44 günlük Vətən Müharibəsində qardaş Türkiyəni yanımızda gördük, qardaş dəstəyi bizə böyük güc, stimul verdi ki, düşmənə öldürücü zərbə vurub onu diz çökdürə bilək. Bu baş verdi.
Türkiyənin Vətən Müharibəsində Azərbaycana verdiyi möhtəşəm dəstəyi Prezident İlham Əliyev çox yüksək qiymətləndirib. Prezident İlham Əliyev noyabrın 10-da Türkiyənin Xarici İşlər naziri Mövlud Çavuşoğlunu, Milli Müdafiə naziri Hulusi Akarı və Milli Kəşfiyyat İdarəsinin rəisi Hakan Fidanı qəbul edərkən “Bu gün səhər əziz qardaşım, cənab Prezident Rəcəb Tayyib Ərdoğanla telefonla danışdıq, söhbət etdik, bu böyük qələbə münasibətilə bir-birimizi təbrik etdik. Eyni zamanda, gələcək işlər haqqında fikir mübadiləsi aparıldı. Əziz qardaşıma və bütün Türkiyə xalqına bu dəstəyə, həmrəyliyə görə öz adımdan, bütün Azərbaycan xalqı adından bir daha dərin təşəkkürümü bildirdim”- deyə söyləyib.
Prezident, həmçinin, qeyd edib: “Bütün bu 44 gün ərzində qardaş Türkiyənin dəstəyini biz hər an hiss edirdik, bütün Azərbaycan xalqı hiss edirdi. Dünən artıq bəyanatın imzalanmasından sonra Türkiyə televiziyalarında müşahidə olunan mənzərə çox ürəkaçan idi. Yəni bizim türk qardaşlarımız bu qələbəyə öz qələbələri kimi sevinirdilər. Onsuz da bu, belədir. Bu, bizim müştərək qələbəmizdir, Türkiyə-Azərbaycan birliyinin təsdiqidir. Bu gün bu birlik tarixdə bəlkə də ən yüksək səviyyədədir”.
Azərbaycan Prezidenti qeyd edib ki, bütün bu günlər ərzində Türkiyənin vəzifəli şəxsləri, Məclis üzvləri, nazirlər, ictimai fəallar, mətbuat, geniş ictimaiyyət, bizim bütün qardaşlarımız bizə çox böyük dəstək oldular. “Bu, bizə əlavə güc verdi, ruh yüksəkliyimizi daha da artırdı. Biz bu gün, əlbəttə, çox xoşbəxtik ki, nəhayət, 30 ildən sonra öz dədə-baba torpaqlarımızı işğaldan azad etdik”, - deyə Prezident İlham Əliyev vurğulayıb.
“Bu, əslində, Türkiyənin Azərbaycan, Azərbaycanın isə Türkiyə olması deməkdir”
Prezident İlham Əliyevin “Bu, bizim müştərək qələbəmizdir, Türkiyə-Azərbaycan birliyinin təsdiqidir” bəyanatını şərh edən Azərbaycan Milli Elmlər Akademiyasının (AMEA) Fəsləfə və Sosiologiya İnstitutunun aparıcı elmi işçisi, tarix üzrə fəlsəfə doktoru, siyasi şərhçi Faiq Ələkbərli “Bakı-Xəbər”ə bildirdi ki, doğrudan da bu qələbəni qardaş Türkiyə ilə birgə qazanmışıq. “Təbii ki, 27 sentyabrdan Azərbaycan Ordusunun əks-hücumu ilə başlayan Vətən Müharibəsi – Qurtuluş savaşı yalnız Azərbaycan xalqının tarixində deyil, bütün Türk dünyasının tarixində mühüm yer tutacaq. Baş verən hadisələr bir daha göstərdi ki, doğrudan da Azərbaycanın birmənalı şəkildə qardaşı, ona bütün mənalarda ən yaxın ölkə Türkiyədir. Yəni tək millət, iki dövlət olmağımız məhz 44 günlük Vətən Müharibəsində bir daha sübut olundu. İstər Türkiyə Prezidenti Rəcəb Tayib Ərdoğan, istər Xarici İşlər naziri Mövlud Çavuşoğlu, Milli Müdafiə naziri Hülusi Akar, eləcə də Türkiyə Böyük Millət Məclisinin rəhbəri Mustafa Şəntop, bir sözlə, qardaş ölkənin ən üstün qurumlarından tutmuş, sadə vətəndaşlarına qədər hər kəs Qurtuluş savaşında Azərbaycanın yanında yer aldılar, ölkəmizə hər cür mənəvi dəstək göstərdilər. Şübhəsiz ki, burada mənəvi dəstəklə yanaşı, Azərbaycan Ordusunun hərbi texnikasının yenilənməsində də, müasir hərbi texnika ilə təchiz olunmasında da İsraillə, Rusiya və digər ölkələrlə yanaşı, Türkiyə də mühüm rol oynadı. Xüsusən də Türkiyənin ən son model İHA-ları və SİHA-ları 44 günlük Vətən Müharibəsində bizim uğur əldə etməyimiz üçün çox-çox vacib idi. Bu anlamda Azərbaycanın dövlət başçısı İlham Əliyevin Türkiyə haqqında söylədiyi hər bir fikrinə, hər bir bəyanatına qatılmamaq mümkün deyil. Azərbaycan Prezidentinin “Bu, bizim müştərək qələbəmizdir, Türkiyə-Azərbaycan birliyinin təsdiqidir” bəyanatı minillərdən bəri gələn tarixi birliyimizin ifadəsidir. Minillərdir biz Türkiyə ilə bir olmuşuq, yəni bu birliyimiz bu günün işi deyil. Əslində, biz tarixən elə bir çox dövləti də bir yerdə qurmuşuq. Deyək ki, Anadoluda ayrıca bir dövlət - Osmanlı imperiyası quruldu, Azərbaycanda da bir çox dövlət – Ağqoyunlular, Qaraqoyunlular, Səfəvilər, Əfşarlar, Qacarlar, 1918-ci ildə Azərbaycan Xalq Cümhuriyyəti yaradıldı. 1923-cü ildə də Türkiyə Cümhuriyyəti quruldu. Türkiyə Cümhuriyyətini, Azərbaycan Xalq Cümhuriyyətini quranlar da yenə də eyni qanın, eyni millətin, eyni ruhun, eyni dinin daşıyıcılarıdır. Bu anlamda bizim birliyimiz yüz il bundan əvvəl Çanakkala savaşında, eləcə də 1918-ci ildə Osmanlı dövlətinin Nuru Paşanın rəhbərliyilə Bakını daşnak-bolşevik birləşmələrindən xilas edilməsi hadisəsində, onların davamı olaraq 44 günlük Vətən Müharibəsində də özünü tam olaraq ortaya qoydu.
1991-ci ildə Azərbaycan Respublikası öz müstəqilliyini bərpa etdikdən sonra Türkiyə-Azərbaycan birliyi yeni mərhələyə qədəm qoydu. 44 günlük Vətən Müharibəsində də Türkiyə birmənalı şəkildə Azərbaycanın yanında oldu. Bu, əslində, Türkiyənin Azərbaycan, Azərbaycanın isə Türkiyə olması deməkdir. Bəlkə də dünyada Azərbaycan-Türkiyə birliyi kimi ikinci bir örnək, qardaşlıq nümunəsi yoxdur. Bu tək millət olmağımızın bir ifadəsidir”.
F.Ələkbərlinin sözlərinə görə, bu birliyimizin daha da irəli daşınması, inkişaf etdirilməsi, ümumiyyətlə, Türkiyə və Azərbaycan arasında münasibətlərin daha da gücləndirilməsi üçün yeni addımlar atılmalı, daha üst səviyyədə müqavilələr bağlanmalıdır ki, təkcə Azərbaycan-Türkiyə birliyini deyil, eyni zamanda da başqa türk dövlətlərini də bu birlik gücləndirsin. “Hesab edirəm ki, Orta Asiyadakı türk dövlətlərinin də, digər türk xalqlarının da məhz Türkiyə-Azərbaycan birliyi ətrafında birləşməsi və güclənməsi üçün çox ciddi bir zəmin yaranıb. Dövlət başçımız BBC-yə müsahibəsində də dedi ki, Ermənistanla Rusiya arasında ən üst səviyyədə bir hərbi müqavilə var, eyni şəkildə belə bir müqavilə Türkiyə ilə Azərbaycan arasında da var. Əslində, bu müqavilənin üstündə bir az da işləyib onu daha irəliyə aparmaq lazımdır ki, Azərbaycanla Türkiyə arasında hərbi birlik daha da güclənsin. Buna ciddi zərurət var. Bütün hallarda, Azərbaycan cəbhədə böyük uğur əldə edib” - deyə F.Ələkbərli qeyd etdi.
İradə SARIYEVA
