“Ermənistanda bir tərəfdən deyirlər ki, onlar Qələbənin yubileyini bayram edəcəklər, amma digər tərəfdən, faşistin abidəsi önünə gül qoyurlar. Bu, ən azı ziddiyyət, əslində isə riyakarlıq təzahürüdür”. Bunu Prezident İlham Əliyev TASS agentliyi direktorunun birinci müavini Mixail Qusmana müsahibəsində deyib.
Ölkə başçısının sözlərinə görə, bəzi ölkələrdə faşizmin qəhrəmanlaşdırılması prosesi bizim üçün əsla qəbuledilməzdir. Bu məsələləri dəfələrlə, o cümlədən, MDB ölkələrinin sonuncu Zirvə görüşündə qaldırdığını bildirən dövlət başçısı qeyd edib ki, Ermənistanda faşist canilərinin qəhrəmanlaşdırılması həyat normasına çevrilir. Prezident qeyd edib ki, bütün bunlar böyük təəccüb, heyrət doğurur. Belə bir fikrə əsas verir ki, Ermənistanda hakimiyyət dəyişə bilər, lakin rejimin mahiyyəti əvvəlki kimi qalır.
Rusiya Federasiyasının Armavir şəhərində də cinayətkar, faşistlərin əlaltısı Njdeyə xatirə lövhəsi vurulduğunu xatırladan Prezident İlham Əliyev deyib ki, bu məsələni dövlət başçılarının Zirvə görüşündə qaldırandan və sözügedən məsələ kütləvi informasiya vasitələrində əksini tapandan sonra həmin lövhə götürülüb: “Haqlı olaraq sual yaranır: Ermənistanda Böyük Vətən Müharibəsi qəhrəmanları olmayıbmı? Bəs Armavirdə erməni kilsəsinin yaxınlığında nə üçün onlara yox, faşist caniyə xatirə lövhəsi vurulub? Bunu necə başa düşməli? Ona görə bu məsələlər geniş müzakirə edilməlidir. Yenə də hər bir ölkə bu məsələyə öz münasibətini selektivlik, siyasi korrektlik mülahizələrinə görə deyil, birbaşa və açıq şəkildə bildirməlidir”.
Görünən odur ki, Ermənistan sözügedən məsələdə həqiqətən də riyakar dövlət siyasəti yürüdür. Bir tərəfdən Qələbənin yubileyini bayram edəcəklər, digər tərəfdən, faşistin abidəsi önünə gül qoyurlar. Bunun bir adı var, riyakarlıq.
“Bütün bunlar Ermənistanda dövlət səviyyəsində riyakar siyasətin yeridilməsini sübut edir”
Sözügedən məsələ ilə bağlı fikirlərini “Bakı-Xəbər”lə bölüşən Azərbaycan Milli Elmlər Akademiyasının Qafqazşünaslıq İnstitutunun ermənişünaslıq şöbəsinin müdiri, professor Qasım Hacıyevin sözlərinə görə, bütün bunlar onu sübut edir ki, Ermənistanda rəsmi səviyyədə riyakar dövlət siyasəti yeridilir: “Bütövlükdə, Ermənistanın istər daxili, istərsə də xarici siyasəti saxta əsaslar üzərində qurulub. Çünki onların tarixi uydurma fikirlərə əsaslanır. Onların tarix barədə fikirləri nəinki obyektiv deyil, ümumiyyətlə, reallıqdan uzaqdır. Paradoksal hal həm də ondan ibarətdir ki, ermənilər yeni-yeni hoqqalar uydururlar. Onların apardığı siyasət də belədir. Ermənistanın əvvəlki prezidentlərinin fikirlərinə baxsaq görərik ki, kifayət qədər ziddiyyətli və gülünc məqamlar orada öz əksini tapıb. Söhbət Levon Ter-Petrosyandan, Robert Köçəryandan və Serj Sarkisyandan gedir. Ancaq küçə yürüşü hesabına baş nazir olan Nikol Paşinyan isə həddən ziyadə cəfəng fikirlər səsləndirir. Bunda siyasi məsuliyyət deyilən bir anlayış yoxdur. Paşinyan deyir ki, hər iki məsələ bizim şərəfli tariximizdir. Yəni Böyük Vətən Müharibəsi də, Njde də. Bütün bunlar heç bir tarixi və diplomatik məntiqə sığmır. Prezident İlham Əliyev TASS-a müsahibəsində çox vacib məqamlara toxundu. Çünki Qələbənin yubileyini bayram edən dövlət faşistə abidə qoymamalıdır. Ancaq Ermənistan bunu edir. Hansı ki, Njde əsirlərə qarşı qəddar hərəkətləri ilə ad çıxarıb. Bununla bağlı kifayət qədər arxiv sənədi var. Ona görə də bu biabırçılıqdır. Bütün bunlar Ermənistanda dövlət səviyyəsində riyakar siyasətin yeridilməsini sübut edir”.
Vidadi ORDAHALLI
