Fatimə Hacıbəyli: “Milli mentalitetimizlə daban-dabana zidd olan belə kliplər pislənməlidir” Aysel Ziyadxanlı: “Bu kliplər Azərbaycan gənclərinin əxlaqına, tərbiyəsinə yaxşı təsir göstərmir”
Klip vizual sənətin müasir nailiyyətlərindən biri kimi bütün dünyada populyardır. Bir vaxtlar Azərbaycan müğənnilərinin kütləvi maraq göstərdiyi klip çəkilişi bu gün səngisə də, arabir klip çəkdirənlər tapılır. Mövzu qıtlığı, hit mahnıların olmaması müğənniləri əməlli-başlı əndişəyə salır. Son vaxtlar yaranan zəif mahnı mətnləri və zəif musiqilərlə tamaşaçıya zövq verməyin çətinliyini anlayan bəzi müğənnilər öz üzərlərində işləmək əvəzinə, yeni klipləri ilə tamaşaçıların zövqünü korlamaqda davam edirlər.
Bu günlərdə müğənni Nadir Qafarzadə klip çəkdirib. Deyəcəksiniz ki, müğənninin işi yeni ifasına klip çəkdirməkdir, burada nə var? O var ki, Nadirin son klipi intim səhnələrlə “zəngin”dir. Yataq səhnələrini müğənni özü canlandırmasa da, burada aktyorların açıq-saçıq səhnələrdə görünməsi həqiqətən də xoşagələn deyil.
18+ kateqoriyalı klipin kütləvi şəkildə televiziya və internet kanallarında, sosial şəbəkələrdə yayılacağını nəzərə alsaq, deyə bilərik ki, bu həm mental dəyərlərə ziddir, həm də uşaq və yeniyetmələrin psixikasını zədələyir.
“Yataq səhnələrini gənc aktyorlar canlandırıb. Əminəm, xeyli tənqid olacaq, amma bu mənim vecimə də deyil. İstəməyən baxmasın” - Nadir bu açıqlamanı verməklə yenə tamaşaçı rəyinin onun üçün əhəmiyyətsiz olduğunu vurğulayıb. Çünki o dəfələrlə tamaşaçıya belə sayğısızlıq göstərib.
Bu mövzuya niyə toxunduq? Məsələ ondadır ki, indiyə qədər bir sıra şou-biznes müğənnisi intim səhnələrlə “zəngin” olan kliplər çəkdiriblər. Saysaq, belə müğənnilərin sayı bəlkə də 10-15 olar. Bu, kiçik rəqəm deyil. Sənətdə öz sözünü deyə bilməyən şou-biznesçilər intim kliplərlə gündəmə gəlmək istəyirlər. Milli mentalitetə, əxlaqi dəyərlərimizə zidd olan belə kliplər, əslində, o müğənnilərin özlərinin əxlaq səviyyəsini, xalqımıza, uşaq və gənclərimizə münasibətini göstərir. Yoxsa buna başqa ad vermək olmaz.
“Vəfa” Sosial İctimai Birliyinin rəhbəri Fatimə Hacıbəylinin sözlərinə görə, 18+ kateqoriyalı vizual sənət nümunələrinin yayımı kütləvi olmamalıdır. Onun dediyinə görə, internetin açıq məkan olduğunu nəzərə alaraq, bu klipə hər kəs baxa bilər. O hesab edir ki, bu səbəbdən də onu geniş şəkildə yaymaq olmaz: “Bir qrup şou-biznes müğənnisi öz davranış və hərəkətlərində qətiyyən mental dəyərləri nəzərə almaq istəmir. Bu azmış kimi, çəkdikləri kliplərin mövzusunu intim həyatla bağlayır və klipə açıq-saçıq yataq səhnələri salırlar. Deyim ki, indiyə qədər bir neçə şou müğənnisi belə kliplər çəkdiriblər. Ümumiyyətlə, intim səhnələrlə dolu kliplərin Azərbaycan cəmiyyətində kütləvi yayımı olmalı deyil. Biz azərbaycanlıyıq və bizim intim həyata başqa cür baxışımız var. İntim həyat səhnədə, kinoda sənət naminə ola bilər, amma Azərbaycanda buna məhdudiyyət qoyulur. Kliplərdə intim səhnələrin olması daha dəhşətlidir. Bu klipə hamı baxa bilər, uşaq da, yeniyetmə də, gənc də. Bu, uşaq və yeniyetmələrin psixikasına ciddi zədə vura bilər. Milli mentalitetimizlə daban-dabana zidd olan belə kliplər pislənməlidir. Fəxri adı olan müğənni xalq və dövlət qarşısında məsuliyyət daşıdığını anlamalıdır. İntim səhnələrin klipə salınması bizim əxlaqi dəyərlərimizə ziddir və hesab edirəm ki, telekanallar bu klipi geniş yaymamalıdırlar. Bilirsiniz, intim mövzuda klip çəkdirən müğənnilər qınanmalıdır. Bu “ənənə” davam etdirilməməlidir. Bir yaşlı müğənni durub belə bir klip çəkdirirsə, sabah gənclər də buna meyl edəcək”.
Musiqi meneceri Aysel Ziyadxanlının sözlərinə görə də belə kliplərin çəkilməsi müsbət hal deyil: “Bu yolverilməzdir. İndiyə qədər intim mövzuda bir neçə klip çəkilib. Sanki müğənnilər bu sahədə bir-birilə yarışa giriblər. Bu kliplər Azərbaycan gənclərinin əxlaqına, tərbiyəsinə yaxşı təsir göstərmir. Bəzi şou-biznesçilər özlərini xarici pop, şou-biznes ulduzları ilə müqayisə etmək istəyirlər ki, onlar niyə çəkdirir, biz də çəkdirməliyik. Əvvəla ora Qərbdir, Avropadır, Amerikadır, bura isə Azərbaycandır. Bizim öz dəyərlərimiz, əxlaq göstəricilərimiz var. İntim səhnəli kliplər çəkdirən müğənnilər bununla özlərini “cəsarətli” insan kimi göstərmək istəyirlər. Cəsarətli olmaq başqa şeydir. Onu tərbiyəsizliklə qarışdırmaq olmaz. Bir məqamı deyim ki, heç bu kliplərin üzərinə “18+” da yazılmayıb, sadəcə, yayanlar “18+” işarəsini əlavə ediblər. Düşünürəm ki, bu belə olmamalıdır. Bu gün Avropanın, Qərbin özündə artıq bəzi film və kliplər çəkildikdən sonra yayıma buraxılırsa, onun üzərində “21+” yazılır. Bizdə isə əksinədir. Demokratik ölkədə və cəmiyyətdə yaşasaq da, bu o demək deyil ki, bütün sərhədləri aşıb keçməliyik. Adət-ənənəyə, mental dəyərlərə bütün sahələrdə, o cümlədən də vizual sənətdə sayğı göstərilməlidir. Müğənnilər öz davranışları ilə insanları özlərindən uzaqlaşdırmamalıdırlar. Görürsünüz, son vaxtlar kütləvi olaraq klip çəkilmir. Bilirsiniz niyə? Çünki bəzi şou müğənnilərinin kliplərinin tamaşaçısı yoxdur”.
Aytəkin
