Prezidentin köməkçisi, Prezident Administrasiyasının Xarici siyasət məsələləri şöbəsinin müdiri Hikmət Hacıyev ölkəmizin Rusiyadakı səfiri Polad Bülbüloğlunun verdiyi və rezonansa səbəb olan açıqlamasına münasibət bildirib.
Onun sözlərinə görə, Rusiya Federasiyası Silahlı Qüvvələrinə məxsus helikopterlə əlaqədar baş vermiş faciəvi hadisə ilə bağlı noyabrın 9-da Azərbaycan Prezidenti İlham Əliyev və Rusiya Prezidenti Vladimir Putin arasında telefon danışığı olub: “Həmin gün Azərbaycan Respublikasının Xarici İşlər Nazirliyi müvafiq açıqlama ilə çıxış edib. Azərbaycan Respublikasının Baş Prokurorluğu tərəfindən bu təsadüfi faciə ilə əlaqədar cinayət işi açılıb. Azərbaycanın və Rusiyanın Baş prokurorları arasında istintaqın gedişi ilə əlaqədar telefon danışığı olub. İstintaqın gedişi ilə bağlı qarşılıqlı məlumat mübadiləsi həyata keçirilir. Azərbaycan Respublikasının Rusiya Federasiyasındakı səfirinin bu məsələ ilə bağlı verdiyi şərh yersizdir. Bu kimi hal Azərbaycan-Rusiya əlaqələrinə xələl gətirə bilməz".
Prezidentin köməkçisi deyib ki, məsələnin mahiyyətinə varmadan Azərbaycanın Rusiyadakı səfirinin Azərbaycanın Dağlıq Qarabağ bölgəsinin statusu ilə bağlı söylədikləri qəbuledilməzdir: “Azərbaycanın xaricdəki diplomatik nümayəndəliklərinin rəhbərləri və digər rəsmi şəxsləri ölkənin rəsmi mövqeyinə və Prezident İlham Əliyevin yürütdüyü siyasətə zidd olan özbaşına açıqlamaların verilməsindən çəkinməlidirlər”.
Qeyd edək ki, Azərbaycanın Rusiyadakı səfiri Polad Bülbüloğlu açıqlamasında bildirib ki, Qarabağdakı ermənilərə mədəni muxtariyyət verilə bilər: “Bu, orada yaşayan erməni əhalisi üçün mədəni muxtariyyət ola bilər”.
Səfirin bu yöndəki açıqlamasını necə qiymətləndirmək olar?
Politoloq Rəşad Bayramov qəzetimizə bildirdi ki, səfirin bu açıqlaması milli maraqlarımıza ziddir: “Əgər bir deputat verdiyi səhv açıqlamaya görə töhmət alırsa, Polad Bülbüloğlu barəsində indiyə qədər tədbirin görülməməsi bizi təəccübləndirir. Vəziyyətin belə gərgin dönəmində Rusiya kimi ölkədə səfir olan bir adamın belə məsuliyyətsiz açıqlama verməsində hansı maraq ola bilər? Çox maraqlıdır ki, Polad Bülbüloğlunun özü də əslən Şuşalıdır. Özü dəfələrlə açıqlamalarında deyib ki, onun ata evini Şuşada dağıdıblar. Belə reallıqları dərk edən adam niyə ermənilərə muxtariyyət istəsin? Bundan əlavə, Polad Bülbüloğlu diplomatdır. Onun borcudur ki, prosesləri yaxından izləsin. Azərbaycanın son mövqeyini dəfələrlə Prezident ifadə edib və deyib ki, heç bir statusdan söhbət gedə bilməz. Prezidentin köməkçisinin açıqlamasından da görünür ki, Polad Bülbüloğlunun fikirləri qətiyyən rəsmi mövqeni əks etdirmir. Onda bu özfəaliyyət nəyə lazımdır? Erməni mediasını izləsəniz görərsiniz ki, onlar səfirimizin açıqlamasını necə həvəslə tirajlayırlar. Səfirlikdən əlavə, Polad bəy həm də tanınmış sənətçidir. Bu populiyarlığın fonunda da o, dediklərinin məsuliyyətini ikiqat anlamalıdır. Hesab edirəm ki, məhz bu cür məsuliyyətsiz açıqlamaya görə Polad Bülbüloğlu səfir vəzifəsindən geri çağırılmalıdır. Müharibəni Azərbaycan əsgəri qələbə ilə bitiribsə, diplomatların da vəzifəsi odur ki, həmin qələbəni rəsmiləşdirməyi, dünyaya düzgün formada çatdırmağı təmin etsinlər. Təəssüf ki, Polad Bülbüloğlunun fəaliyyətində biz buna əks olan elementləri görürük. Ermənilərə heç bir status və muxtariyyətin verilməsindən söhbət gedə bilməz. Bunu ölkə başçısının özü də dəfələrlə bəyan edibsə, artıq söhbətlərə yer olmamalıdır”.
Müsahibimiz onu da bildirdi ki, Elmar Məmmədyarovdan miras qalan diplomatik korpusun işində olan zəifliklər yalnız bununla bitmir.
Məhəmmədəli QƏRİBLİ
