“Bir neçə il bundan əvvəl Minsk Qrupunun həmsədr ölkələrinin səfirləri bu məsciddə, burada olublar. Onlar iki dəfə faktaraşdırıcı missiyalar keçiriblər və mənə deyiblər ki, Ağdam məscidində olublar. Niyə məsələ qaldırmayıblar?” Bunu Prezident İlham Əliyev Ağdam məscidinin qarşısında çıxışı zamanı deyib.
Dövlət başçısı bildirib: “Biz UNESCO ilə çox sıx əməkdaşlıq edirik. Amma gəlib xristian məbədlərinə baş çəkmək istəsə, buraya gəlsin. Gəlsin və desin vəhşi erməni neyləyib burada. Bir də ki, bir neçə il bundan əvvəl Minsk Qrupunun həmsədr ölkələrinin səfirləri bu məsciddə, burada olublar. Onlar iki dəfə faktaraşdırıcı missiyalar keçiriblər və mənə deyiblər ki, Ağdam məscidində olublar. Niyə məsələ qaldırmayıblar? Niyə bu, bəzi Qərb liderlərində narahatlıq yaratmayıb? Deməli, müsəlman məscidlərini təhqir etmək olar, inək, donuz saxlamaq olar, dağıtmaq olar. Belədirsə, belə də desinlər və getsinlər öz ölkələrində problemlərlə məşğul olsunlar, bizim işimizə burunlarını soxmasınlar. Heç kim bizim işimizə qarışmasın. Biz özümüz gəlmişik buraya. Bütün o ölkələrin səylərinə rəğmən gəlmişik, bütün təxribatlara rəğmən gəlmişik, qan tökə-tökə gəlmişik və durmuşuq bizim torpağımızda. Hərə getsin öz işi ilə məşğul olsun. Bizim işimizə qarışmaq istəyənin cavabını vermişik və verəcəyik”.
“...insanlıq əleyhinə olan müharibə cinayətləridir”
“Səs” qəzeti və eyniadlı informasiya agentliyinin rəhbəri, politoloq Bəhruz Quliyev hesab edir ki, Minsk Qrupunun həmsədr ölkələrinin səfirlərinin Ağdam Cümə məscidində gördükləri dəhşətli mənzərəni beynəlxalq ictimaiyyətə çatdırmamasının, ümumiyyətlə, bu məsələni qaldırmamasının səbəbi onların bizə ikili yanaşma standartlarından irəli gəlir. “ATƏT-in Minsk Qrupunun həmsədrlərinin son davranışları bir daha göstərdi ki, onlar bitərəf ola bilməyiblər, buna görə də 28-30 il Qarabağ münaqişəsini dondurulmuş vəziyyətdə saxlayıblar. Cənab Prezident Ağdamda vurğuladığı kimi, ATƏT-in Minsk Qrupunun həmsədr ölkələrinin səfirləri Ağdam Cümə məscidində olsalar da, onlar iki dəfə faktaraşdırıcı missiyalar keçirsələr də, ermənilərin bizim dini abidələrimizə, bu məscidimizə qarşı həyata keçirdikləri vandalizm aktlarını bir dəfə də olsa ictimailəşdirməyiblər. Onlar açıq şəkildə görüblər ki, erməni vandalları nəinki Ağdamdakı Cümə məscidinə, eləcə də digər məscidlərimizə, qəbiristanlıqlarımıza qarşı da hörmətsizlik, vandalizm hərəkətləri törədiblər. Ancaq çox təəssüflər olsun ki, Minsk Qrupunun həmsədr ölkələrinin səfirləri ikili yanaşma sərgiləyərək gördükləri bu dəhşətli mənzərələrlə bağlı nə bir bəyanat səsləndiriblər, nə də erməni vandalizminin beynəlxalq ictimaiyyətə çatdırılması, monoetnik Ermənistanın qınaq obyektinə çevrilməsi üçün bir iş görüblər. Ağdam Cümə məscidində faktaraşdırıcı missiya həyata keçirən Minsk Qrupunun həmsədr ölkələrinin səfirləri Azərbaycana ikili standartlarla yanaşmasaydılar, onda onlar Azərbaycanın dini, tarixi, maddi-mədəni abidələrinin, maddi-mədəni irsinin erməni vandalizminə məruz qaldığını çoxdan beynəlxalq ictimaiyyətə çatdırmışdılar, Ermənistana qarşı gərəyi olan tədbirlər görmüşdülər. Beynəlxalq təşkilatlar, həmsədr ölkələrin səfirləri Ermənistana vaxtında irad bildirsəydilər, Azərbaycanın maddi-mədəni irsi, dini abidələri, məscidləri ermənilər tərəfindən vandalcasına dağıdılmazdı, məhv edilməzdi, sərvətimiz Ermənistana, oradan da dünyanın müxtəlif ölkələrinə daşınıb “erməni irsi” kimi qələmə verilməzdi. Ermənilər bütün beynəlxalq konvensiyaların tələblərini pozaraq abidələrimizə, məscidlərimizə qəsd ediblər. Bunu isə sözügedən missiya təmsilçiləri görsələr də, dilə gətirməyiblər, qeyd etməyiblər.
Bilirsiniz ki, elə tarixi abidələr var, onlar ancaq bir ölkənin deyil, bütün bəşəriyyətin irsi sayılır. Bu baxımdan dünya, müvafiq beynəlxalq təşkilatlar maddi-mədəni irsi qorumağa borcludurlar. BMT-nin təsisatı olan UNESCO ona görə yaradılıb ki, o, bütün ölkələrin, bütün xalqların maddi-mədəni irsini, dəyərlərini qorusun. UNESCO özü dəfələrlə bəyan edib ki, ümumdünya, yaxud yerli əhəmiyyətli abidələr qorunmalıdır”.
B.Quliyev qeyd etdi ki, dağıdıcılıq, yırtıcılıq, vəhşilik erməni toplumuna xas xüsusiyyətdir, bu onların xarakterindən irəli gəlir. Azərbaycan torpaqlarını tərk edərkən ermənilərin abidələrimizin qalan hissəsini də məhv etdiyini, evləri, meşələri yandırdığını deyən B.Quliyev bildirdi ki, bu da dünyanın, beynəlxalq təşkilatların gözləri qarşısında baş verir. “Ermənilərin törətdikləri bu cinayətlər bəşəriyyət əleyhinə, insanlıq əleyhinə olan müharibə cinayətləridir. Ermənilər bizim dəyərlərə qarşı hörmətsizlik, əxlaqa sığmayan hərəkətlər ediblər. Bu faktdır. Onlar bu gün də o davranışlarını davam etdirirlər. Çox təəssüflər olsun ki, keçmişdə də, indi də ermənilərin bu vandalizm davranışlarına beynəlxalq aləm tərəfindən heç bir qınaq göstərilmir, münasibət bildirilmir, onlara “dayan, dur” deyən yoxdur. Bu da onunla bağlıdır ki, hələ də dünya birliyi erməni vandalizminə göz yummaqda davam edir. Əlbəttə, burada beynəlxalq təşkilatların, ATƏT-in Minsk Qrupunun həmsədr ölkələrinin səfirlərinin susqunluğu şərait yaradır. Görürsünüz, Ermənistanda gərgin siyasi böhran yaşanır, Paşinyanın istefasını tələb edən hər kəs, o cümlədən də müxalifət partiyalarının rəhbərləri həbs edilir, onlara işgəncələr verilir, amma beynəlxalq təşkilatlar buna reaksiya vermir, Ermənistana qarşı hər hansı bir sanksiya tətbiq etmir, bəyanat yaymırlar. Onların ermənipərəst mövqeyi bütün məsələlərdə özünü göstərir” - deyə B.Quliyev bildirdi.
İradə SARIYEVA
