Afsəddin Nəbiyev: “Bunun, sadəcə, “erməni qüvvələri” kimi təqdim olunması o dövrün siyasi reallıqlarından irəli gəlir”
“BMT Təhlükəsizlik Şurasının 4 qətnaməsində Ermənistan işğalçı dövlət kimi göstərilmədi. Orada “erməni qüvvələri” yazılmışdı”. Bunu Prezident İlham Əliyev Ağdam məscidinin qarşısında çıxışı zamanı deyib.
Ölkə başçısının sözlərinə görə, biz münaqişənin həlli üçün lazımi hüquqi baza yaratmasaydıq, bu gün problemlərlə üzləşə bilərdik: “Biz beynəlxalq müstəvidə böyük işlər apardıq və mən öz çıxışlarımda xalqa bu barədə kifayət qədər məlumat vermişdim. Bu gün, müharibə başa çatandan sonra və hətta müharibə dövründə bütün dünya, bütün Azərbaycan xalqı gördü ki, bunun nə qədər böyük əhəmiyyəti var idi. Əgər biz münaqişənin həlli üçün lazımi hüquqi baza yaratmasaydıq, bu gün problemlərlə üzləşə bilərdik. Biz bütün beynəlxalq təşkilatlarda ədaləti, beynəlxalq hüququ tanıyan, əks etdirən qərar və qətnamələr qəbul etdirdik. BMT Təhlükəsizlik Şurasının 4 qətnaməsi 1993-cü ildə qəbul edilmişdir. Amma ondan sonra biz BMT Baş Assambleyasının qətnamələrini, İslam Əməkdaşlıq Təşkilatının qətnamələrini, Qoşulmama Hərəkatının, Avropa Parlamentinin, Avropa Şurası Parlament Assambleyasının qərar, qətnamələrini qəbul etdirərək, münaqişənin həlli üçün çox möhkəm hüquqi baza yaratdıq. 2003-cü ildən bu günə qədər bütün bu lazımi addımlar atıldı və biz siyasi müstəvidə qələbə qazandıq. Eyni zamanda, iki il bundan əvvəl Avropa İttifaqı ilə Azərbaycan arasında paraflanmış “Tərəfdaşlıq prioritetləri” sənədində də Azərbaycanın suverenliyi, ərazi bütövlüyü və sərhədlərimizin toxunulmazlığı haqqında açıq ifadələr var. Bu, bizim böyük uğurumuzdur. Çünki uzun illər ərzində biz buna nail ola bilməmişdik. Bəzi beynəlxalq təşkilatlar işğalçını öz adı ilə çağırmaq istəmirdilər. Bəzi beynəlxalq təşkilatlar işğalla bağlı qəbul edilmiş sənədlərdə işğalçının kim olduğunu göstərmək istəmirdilər. Hətta BMT Təhlükəsizlik Şurasının 4 qətnaməsində Ermənistan işğalçı dövlət kimi göstərilmədi. Orada “erməni qüvvələri” yazılmışdı”.
Maraqlıdır, sözügedən 4 qətnamədə BMT niyə konkret olaraq Ermənistanı təcavüzkar dövlət kimi tanımayıb? Niyə orada yalnız “erməni qüvvələri” sözü yazılıb?
- “28 il Azərbaycanın işğala məruz qalan torpaqları heç bir beynəlxalq təşkilatı, dövləti maraqlandırmırdı”
Sözügedən məsələyə aydınlıq gətirən AMİP-in sədr müavini Afsəddin Nəbiyev bununla bağlı bir sıra məqamlara toxundu: “Dağlıq Qarabağ münaqişəsinə dair Təhlükəsizlik Şurası tərəfindən qəbul edilən qətnamələrdə həqiqətən Ermənistan təcavüzkar tərəf kimi göstərilməyib. Məsələnin mahiyyəti ondan ibarətdir ki, bu qətnamələrdə Ermənistanın işğalçı dövlət kimi təqdim olunmaması müəyyən amillərlə bağlı olub. Bunun, sadəcə, “erməni qüvvələri” kimi təqdim olunması o dövrün siyasi reallıqlarından irəli gələn bir məsələdir. Əslində, qətnamələrdə açıq şəkildə göstərilməli idi ki, Ermənistan ordusu Azərbaycan ərazisini işğal edib, bu yolverilməzdir. Əgər işğal etdiyi ərazilərdən dərhal geri çəkilməsə, bu tarixdə Ermənistana qarşı sanksiyalar tətbiq olunacaq. Göründüyü kimi, 28 il Azərbaycanın işğala məruz qalan torpaqları heç bir beynəlxalq təşkilatı, dövləti maraqlandırmırdı. Bu gün beynəlxalq qurumlar Azərbaycan dövlətinə, ordusuna təşəkkür etməlidirlər ki, bu qətnamələr havada qalmadı. Beynəlxalq hüququ Azərbaycan Ordusu təmin etdi. Məhz buna görə Prezident İlham Əliyev çıxışında hətta BMT Təhlükəsizlik Şurasının qətnaməsi qəbul olunarkən işğalçı dövlətin ordusunun “erməni qüvvələri” kimi göstərilməsini tarixi ədalətsizlik kimi vurğuladı. Bu fakt elə o dövrlərdə də ermənilərin himayə altında olmalarını bir daha təsdiqləyir. Bir faktı da unutmaq olmaz ki, elə o dövrlərdə də qətnamələrin qəbul olunmasında Azərbaycana qardaş Türkiyə və Pakistan dövlətləri böyük dəstək olublar”.
Sədr müavini onu da qeyd etdi ki, xristian təəssübkeşliyinə görə qətnamələrdə Ermənistanın işğalçı dövlət əvəzinə, “erməni qüvvələri” kimi göstərilməsi acı bir reallığın təzahürüdür.
Vidadi ORDAHALLI
