İqtisadi müstəqillik olmasaydı, siyasi müstəqillik, onsuz isə Ağdam olmayacaqdı - Prezidentin yeni düsturu...

Elman Nəsirov: “Bizim bütün qələbələrimizin kökündə iqtisadi müstəqilliyimiz dayanır”

img

“Biz iqtisadi cəhətdən müstəqil olmasaydıq, biz siyasi müstəqillik əldə edə bilməzdik”. Prezident İlham Əliyev bu fikirləri işğaldan azad edilmiş Ağdam şəhərinə səfəri zamanı iqtisadi və siyasi müstəqilliyin əhəmiyyəti barədə danışarkən deyib:

 

“Bu gün biz iqtisadi cəhətdən heç kimdən asılı deyilik. Asılı olsaydıq, bizə təzyiqlər edilə bilərdi. Onsuz da edilmişdi, ancaq onların heç bir səmərəsi olmadı. Çünki bizə qarşı iqtisadi amildən istifadə etmək mənasızdır. Biz heç kimdən asılı deyilik, hansısa ölkədən, hansısa beynəlxalq maliyyə qurumundan asılı deyilik. Əksinə, biz özümüz indi donor ölkəyik, biz özümüz indi kreditlər veririk. Bizim kifayət qədər güclü iqtisadi potensialımız və maliyyə resurslarımız imkan verdi ki, iqtisadi müstəqilliyi tam təmin edək. Bu da qələbənin əldə edilməsində xüsusi rol oynayırdı. Çünki əgər biz iqtisadi cəhətdən müstəqil olmasaydıq, biz siyasi müstəqillik əldə edə bilməzdik. Siyasi müstəqillik olmadan torpaqlarımızı düşməndən azad edə bilməzdik. O düşməndən ki, onların arxasında böyük dövlətlər, o dövlətlərin çox nüfuzlu dairələri, erməni lobbi təşkilatları dayanır”, - deyə dövlət başçısı vurğulayıb”.

Prezident onu da qeyd edib ki, müasir silahları Azadlıq meydanında dəfələrlə keçirilmiş paradlarda nümayiş etdirirdik: “Biz ordumuzu inkişaf etdirərkən ən qabaqcıl meylləri nəzərdən keçirmişdik. Biz o silahları alırdıq ki, bu silahlar bizim üstünlüyümüzü təmin etsin və İkinci Qarabağ müharibəsi bunu göstərdi”.

Görünən odur ki, yuxarıda sadalanan faktorlar bir-birilə sıx bağlıdır. Onlardan biri olmasaydı, biz qarşıya qoyulan hədəflərə çata bilməzdik.

  • “Bu kontekstdə siyasi müstəqilliyimiz möhtəşəm və müstəsna rol oynayıb”

Məsələyə münasibət bildirən millət vəkili, politoloq Elman Nəsirovun sözlərinə görə, cənab Prezidentin səsləndirdiyi arqumentlər reallığı əks etdirir: “Həqiqətən də iqtisadi gücümüz bizim iqtisadi müstəqilliyimizi şərtləndirdi. İqtisadi müstəqilliyimiz isə siyasi müstəqilliyimizə gətirib çıxardı. Belə olmasaydı, o zaman biz torpaqlarımızı azad edə bilməzdik. O baxımdan ölkə başçısının bununla bağlı səsləndirdiyi fikirlərin böyük mənası var. İqtisadi müstəqillik ona gətirib çıxardı ki, bizim çox güclü, qalib və müzəffər  ordumuz formalaşıb. Özü də ordumuz ən müasir silahlarla təchiz edilib. Azərbaycanın əldə etdiyi silahlar həddən artıq bahadır. Onlar 5-ci nəsil silahlar hesab olunur. Bu cür silahları hər dövlət əldə edə bilməz. Çünki buna maddi imkanları çatmaz. Deməli, iqtisadi gücümüz və müstəqilliyimiz ona gətirib çıxardı ki, biz Rusiyadan, Türkiyədən, İsraildən, Ukraynadan, Belarusdan, Pakistandan və digər ölkələrdən şaxələndirmə prinsipi üzrə ən müasir silahlar əldə etdik. Prezident haqlı olaraq qeyd etdi ki, biz iqtisadi cəhətdən müstəqil olmasaydıq, ayrı-ayrı dövlətlərdən, böyük maliyyə qurumlarından asılı olsaydıq, onlar bizə bu imkanı verməzdilər. Yəni şərt qoyardılar ki, filan addımı atma, torpaqların azad edilməsi ilə bağlı hərbi əməliyyatlara başlamayın. O zaman biz onlardan asılı olduğumuz üçün, bunu etməli olardıq. Çünki maliyyə-iqtisadi asılılığı olan ölkə müstəqil addım ata bilməz. Ona görə də bizim iqtisadi müstəqilliyimiz, gücümüz ona gətirib çıxardı ki, heç bir dövlətdən, maliyyə qurumundan asılı olmadıq. Nəticədə qərarları özümüz qəbul etdik. O qərarlar ki, onlar bizim taleyimizi dəyişdi. Ona görə də bizim bütün qələbələrimizin kökündə iqtisadi müstəqilliyimiz dayanır. Bu kontekstdə siyasi müstəqilliyimiz möhtəşəm və müstəsna rol oynayıb”.

Millət vəkili hesab edir ki, bütün bunların fonunda Azərbaycan böyük uğura imza atdı.

Vidadi ORDAHALLI

Son xəbərlər