Ölkəmizdə koronavirusa qarşı aparılan erkən və kompleks mübarizə tədbirlərinin nəticəsidir ki, bu gün Ümumdünya Səhiyyə Təşkilatı dövlətimizin fəaliyyətini yüksək qiymətləndirərək, Azərbaycanın virusdan ən az xəstələnmə, itki və qurban verən ölkələr siyahısında olduğunu elan edib. Sözsüz ki, bütün bunlar, eyni zamanda, uğurla həyata keçirilən səmərəli, önləyici, preventiv, kompleks tədbirlərin nəticəsidir.
Koronavirusa qalib gəlmək üçün ölkəmizdə karantin rejimi tətbiq olunub. Lakin bəzi insanlar karantin rejiminə əhəmiyyət verməyib, əvvəlki qaydada küçəyə çıxırlar. Nəticədə koronavirusa yoluxanların sayı artır.
Karantin rejiminə əməl olunmasının vacibliyinə Prezident İlham Əliyev də toxunub. Prezident mayın 7-də Bakıda modul tipli ilk xəstəxana kompleksinin açılışında çıxışı zamanı deyib ki, o, prinsip etibarilə intizamlı adamdır: “Buna görə mənim ictimai tədbirlərimdə ən çoxu 9 nəfər olur. Bizdə on nəfərdən çox adamın bir yerdə toplaşması qadağandır. Lakin mən ehtiyat üçün həmişə deyirəm, 9 nəfərdən çox olmamalıdır. Ən çoxu 10 və ya 9 nəfər. Bir də, əlbəttə, məsafəyə riayət edirəm. İctimai xarakterli tədbirlərdə də, görüşlərdə də belə olub. İlin birinci rübünün yekunlarına həsr olunmuş iclası videokonfrans rejimində keçirdik. Amma deməliyəm ki, bu iclas əvvəl keçirdiklərimizdən o qədər də fərqlənmədi. Mənim tabeliyimdə olan işçilərlə söhbətlərim də videokonfrans formatında keçirilir. Yəni insan, prinsip etibarilə, hər şeyə alışır. Buna da vərdiş etmək lazımdır”.
Karantin qaydalarına riayət etmək hər bir vətəndaşın borcudur. Ancaq bəzi vətəndaşlar karantin qaydalarına riayət etmək əvəzinə, sərbəst şəkildə, maskasız küçəyə çıxırlar. Ölkə başçısı karantin qaydalarına riayət etdiyi halda, vətəndaşların bu məsələyə qeyri-ciddi yanaşması düzgün deyil.
“Ölkəmizdə hər bir vətəndaş bu qlobal təhlükə ilə mübarizədə ciddi məsuliyyəti olduğunu başa düşməlidir”
Milli Məclisin deputatı Məlahət İbrahimqızı bildirdi ki, ölkədə koronavirusdan xəstələnənlərin, ölüm hallarının, aparılan test müayinələrinin sayının, ağır xəstələr, sağalanların dinamikası və statistikasının təhlilinin nəticələrini nəzərə alaraq Operativ Qərargah karantin rejiminin yumşaldılmasına getdi: “Lakin tətbiq edilən bu yumşalmalar o demək deyil ki, virusun təhlükəsi aradan qalxdı. Qətiyyən belə deyil. Bu gün koronavirusdan daha çox əziyyət çəkən ölkələrdə ciddi nəzarət etməklə müəyyən yumşalmalar tətbiq edilir. Ölkəmizdə də postkorona dövrünə hazırlıq üçün mərhələli və yumşaldıcı tədbirlər həyata keçirilir. Bütün bunlara baxmayaraq, vətəndaşlar Operativ Qərargahın təlimatlarına və qaydalarına əməl etməlidirlər. Sözsüz ki, şəxsi gigiyena, özünütəcrid, kütləvi tədbirlərin qadağası ən önəmli qaydalardır. Unutmaq olmaz ki, virusun spesifik xüsusiyyətlərindən biri də təkrar dalğaların olmasıdır".
Deputatın sözlərinə görə, bəzi ölkələrdə karantin rejiminə əməl etmədə problemlər olduğundan, yeni dalğalar başlayıb: “Ölkəmizdə hər bir vətəndaş bu qlobal təhlükə ilə mübarizədə ciddi məsuliyyəti olduğunu başa düşməli və bütün qaydalara əməl etməlidir. Ehtiyatsızlıq və məsuliyyətsizlik ölkəmizdə koronavirusa qarşı aparılan uğurlu mübarizəyə kölgə sala bilər. Ümumiyyətlə, yumşaldıcı tədbirlər müvəqqəti ola bilər. Bu, bir növ, həm də dinamikanın test edilməsidir. Yəni, Allah eləməsin, dinamikada mənfiyə doğru hər hansı tendensiya baş verərsə, yenidən çox ciddi qaydalar tətbiq edilə bilər”.
M.İbrahimqızı onu da vurğuladı ki, karantin qaydalarına əməl etməyən, maskasız evdən çölə çıxan vətəndaşlar cəzalandırılmalıdırlar.
Günel CƏLİLOVA
