“Bizə göstərilən hörmət və etimad ona dəlalət edir ki, Azərbaycan beynəlxalq arenada çox böyük nüfuz qazana bilib”. Bunu Prezident İlham Əliyev Rusiyanın TASS informasiya agentliyinə müsahibəsində deyib.
Ölkə başçısının sözlərinə görə, Azərbaycan Qoşulmama Hərəkatına sədr seçiləndə məqsədlərindən biri də bu idi ki, bu təşkilat daxilində dövlətlərarası ziddiyyətlər bizim də iştirakımızla həll edilsin: “Azərbaycan yekdilliklə Hərəkatın sədri seçilib, bu da çox əlamətdar amildir, çünki bildiyiniz kimi, Hərəkatda 120 ölkə iştirak edir və bu ölkələrin bəziləri arasında, yumşaq desək, gərgin münasibətlər var. Lakin bizə göstərilən hörmət və etimad ona dəlalət edir ki, Azərbaycan beynəlxalq arenada çox böyük nüfuz qazana bilib. Bakı Zirvə görüşündə mən demişdim ki, biz öz sədrliyimizi heç də formal sədrlik hesab etmirik, biz səmərəli sədr olmaq istəyirik. Hərəkatın beynəlxalq arenada nüfuzunu və rolunu yüksəltmək, ölkələr arasında daha sıx birlik istəyirik, şərait yaratmaq istəyirik ki, bəzi ölkələr arasında mövcud fikir ayrılıqları, zəruri hallarda bizim də iştirakımızla nizamlansın. Mən, həmçinin, dedim ki, Azərbaycan təkcə sədrlik dövründə deyil, bundan sonra da beynəlxalq arenada üzv ölkələrin mənafelərini müdafiə edəcək”.
Prezidentin bu fikirləri, faktiki olaraq, Azərbaycanın Qoşulmama ölkələri arasında vasitəçilik etmək təklifidir. O baxımdan bu çox əhəmiyyətli missiyadır. Maraqlıdır, Azərbaycanın bu məqsədi həyata keçirmək üçün imkanları nə qədərdir?
“Bu, siyasi və diplomatik baxımdan düşünülmüş bir addımdır”
Məsələyə münasibət bildirən keçmiş diplomat, politoloq Fikrət Sadıqovun sözlərinə görə, sözügedən missiyanı həyata keçirmək üçün Azərbaycanın yetərincə siyasi nüfuzu və diplomatik imkanları var: “Əvvəla Prezident İlham Əliyevin belə bir təşəbbüslə çıxış etməsi olduqca təqdirəlayiq haldır. Qoşulmama Hərəkatının sədri olaraq bununla bağlı Azərbaycanın nüfuzu və müəyyən diplomatik imkanları var. Hərəkatda 120 ölkə təmsil olunur. Bəzi ölkələr arasında müxtəlif siyasi və digər səbəblərdən fikir ayrılıqları var. Pandemiya şəraitində ölkələri xüsusilə birləşdirmək, bəzi dövlətlər arasında mövcud olan fikir ayrılıqlarını müəyyən qədər aradan qaldırmaq, dayandırmaq mümkündür. Ona görə də bu, siyasi və diplomatik baxımdan düşünülmüş bir addımdır. Düzdür, bu o qədər də asan olmayacaq. Eyni zamanda, bu o demək deyil ki, aralarında fikir ayrılıqları olan dövlətlər o dəqiqə qardaş münasibətlərdə olacaqlar. Bu, zaman tələb edən məsələdir. Ancaq, bütün hallarda, Azərbaycanın bu təşəbbüsü çox ciddi və lazımlı bir addımdır. Fikir ayrılıqları olan dövlətləri bir araya gətirmək və danışıqlar vasitəsilə həll yolu tapmaq imkanları var. Düzdür, bu, zaman tələb edir. Hesab edirəm ki, Azərbaycanın bu istəyi bir sıra dövlətlər tərəfindən düzgün qəbul olunacaq. Ona görə də buna ümidlər böyükdür”.
Vidadi ORDAHALLI
