Bərdə-Ağdam dəmir yolunun Qarabağ bölgə infrastrukturunda əhəmiyyəti… Prezident niyə xüsusi diqqət yetirir…

Natiq Cəfərli: “Füzuli, Cəbrayıl və Zəngilanın bərpasında Bərdə-Ağdam dəmir yolu xətti mühüm rol oynayacaq”

img

Prezident İlham Əliyev Bərdə-Ağdam dəmir yolu xəttinin layihələndirilməsi və tikintisi ilə bağlı tədbirlər haqqında sərəncam imzalayıb. Sərəncam bu istiqamətdə aparılan işlərin davam etdirilməsi, işğaldan azad olunmuş ərazilərin bərpası və Ağdam rayonunun dayanıqlı sosial-iqtisadi inkişafının təmin edilməsi məqsədi daşıyır.

Sərəncamla ümumi uzunluğu 45,0 kilometr olan Bərdə-Ağdam dəmir yolu xəttinin layihələndirilməsi və tikintisi üçün Azərbaycan Respublikasının 2020-ci il dövlət büdcəsində nəzərdə tutulmuş Prezidentin ehtiyat fondundan “Azərbaycan Dəmir Yolları” Qapalı Səhmdar Cəmiyyətinə ilkin olaraq 5 milyon manat ayrılıb.

  • “Bərdə-Ağdam dəmir yolu xətti vasitəsilə Ağdam və digər rayonlarda geniş tikinti-bərpa və abadlıq-quruculuq işləri görüləcək”

Bərdə-Ağdam dəmir yolu xəttinin əhəmiyyəti haqqında danışan iqtisadçı-ekspert Natiq Cəfərli qeyd etdi ki, dəmir yolu ilə yüklərin daşınması iqtisadi baxımdan daha sərfəlidir: “Logistikanın ucuzlaşdırılması baxımından dəmir yolları şəbəkəsinin yaradılması və köhnə yolların yenidən işlək vəziyyətə gətirilməsinin ciddi əhəmiyyəti var. Nəzərə almaq lazımdır ki, dəmir yolu vasitəsilə Qarabağa 100 minlərlə ton yük daşınacaq. Logistik mərkəz kimi Ağdamın seçilməsi daha məqsədəuyğundur. İşğaldan azad edilmiş rayonların - Füzuli, Cəbrayıl və Zəngilanın bərpasında Ağdam istiqaməti mühüm rol oynayacaq. Dəmir yolunun bərpası həmin sahələrə yük daşınmasını həyata keçirəcək. Bərdə-Ağdam dəmir yolu xətti vasitəsilə Ağdam və digər rayonlarda geniş tikinti-bərpa və abadlıq-quruculuq işləri görüləcək”.

Həmsöhbətimiz onu da əlavə etdi ki, işğaldan azad olunmuş ərazilərimizdə infrastruktur bərpa olunmağa, abadlıq işləri görülməyə başlanıb.

Günel CƏLİLOVA

Son xəbərlər