Bildiyimiz kimi, Azərbaycan Ordusu Ermənistanın hərbi təxribatına cavab olaraq əks-hücum əməliyyatı həyata keçirib. Azərbaycan Ordusunun qoşun bölmələrinin həyata keçirdiyi əməliyyatlar nəticəsində işğal altındakı bir sıra kəndlər və əlverişli ərazilər azad olunub.
Füzuli-Cərbayıl istiqamətində Qaraxanbəyli, Qərvənd, Kənd Horadiz, Yuxarı Abdurrəhmanlı, Aşağı Əbdürrəhmanlı, Böyük Mərcanlı, Nüzgar kəndləri azad edilib. Bundan əlavə, Ağdərə rayonu və Murovdağ istiqamətlərində düşmən postları darmadağın edilib, hakim yüksəkliklər nəzarətə götürülüb.
Ermənistanın hərbi təxribatı onun özünü çıxılmaz vəziyyətə salıb, ordumuzun həyata keçirdiyi əks-hücumlar nəticəsində düşmənin gücsüzlüyü, zəifliyi bir daha tam ortaya çıxıb. Düşmən ordusunun zəifliyi özünü saysız istiqamətdə büruzə verdi. Ermənistan ordusundakı ruh düşkünlüyü, döyüş əzminin, qabiliyyətinin yetərli olmaması, erməni əsgərlərinin silahlarını ataraq döyüşdən qaçması, Paşinyanın əsgərlərə “qaçın” əmri verməsi göz önündədir. Ordumuzun ilk həmlədə bütün müdafiə xətlərini yarması, neçə kəndimizi azad etməsi bizə qürur verir.
Erməni ordusunun zəifliyinin səbəbi nədir?
“Erməni ordusunun zəifliyinin səbəblərindən biri əsgərlərin döyüş ruhunun olmamasıdırsa, digər səbəbi bu orduda hökm sürən irqçilikdir”
Məsələni şərh edən hərbi ekspertlər qeyd edirlər ki, erməni ordusunun əndişəyə düşməsinin bir çox səbəbi var. Güclü Azərbaycan Ordusunun qarşısında duruş gətirə bilməyən düşmən ordusunun pərən-pərən düşdüyünü deyən ekspertlər hesab edirlər ki, erməni ordusunun zəifliyinin əsas səbəbi bu ordunun heç zaman ideoloji xəttinin olmamasıdır. Xarici havadarlarına bel bağlayan erməni ordusunda heç vaxt özünəgüvən olmayıb, bu da ordunun bu şəkildə zəif düşməsinin səbəbidir.
Tanınmış hərbi ekspert İbrahim Rüstəmli “Bakı-Xəbər”ə bildirdi ki, Ermənistan ordusu heç zaman güclü olmayıb, bu səbəbdən də bu gün onda güc axtarmaq düzgün olmazdı. “Ermənistan ordusu heç zaman güclü olmayıb. Azərbaycan ordusu Ermənistan ordusundan qat-qat güclü olub, bu gün də min dəfələrlə güclüdür, Azərbaycan əsgəri də erməni əsgərindən min dəfələrlə güclüdür, biz əsgərimizin gücünü həmişə görürük. Bu baxımdan, Azərbaycan əsgəri ilə erməni əsgərinin müqayisə edilməsi düzgün deyil. Azərbaycanın işğal olunmuş ərazilərində xidmət edən Ermənistan əsgərinin heç vaxt gücü, döyüş əzmi, mənəvi ruhu olmayıb. Ermənistan ordusu, əsgəri ona görə zəifdir ki, onları bu torpaqlara heç bir mənəvi-psixoloji, hüquqi tel bağlamayıb. Erməni əsgərləri həmişə özlərini Azərbaycan torpaqlarında gəlmə hiss ediblər. Ermənistan mediasını çox ardıcıl, sistemli olaraq izləyirəm. Bu ölkədə bir çox cəmiyyət var. Həmin cəmiyyətlər hər zaman öz erməni əsgərlərinin işğal altında olan Azərbaycan torpaqlarına xidmətə cəlb edilməsinə etiraz ediblər, hökumətdən tələb ediblər ki, onların övladlarını Qarabağa aparmasın. Erməni anaları öz övladlarının Qarabağda xidmət etməsini, orada həlak olmasını istəmirlər. Bununla bağlı həm Paşinyan, həm də ondan əvvəlki hökumətlərə qarşı daxili təpkilər göstərilib. Erməni əsgəri yaxşı bilir ki, Qarabağ Azərbaycanın əzəli tarixi torpağıdır, onları bu torpağa heç bir mənəvi bağ bağlamır. Erməni əsgərləri Qarabağ müharibəsini özləri üçün ağır yük hesab edirlər. Əsgərlər döyüşmək istəmirlər, heç onların valideynləri də övladlarının döyüşməsinə razı deyillər. Ümumiyyətlə, Ermənistanda hakimiyyətə gələn qüvvələr həmişə Qarabağ kartından hakimiyyətdə qalmaq üçün istifadə ediblər. Zaman-zaman Ermənistanda səfərbərlik, çağırış kampaniyaları olub, bu gün də var, amma bir nəfər də olsun könüllü şəkildə gəlib orduya yazılmayıb, indi də həmçinin. Gəncləri hərbi komissarlığa gətirmək üçün Ermənistan hökuməti min bir tədbirə əl atıb, fövqəladə vəziyyət elan edərək və bütün güc strukturlarını bu işə cəlb edərək gəncləri zor gücünə orduya cəlb ediblər. Zorla Ermənistan ordusuna cəlb edilən erməni əsgərlərində, əlbəttə, nə döyüş ruhu ola bilər, nə döyüşmək həvəsi. Erməni əsgərlərində döyüş ruhu olmadığı üçün, onlar döyüşməkdən imtina edərək üzü İrəvana qaçırlar. Zorla tutularaq Qarabağa müharibəyə gətirilən əsgərlər döyüşməkdənsə qaçmağa üstünlük verirlər. Cənab Prezident də son çıxışında yenə də qeyd etdi ki, erməni əsgərinin, Ermənistan ordusunun Azərbaycan torpaqlarında nə işi var?”
İ.Rüstəmlinin sözlərinə görə, Paşinyan hökuməti insanları güclə orduya cəlb etməklə süni şəkildə əsgərlərin sayını artırmaq istəyir, amma bu da fayda vermir. Bir zamanlar Ermənistanın xüsusi xidmət orqanlarının erməni ordusu haqqında mifik obraz yaratdığını deyən İ.Rüstəmlinin sözlərinə görə, bu gün bunların hamısının boş, yalan olduğu bir daha təsdiqlənir. “Ermənistan ordusunda yaranan əndişənin, gərginliklərin bir səbəbi də ondan ibarətdir ki, Ermənistandan işğal altında olan Azərbaycan torpaqlarına döyüşmək üçün gətirilən əsgərlər Qarabağdakı əsgərlərə yuxarıdan aşağı baxırlar. Burada həmişə “qarabağlılar”la “irəvanlılar” arasında qarşıdurmalar olur, biri digərini hər zaman aşağılayır. Erməni ordusunun zəifliyinin səbəblərindən biri əsgərlərin döyüş ruhunun olmamasıdırsa, digər səbəbi bu orduda hökm sürən irqçilikdir. Erməni əsgərini işğal altında olan Azərbaycan torpaqlarını qorumaq maraqlandırmır, o, canını xilas etmək istəyir. Fərariliyin, zorakılığın, digər alçaldıcı hərəkətlərin, intizamsızlığın mövcud olduğu Ermənistan ordusu güclü ola bilməz. Ermənistan ordusunda əsgərlərə qarşı elə nalayiq, şəxsiyyəti alçaldan hərəkətlər edilir ki, onlar orduda qalmaq istəmir, qaçır, fərarilik edirlər. Belə bir vəziyyətdə erməni ordusunun gücü haqqında danışmağa dəyməz. Ordunu ordu edən onun ideoloji-mənəvi xəttidir. Separatçıların əlində oyuncaq olan Ermənistan ordusunda isə heç bir ideoloji xətt yoxdur. Erməni ordusunda xidmət edən əsgərlər işğal altında olan Azərbaycan torpaqlarını qorumağı özlərinə mənəvi borc hesab etmirlər, odur ki, qaçırlar, bu da Ermənistan ordusunun zəifliyini, gücsüzlüyünü bir daha sübut edir. Ən güclü əsgər ideyası, ideologiyası olan əsgərdir. Ermənistan ordusunun əsgərində bu yoxdur. Ermənistan hökuməti bir tikə çörəyə möhtac olan ailələrin başçılarını, övladlarını zorla döyüşə cəlb etmək istəyir. Çörək dərdi çəkən əsgər də heç vaxt döyüşməz” - deyə İ.Rüstəmli bildirdi.
İradə SARIYEVA
