Azad torpaqlarımızda misilsiz erməni cinayətləri barədə ilk rəsmi mötəbər xəbər qaynağı Prezident özüdür - informasiya müharibəsində yeni tutarlı üsul...

Rasim Quliyev: “Əlbəttə, bu faktların Azərbaycan Prezidenti tərəfindən səsləndirilməsinin strateji əhəmiyyəti böyükdür”

img

Düşmən tapdağından azad olunan rayon və şəhərlərə şəxsən Prezident İlham Əliyev və Birinci xanım Mehriban Əliyeva gedirlər. Prezident və birinci xanım Füzulidən, Cəbrayıldan sonra Ağdama səfər etdilər.

Bundan sonra işğaldan azad edilən Kəlbəcərə və digər rayonlara  gedəcəklər. Bu səfərlərdə rayonlara ermənilərin vurduğu zərbənin izləri barədə ilk rəsmi məlumatları Prezident şəxsən özü verir. İlk məlumatları onun özü verdiyi üçün bunların mötəbərliyinə heç kim şubhə edə bilməz və bu faktor dağıntılar ətrafında ermənilərin cürbəcür manevrlərinin qarşısını alır. Yəni ermənilər heç nəyi saxtalaşdıra bilmızlər. Dünya görür ki, ən mötəbər məlumatları Prezident özü yayır.

Dağıntılar barədə ilk rəsmi mötəbər məlumatların məhz Prezident tərəfindən dünyaya bəyan edilməsinin strateji əhəmiyyəti nədir?

  • “Bütün beynəlxalq təşkilatlar, ekspertlər, müşahidəçilər cənab Prezidentin özünün şəxsən təqdim etdiyi bu faktların şahidi olurlar”

“Resurs” Analitik İnformasiya Mərkəzinin rəhbəri, politoloq Rasim Quliyev “Bakı-Xəbər”ə bildirdi ki, ölkə başçısının informasiya müharibəsində açdığı yeni yol Ermənistanın bütün cinayətlərinin beynəlxalq ictimaiyyət qarşısında ifşa edilməsidir. “Əvala Prezident müharibə dövründə qətiyyətlə tələb etdi ki, Paşinyan özü şəxsən qrafik versin, Ermənistan qoşunlarını Azərbaycan torpaqlarından nə zaman çıxaracaq, biz onda müharibəni dayandıracağıq. Bu fikrin arxasında duran o siyasi gediş, siyasi uğur və siyasi strategiya ona hesablanmışdı ki, Ermənistan rəhbərliyi öz imzası ilə işğal etdiyi ərazilərdəki qoşununu geri çağırır, buna razılaşır və konkret qrafik verir. Bu baş verdi, Paşinyan öz imzası ilə Ermənistanın işğalçı olduğunu və özünün işğalçı hərbi birləşməsinin Azərbaycan ərazisindən çıxarılmasını təsdiqlədi. Üçtərəfli bəyanat hüquqi sənəddir və bu sənədi digər tərəfdən də həm Ermənistanın qarantı, həm regionda güclü, nüfuzlu dövlət, həm də Minsk Qrupunun həmsədr ölkələrindən biri kimi Rusiyanın təsdiq etməsi Ermənistanın işğalçılığının təsdiqi idi. Bu, Azərbaycanın növbəti hüquqi prosedurları başlatması üçün çox vacib idi. Belə də oldu. Bu həm Rusiya Prezidentinin şahidliyi ilə Ermənistanın imzaladığı təslimçilik sənədidir, həm də işğal faktorunun rəsmiləşdirilməsidir və bu, Azərbaycanın növbəti hüquqi prosedurları üçün çox ciddi bir faktdır, rəsmi sənəddir. Yəni Azərbaycan Ermənistan tərəfini bu faktlar əsasında beynəlxalq məhkəməyə verdikdə bu, çox ciddi hüquqi rəsmi sənəddir” - deyə müsahibimiz bildirdi.

R.Quliyev, həmçinin, vurğuladı ki, ikinci tərəfdən, bu, Ermənistanın 30 ilə yaxın bir müddətdə işğal altında saxladığı Azərbaycan ərazilərində, bütün rayon və kəndlərində çox amansızlıqla, vandalcasına dağıntılar həyata keçirməsinin sübutudur: “Ermənistanın işğalından azad edilən ərazilərimizə baxanda adam dəhşətə gəlir. Düşmən hər yeri darmadağın edib, bununla kifayətlənməyərək daşları da söküb aparıblar.

Cənab Prezident və Birinci xanım işğaldan azad edilən rayonlarımıza səfər edirlər. Ermənistanın Azərbaycan ərazilərində həyata keçirdiyi vandalizm, faşizm aktları, dağıntlar haqqında şəxsən cənab Prezidentin özü tərəfindən daxili və beynəlxalq ictimaiyyətə, aidiyyəti ekspertlərə məlumatın təqdim edilməsinin əhəmiyyəti və təsir gücü böyükdür. Prezident tərəfindən verilən bu məlumat artıq rəsmi təqdimatdır. Digər tərəfdən, erməni vandalizmi Azərbaycanın birinci şəxsi, Ali Baş Komandanı, lideri tərəfindən rəsmi şəkildə bütün beynəlxalq ictimaiyyətə çatdırılır. Əlbəttə, bu faktların Azərbaycan Prezidenti tərəfindən səsləndirilməsinin strateji əhəmiyyəti böyükdür. Bütün beynəlxalq təşkilatlar, ekspertlər, müşahidəçilər cənab Prezidentin özünün şəxsən təqdim etdiyi bu faktların şahidi olurlar. Prezidentin dilindən çıxan hər bir kəlmə, hər bir sözün səhihliyi, dəqiqliyi beynəlxalq ictimaiyyətə Ermənistanın Azərbaycan ərazilərində törətdiyi cinayətlərlə bağlı verilən rəsmi informasiyadır.

Bölgədə Rusiyanın beynəlxalq sülhyaratma missiyası var. Eyni zamanda da Azərbaycanda akkreditasiya olunan beynəlxalq təşkilatların, xarici diplomatik korpusların, hərbi attaşelərin, həmçinin də beynəlxalq KİV qurumlarının təmsilçilərinin işğaldan azad olunan Füzuli rayonuna səfərinin təşkil edilməsi faktı da çox əhəmiyyətlidir. Cənab Prezidentin tapşırığına əsasən, bu missiya işğaldan azad edilən rayonlarımızda oldu. Burada məqsəd erməni vandalizminin beynəlxalq ictimaiyyətə tam şəkildə təqdim edilməsidir. Söz yox ki, bu istiqamətdə növbəti addım beynəlxalq qurumların rəsmi olaraq nümayəndələrinin işğaldan azad edilən ərazilərimizə dəvət edilməsi və onların bu faktlar üzrə qiymətləndirmələrinin həyata keçirilməsi olacaq. Bununla da Azərbaycan Ermənistanı həm bu dağıntılara, həm işğal faktına, həm 30 il müddətində ölkəmizə vurduğu iqtisadi zərərə, həm də hərbi cinayətlərə görə beynəlxalq məhkəməyə verəcək. Təbii ki, bizim Ermənistandan çox ciddi təzminat tələbimiz olacaq. Düşünürəm ki, məğlub olan Ermənistanın törətdiyi cinayətlərlə, dinc, mülki əhalimizi qadağan olunmuş silahlardan atəşə tutub qətlə yetirməsi ilə bağlı bütün faktlar beynəlxalq təşkilatlara, aləmə çatdırılıb”.

R.Quliyev qeyd etdi ki, Ermənistanın beynəlxalq aləm qarşısında Azərbaycana və digər ölkələrə qarşı əsassız ərazi iddiaları irəli sürdüyünə və bu ölkənin hərbi doktrinasında Azərbaycan və Türkiyə ərazilərininə qarşı hədəflərinin təsdiq edildiyinə görə Azərbaycan tərəfi Ermənistanı məhkəməyə verərkən bu məsələni qoymalıdır: “Ermənistanın hərbi doktrinasında və siyasi hədəfində bizim ərazilərimizə qarşı əsassız iddialar olduğuna və bu fakt təsdiqləndiyinə görə Ermənistana ordu saxlamaq qadağan olunmalıdır. Bizim ixtiyarımız var ki, beynəlxalq məhkəmə qarşısında bu faktları təqdim etməklə Ermənistana ordu saxlamasının ya məhdudlaşdırılmasını, ya da ordu saxlamasının qadağan edilməsini tələb edək. Çünki Ermənistanın hərbi doktrinasının, ordusunun əsasını işğalçılıq təşkil etdiyinə görə bu ölkə həm bu əməli fakt olaraq həyata keçirib, həm də siyasi cəhətdən bəyanatlar səsləndirib. Buna görə də Azərbaycan qonşuluğunda olan bu ölkənin ordu saxlamasının qadağan edilməsi ilə bağlı beynəlxalq məhkəməyə müraciət etməlidir. Hesab edirəm ki, Azərbaycan dövləti olaraq bu addımı atmalıyıq”.

İradə SARIYEVA

Son xəbərlər