Məlum olduğu kimi, Rusiya Prezidenti Vladimir Putin Dağlıq Qarabağda sülhün dəstəklənməsi ilə bağlı tədbirlər haqqında fərman imzalayıb.
Fərmanda qeyd edilir ki, Rusiya Prezidenti ildə iki dəfədən az olmayaraq, Dağlıq Qarabağdakı sülhməramlıların rotasiyasının keçirilməsi ilə bağlı Müdafiə Nazirliyinə tapşırıq verib: “Rusiya Federasiyası Müdafiə Nazirliyi sülhməramlı kontingent heyətini ildə ən azı iki dəfə dəyişdirməli, resurs inkişaf etdikcə və texniki cəhətdən zərurət yarandıqca, hərbi texnika yenilənməlidir”.
Qeyd edək ki, noyabrın 10-na keçən gecə Rusiya və Azərbaycan prezidentləri Ermənistanın hökumət başçısı Nikol Paşinyanla Dağlıq Qarabağda hərbi əməliyyatların dayandırılması ilə bağlı birgə bəyanat imzalayıblar. Bəyanata görə, bir sıra bölgələr Azərbaycanın nəzarətinə keçir, tərəflər əsir mübadiləsi aparır. Sülhməramlı kontingent Dağlıq Qarabağ münaqişəsi zonasında, təmas xətti və Laçın dəhlizi boyunca yerləşdiriləcək.
Bütün bunların fonunda, Putinin bu əmri nələri dəyişəcək? Bunun əhəmiyyəti nə olacaq? Ekspertlər bunu necə dəyərləndirirlər?
“Sülhməramlılar tərəfsizliyini qorumaq üçün hər iki tərəfdən...”
Məsələyə münasibət bildirən hərbi ekspert İbrahim Rüstəmlinin sözlərinə görə, Putinin belə bir fərman verməsi tam normaldır və ümumi işin xeyrinə olacaq: “Ümumən, Rusiya sülhməramlılarının Qarabağda yerləşməsini Cənubi Qafqazda geosiyasi hadisələr baxımından müsbət dəyərləndirirəm. Nəzərə almaq lazımdır ki, Rusiya Azərbaycanın yaxın qonşusudur və fövqəldövlət statusuna malikdir. Azərbaycan bu ölkə ilə çoxşaxəli əlaqələr qurub. Azərbaycana ən böyük silah ixrac edən ölkə Rusiyadır. Ona görə də bu ölkə ilə münasibətlərimiz strateji əhəmiyyət daşıyır. Biz Ruiya ilə olan münasibətləri Türkiyə ilə olan münasibətlərimiz qədər strateji səviyyəyə qaldırmalıyıq. Elə etməliyik ki, Rusiyanın da gələcəkdə bizə olan münasibəti o cür olsun. Putinin fərmanında sülhməramlı kontingentlə bağlı məsələlər öz əksini tapıb. Bu da tamamilə normal bir şeydir. Yəni buna təbii yanaşmaq lazımdır. Çünki kontingentin müəyyən vaxtdan bir dəyişdirilməsi çox normal bir şeydir. Söhbət ondan gedir ki, sülhməramlı kontingent xidmət apararkən onların yerli əhali ilə münasibətləri məsələsi gündəmə gəlir. Məsələ ondadır ki, sülhməramlılar tərəfsizliyini qorumaq üçün hər iki tərəfdən olan əhali ilə münasibət qurmaqdan çəkinməlidir. Əsas məqsəd odur ki, Rusiya sülhməramlıları tərəf kimi çıxış etməsinlər. Yəni Azərbaycanın və Ermənistanın tərəfində çıxış etməsinlər. Bu məqsədlə onlar müvafiq vaxtda dəyişdirilir. Çünki bu, təhlükəsizlik baxımından çox önəmli məqamdır. Digər tərəfdən, adətən, sülhməramlı əməliyyatlarda iştirak edən kontingentin hərbi texnikası bəlli müddətdən sonra dəyişdirilir. Bu, bütün dünyada belədir. Əsas məqsəd odur ki, Rusiya öz sülhməramlılarını neytral vəziyyətdə saxlaya bilsin. Yəni sülhməramlılar tərəf kimi çıxış etməsinlər”.
Hərbi ekspert onu da qeyd etdi ki, bütün bunların hamısı etibarlı təhlükəsizliyə xidmət edir.
Vidadi ORDAHALLI
