Bakıdan Azərbaycan Dövlət Neft və Sənaye Universitetinin Elmi Şurasının universitetin 100 illiyi münasibətilə keçirilmiş iclasının iştirakçıları tərəfindən Prezident İlham Əliyevə müraciət ünvanlanıb:
“2020-ci il noyabrın 14-də Azərbaycan Dövlət Neft və Sənaye Universitetinin (ADNSU) Elmi Şurasının ölkəmizin ən qocaman və zəngin tədris ənənələrinə malik olan ali təhsil ocağımızın 100 illik yubileyi münasibətilə keçirilən iclası Sizin Azərbaycan xalqına sonsuz sevginizə, dəmir iradənizə, müzəffər sərkərdə və uzaqgörən dövlət xadimi kimi müstəsna qabiliyyətinizə söykənən rəşadətli Azərbaycan Silahlı Qüvvələrinin 30 ildir ki, işğal altında olan torpaqlarımızı azad etməsinin sevincini yaşadığımız günlərə təsadüf edir.
Azərbaycan Ordusunun sentyabrın 27-də Ermənistanın hərbi təxribatına cavab olaraq başladığı əks-hücum əməliyyatları elə ilk günlərdən uzun illərdən bəridir ki, doğma torpaq həsrəti ilə yaşayan xalqımızın səfərbər olub 10 milyonluq ordu kimi Sizin əmrinizi gözlədiyini bəyan etməsi ilə bütün işğal olunmuş torpaqlarımızın azad olunması uğrunda Vətən Müharibəsinə çevrildi.
Cəbhədən ard-arda gələn qələbə xəbərləri, kəndlərimizin, şəhərlərimizin işğaldan azad olunması xalqımıza son 30 ildə yaşaya bilmədiyi hissləri - qalibiyyət, doğma torpaqlara qovuşmaq kimi ülvi hissləri yaşatdı. Vətən Müharibəsinin ilk günlərindən özünün Prezidenti, müzəffər Ali Baş Komandanı ətrafında yumruq kimi sıx birləşmiş Azərbaycan xalqı özünün möhtəşəm birliyi ilə bütün dünyaya xalq-dövlət həmrəyliyinin ən möhtəşəm nümunəsini nümayiş etdirdi. Sözsüz ki, noyabrın 8-də Şuşanın işğaldan azad olunması Sizin rəhbərliyinizlə Ordumuzun və bütövükdə xalqımızın zəfər yürüşünün ən yüksək zirvəsi oldu.
Şuşanın işğaldan azad olunması Vətən Müharibəsinin taleyini həll edərək Azərbaycanın tam qələbəsini təmin etmişdi və buna görə də noyabrın 10-da Azərbaycan, Rusiya və Ermənistan arasında bəyanatın imzalanması faktiki olaraq Yerevanın kapitulyasiya aktına imza atması demək oldu. Ermənistan Azərbaycan Respublikasının Prezidenti, Ali Baş Komandan cənab İlham Əliyevin qətiyyəti və iradəsi qarşısında uzun illərin sülh danışıqları zamanı ona təklif olunandan daha ağır şərtlər daxilində təslim oldu.
Noyabrın 10-da imzalanmış tarixi sənəd Azərbycanın döyüş meydanındakı zəfər yürüşünü diplomtaik səviyyədə də qələbə ilə başa çatdırması demək idi.
Birgə bəyanatla Ermənistan öz üzərinə qoşunlarını 20 gün ərzində Ağdam, Kəlbəcər və Laçından çıxaracağına dair öhdəlik götürdü. Dağlıq Qarabağa hər hansı statusun verilməsindən söhbətin getməməsi, ərazi bütövlüyümüzün tam təmin olunması və nəhayət Naxçıvanın blokadadan azad olunması Azərbaycanın tam və qeyd-şərtsiz qələbəsinin əyani sübutu oldu.
Möhtərəm cənab Prezident, müzəffər Ali Baş Komandan, Azərbaycan torpaqlarının işğaldan azad olunması uğrunda Vətən Müharibəsi Sizin qətiyyətli rəhbərliyiniz altında bütün dünyaya Azərbaycan xalqının dəmir iradəsi və qələbə əzmini, rəhbəri ətrafında birləşmək bacarığını nümayiş etdirdi. ADNSU-nun sayı 20 mindən artıq olan tələbə və müəllim kollektivi də bu möhtəşəm birliyə, xalqımızın ümumi qələbəsinə töhfə verməsindən böyük qürur və fəxarət hissi duyur. Universitetimizin onlarla məzunu, tələbəsi, əməkdaşı qismən səfərbərlik çərçivəsində və könüllü surətdə döyüş əməliyyatlarında qəhrəmanlıqla iştirak edib, ADNSU dünyanın müxtəlif ölkələrindəki mindən artıq ali məktəb və elmi mərkəzlərə müraciət edərək Azərbaycanı haqlı davasında dəstəkləməyə səsləyib, tələbə və müəllimlərimizin hər biri informasiya müharibəsində Azərbaycanın əsgəri kimi çıxış ediblər.
İndi qarşıda bizi böyük işlər, azad edilmiş torpaqlarımızda quruculuq işləri gözləyir və ADNSU özünün istər tədris və elmi, istərsə də sənaye və iqtisadi layihələrdə yer alaraq özünün potensialını tam şəkildə bu istiqamətə yönəltmək üçün fəaliyyətə keçməyə hazırdır. Bu şanlı qələbə nəinki universitetimizi, bütövlükdə ölkəmizi həyatın müxtəlif sahələrində daha böyük nailiyyətlərə və uğurlara kökləyir və biz inanırıq ki, qarşıdakı illərdə Azərbaycan Respublikası özünü dünyada daha qüdrətli dövlət kimi təsdiqləyəcək.
100 illiyini qeyd edən ADNSU bir əsrlik tarixi ərzində son 44 gündə özünün ən sevincli, qürurlu günlərini yaşadı. Bu şanlı qələbə münasibətilə müzəffər Ali Baş Komandan kimi Sizi və bütün xalqımızı, Azərbaycan Silahlı Qüvvələrinin hər bir əsgər və zabitini təbrik edirik.
Eşq olsun Azərbaycan xalqına! Eşq olsun müzəffər Ali Baş Komandana! Eşq olsun müstəqil, suveren və bölünməz Azərbaycan Respublikasına!”
Baki-xeber.com
