Ermənistanın “Aysor.am” nəşri yazır ki, müharibə ölkənin 2021-ci il üçün nəzərdə tutulan dövlət büdcəsini dağıtdı. Qeyd edilir ki, hazırda Ermənistanda 2021-ci ilin büdcə proqnozları müzakirə edilir.
Diqqətçəkən məqam odur ki, hökumət bir çox sahəyə 2021-ci ildə ayrılacaq vəsaitin həcmini xeyli azaldıb. Məsələn, Təhsil, Elm, Mədəniyyət və İdman Nazirliyinin 2021-ci il büdcəsi üçün 2020-ci ilə nisbətən təxminən 2 milyon dram az vəsaitin ayrılması nəzərdə tutulub.
Məlumatda daha sonra deyilir ki, ölkə iqtisadiyyatını çətin günlər gözləyir: “Hökumət büdcənin kiçilməsini koronavirus pandemiyası ilə əlaqələndirib. Amma əsl səbəb müharibədən məğlub çıxan ölkə iqtisadiyyatının çökməsidir. Belə ki, beynəlxalq reytinq agentliyi “Fitch Ratings” Ermənistan iqtisadiyyatında defolt vəziyyətin yarandığını bildirib. Yəni ölkə iqtisadiyyatı çətin geridönüşü olan bir böhrana girib. Ona görə də hökumət 2021-ci il üçün dövlət büdcəsinin xərclər hissəsini azaltmaq məcburiyyətindədir”.
Göründüyü kim, müharibə Ermənistan iqtisadiyyatına elə böyük zərbə vurub ki, onlar gələnilki büdcələrini ixtisar etmək məcburiyyətində qalıblar.
“Bir sıra beynəlxalq qurumlar Ermənistana borc belə verməyəcək”
Məsələyə münsibət bildirən iqtisadiyyat üzrə fəlsəfə doktoru Firdovsi Şahbazovun sözlərinə görə, Ermənistanın Azərbaycana qarşı işğalçılıq siyasətinin mənfi təsirləri hələ bundan sonra sözügedən ölkənin iqtisadiyyatında özünü göstərəcək: “Düzdür, hazırda bu, Ermənistan iqtisadiyyatının bütün sahələrində özünü göstərir. Ancaq əsl problemlər gələn il özünü göstərəcək. Çünki Ermənistanın Azərbaycana qarşı həyata keçirdiyi işğalçı müharibənin təsirləri bu ölkənin iqtisadiyyatını çökdürüb. Artıq ölkədə vətəndaşlar həyatın bütün sahələrində müharibənin acısını hiss edirlər. Bu, getdikcə böyüyəcək və Ermənistanı fəlakətə sürükləyəcək. Məsələ ondadır ki, beynəlxalq qurumların açıqlamasına görə, Ermənistan iqtisadiyyatı sentyabr ayından bu yana ortalama olaraq 4 faiz həcmində azalma göstərib. Ermənistan Statistika Komitəsi də öz məlumatlarında 2020-ci ilin yanvar ayı ilə müqayisədə ortalama 5.7 faiz azalma göstərdiklərini açıqlayıb. Digər tərəfdən, Ermənistanın onsuz da aşağı olan kredit reytinqinin kəskin şəkildə enəcəyi gözlənir. Yəni bu isə o deməkdir ki, bir sıra beynəlxalq qurumlar Ermənistana borc belə verməyəcək. Bu isə Ermənistan iqtisadiyyatı üçün böyük fəlakət deməkdir. Zatən, Ermənistanın artan xarici borcu da bu ölkənin iqtisadiyyatının tənəzzülündə əsas rol oynayır. Ölkə iqtisadiyyatının ağır vəziyyətə düçar olması gündəlik tələbat və ərzaq məhsullarının bahalaşması ilə nəticələnib. Hesab edirəm ki, gələn il Ermənistan büdcəsində xərclərin ixtisarı proqnozlaşdırılan indiki rəqəmdən daha çox olacaq”.
Məlum oldu ki, Ermənistan iqtisadi baxımdan ciddi problemlərlə qarşılaşacaq.
Vidadi ORDAHALLI
