“Məşhur” Xocalı qatilinin beynəlxalq axtarışa verilməsi genosidin tanıdılması yolunda mühüm addım kimi...

Faiq Ələkbərli: “Xocalı qatillərindən biri olan Seyran Ohanyan barədə cinayət işinin açılması və onun beynəlxalq axtarışa verilməsi çox mühüm addımdır”

img

1992-ci il fevral ayının 25-dən 26-na keçən gecə Azərbaycanın Xocalı şəhərində Ermənistanın terrorçu silahlı dəstələri tərəfindən xalqımıza qarşı genosid aktı həyata keçirilib, Xocalı soyqırımı baş verib. O qanlı, dəşhətli gecədə azərbaycanlılara qarşı soyqırım törədənlərdən biri də hərbi cinayətkar, faşist Ermənistanın keçmiş müdafiə naziri Seyran Ohanyandır. Azərbaycan artıq S.Ohanyan barəsində soyqırımı cinayəti üzrə axtarış elan edib.

Təqsirləndirilən şəxs barəsində Azərbaycan Cinayət Məcəlləsinin 103-cü (soyqırım) maddəsi ilə cinayət işi başlanıb.

Bakı Hərbi Məhkəməsində hakim Elbəyi Allahverdiyevin icraatında təqdimata baxılıb və təmin edilib. Məhkəmənin qərarı ilə S.Ohanyan barəsində qiyabi həbs-qətimkan tədbiri seçilib. Onun saxlanması üçün barəsində beynəlxalq axtarış elan edilib.

Qeyd edək ki, həmçinin, S.Ohanyanla bağlı cinayət işi Hərbi Prokurorluqda istintaq edilir.

Baş Prokurorluq Ermənistanın keçmiş müdafiə nazirinin axtarışa verilməsi barədə məlumat yayıb.

Baş Prokurorluqdan baki-xeber.com-a verilən məlumata görə, S.Ohanyanın axtarışa verilməsinə dair cinayət işi hazırda Respublika Hərbi Prokurorluğunda istintaq edilir.

Xocalı soyqırımını törədənlərdən biri olan Seyran Ohanyanın Azərbaycan tərəfindən beynəlxalq axtarışa verilməsi Xocalı soyqırımının dünyada tanıdılması yolunda mühüm bir addım kimi dəyərləndirilə bilərmi?

  • “Xocalı soyqırımının dünya dövlətləri, eləcə də beynəlxalq təşkilatlar tərəfindən tanınmasına nail ola biləcəyik”

Azərbaycan Milli Elmlər Akademiyasının (AMEA) Fəlsəfə və Sosiologiya İnstitutunun aparıcı elmi işçisi, tarix üzrə fəlsəfə doktoru, siyasi icmalçı Faiq Ələkbərli “Bakı-Xəbər”ə bildirdi ki, Azərbaycan Respublikasının prokurorluq orqanları, bütövlükdə, dövlətimiz tərəfindən Xocalı soyqırımının törədilməsində əli olan cinayətkarların, o cümlədən də Ohanyanın da cinayət məsuliyyətinə cəlb edilməsi ilə onun barəsində beynəlxalq  axtarışın verilməsi müsbət haldır. “Bütün hallarda, Azərbaycan cinayətkarları cəzasız qoymamalıdır. O cümlədən də Xocalıda əli azərbaycanıların qanına batan hərbi cinayətkar S.Ohanyan da cəzasız qalmamalıdır. Bilirsiniz ki, Azərbaycanın aidiyyəti qurumları bundan əvvəl də Azərbaycan xalqına qarşı soyqırım cinayətlərində əli olan cinayətkarlar barədə hüquqi prosedurun həyata keçirilməsinə başlanıb. Özünü qondarma “DQR”in “prezidenti” kimi qələmə verən cinayətkar Araik Arutunyan da Azərbaycan tərəfindən beynəlxalq axtarışa verilib. Mənə elə gəlir ki, Ohanyanla, digər hərbi cinayətkarlarla əlaqədar olan bu məsələ daim gündəmdə olmalıdır. Bilirik ki, vaxtilə Xocalı soyqırımı ilə bağlı komissiya yaradılmışdı, bir sıra qərarlar qəbul edilmişdi. Bu komissiyanın da fəaliyyətini yenidən canlandırmaq lazımdır ki, biz bütün cinayətkarları - Ohanyanı, Köçəryanı, Balayanı, Sarkisyanı və digərlərini cinayət məsuliyyətinə cəlb edək və törətdikləri soyqırım cinayətlərinə görə onları ağır şəkildə cəzalandıraq. Bu prosesi yenidən beynəlxalq aləmin diqqətinə çatdırmaqla bu cinayətkarların cəzalandırılmasına nail olmalıyıq. Bu gün Azərbaycan prokurorluq orqanları tərəfindən Xocalı qatillərindən biri olan Seyran Ohanyan barədə cinayət işinin açılması və onun beynəlxalq axtarışa verilməsi çox mühüm addımdır. Bizim Xocalı soyqırımını gündəmə gətirməyimiz həm hüquqi-siyasi, həm də mənəvi-psixoloji anlamda çox vacibdir. Biz bu faktı gündəmə gətirməklə Xocalı soyqırımını törədən canilərin kimliyini, onların törətdikləri bəşəriyyət, insanlıq əleyhinə cinayətləri beynəlxalq ictimaiyyətə çatdırmış oluruq. Bu istiqamətdə təbliğatımızı, fəaliyyətimizi daha da gücləndirməliyik, Ermənistan da, beynəlxalq ictimaiyyət də görsünlər ki, biz Xocalı qətliamını törədən hər bir cinayətkarın tutulub cəzalandırılmasında israrlıyıq və Xocalı soyqırımının dünya dövlətləri, beynəlxalq təşkilatlar tərəfindən tanınması üçün daim mübarizə aparacağıq. Biz bu məsələdə israrlıyıq”.

F.Ələkbərli qeyd etdi ki, Xocalı soyqırımının dünya dövlətləri və beynəlxalq təşkilatlar tərəfindən tanınmasında, əvvəlki dövrlərdə olduğu kimi, bu gün də qardaş Türkiyə prosesə qoşulmalıdır. “Biz bu məsələni daim gündəmdə saxlamalıyıq və ohanyanlar gec-tez bu cinayətlərə görə cəzalarını almalıdırlar. 44 günlük müharibədə Xocalı soyqırımını törədənlərdən bir çoxu cəzasını cəbhədə aldı, hərbçilərimiz tərəfindən öldürüldü. Qalanlar da hüquqi müstəvidə öz cəzalarını alacaqlar. Azərbaycan dövləti Türkiyə dövləti ilə əməkdaşlıq sayəsində bu məsələni daim gündəmdə saxlamalı və Xocalı soyqırımını törədənlərin başında duranlardan tutmuş, azərbaycanlıların qətliamında iştirak edən hər bir kəs cəzasını almalıdır. Bu prosesdə Azərbaycan ictimaiyyəti də aktiv olmalıdır. Biz bu addımları davam etdirməklə, gec-tez, həm bütün Xocalı qatillərinin cəzasını almasına və Xocalı soyqırımının dünya dövlətləri, eləcə də beynəlxalq təşkilatlar tərəfindən tanınmasına nail ola biləcəyik”.

F.Ələkbərli, həmçinin, vurğuladı ki, bütün bunlarla yanaşı, Ermənistana qarşı təzminat iddiası da qaldıracağıq və törətdiyi cinayətlərə görə düşmən dövlətdən təzminat alacağıq.

İradə SARIYEVA

Son xəbərlər