəfi ölkənin inkişafını istəyirsə, o zaman Azərbaycanın irəli sürdüyü şərtləri qəbul etməlidir. Həmçinin, o şərtlər daxilində öz siyasətini qurmalıdır. Başqa bir tərəfdən, düşünmürəm ki, erməni cəmiyyətinin böyük hissəsi revanşistlərə stavka etsin. Onlar əvvəlki hakimiyyətlərin ölkənin başına nə oyun açdıqlarını yaxşı bilirlər. Ona görə ki, bütün bunlar yaxın tarixdə baş verib”.

Ekspert hesab edir ki, Ermənistan gedən proseslərdən nəticə çıxarmağa məhkumdur.

Vidadi ORDAHALLI

Son xəbərlər