Zülfiyyə Eldarqızı: “Azərbaycan dünyagörüşünün, milli maraqlarının təbliği baxımından təqdirəlayiqdir” Təranə Əlizadə: “Milli maraqların təbliği baxımından diqqət yetirsək görərik ki, kino necə güclü vasitədir”
Milli maraqların beynəlxalq aləmdə təbliği məsələsi son illər daha da aktuallaşıb. Bu hazırda daha çox yaradıcılıq sahəsinin xətti ilə həyata keçirilməyə başlayıb. Kino, teatr, ədəbiyyat, incəsənət bəşəri olduğu qədər də milli mahiyyət daşıdığı üçün, milli maraqları qorumaq, təbliğ etmək gücündədir.
Milli maraqların beynəlxalq aləmdə təbliği üçün festival keçirilir. Bu festivalın məqsədi milli kino xətti ilə milli maraqları təbliğ etməkdir.
Məlumata görə, Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurası Azərbaycan Respublikası Kinematoqraflar İttifaqı (ARKİ) ilə birgə şuranın maliyyə dəstəyi ilə QHT-lərin ölkəmizin milli maraqlarının beynəlxalq aləmdə təbliği, mədəniyyətimizin və ictimai həyatın müxtəlif sahələrinin inkişafı üçün gördüyü işləri geniş ictimaiyyətə təqdim etmək məqsədilə film festivalı özü işinə başlayıb. Artıq bu məqsədlə şura tərəfindən peşəkar kino mütəxəssislərinin daxil olduğu münsiflər heyəti yaradılıb.
SSRİ Dövlət Mükafatı laureatı, Xalq artisti, professor, Kinematoqraflar İttifaqının sədri Şəfiqə Məmmədova şuranın təşəbbüsünün təqdirəlayiq olduğunu və festivalın keçirilməsinin kinonun və bütövlükdə, mədəniyyətin inkişafına xidmət etdiyini açıqlayıb. Ş.Məmmədova cəmiyyət həyatının bütün sahələri ilə bağlı mövzularda maarifləndirmə işi aparmaq üçün kinonun çox səmərəli vasitə olduğunu vurğulayıb.
Şuranın iclasında münsiflər heyətinin sədri, İctimai Televiziya və Radio Yayımları Şirkətinin baş direktoru, Əməkdar incəsənət xadimi, professor, ARKİ-nin birinci katibi C.Quliyev festival çərçivəsində görülən işlər haqqında danışarkən bildirib ki, festival cəmiyyətdə estetik zövqün, mədəniyyətin inkişafına və şuranın maliyyə yardımı ilə icra olunan layihələr çərçivəsində görülmüş işlərin geniş ictimaiyyətə çatdırılmasına xidmət edir. O, oktyabrın 25-də film festivalı ilə bağlı elan verdiyini bildirib. C.Quliyev festivalda iştirak etmək üçün QHT-lərin müvafiq qaydada şuraya müraciət etdiyini və festivala 2008-2016-cı illərdə hazırlanmış 100-dən artıq film təqdim olunduğunu deyib. C.Quliyev münsiflər heyəti üzvlərinin fərdi qaydada hər bir filmi ayrılıqda və xüsusi forma əsasında 10 ballıq sistem üzrə qiymətləndirdiyini bildirib.
Azərbaycanın milli maraqlarının sənət vasitəsilə beynəlxalq aləmdə təbliğ edilməsinin əhəmiyyətini vurğulayan sənətşünaslıq üzrə fəlsəfə doktoru Zülfiyyə Eldarqızı bildirdi ki, bütün göstəricilərinə və daşıdığı mahiyyətə görə bu festivalın önəmi böyükdür. O qeyd etdi ki, kinonun bütün istiqamətlərdə təsiri böyükdür: “Son illər Azərbaycanda mədəniyyət və incəsənətlə bağlı beynəlxalq tədbirlər çox keçirilir. Bu sahələrdə tədbirlərin beynəlxalq əhəmiyyət daşıması müsbət haldır. Ölkəmizdə keçirilən hər bir beynəlxalq mədəni tədbir Azərbaycan dünyagörüşünün, milli maraqlarının təbliği baxımdan təqdirəlayiqdir. Sözügedən festivalın da keçirilməsini bu mənada yüksək dəyərləndirirəm. Bu festivala onlarla film təqdim edilib və bu filmlər də görkəmli, peşəkar münsiflər tərəfindən qiymətləndirilir. Azərbaycan kinosu həmişə milli maraqlara xidmət edib, azərbaycançılığı əsas tutub, xalqımızın dəyərlərinə sahib çıxıb. Milli maraqların beynəlxalq aləmdə təbliği üçün festivalın ölkəmizin aidiyyəti qurumları tərəfindən təşkil edilməsi, maliyyələşdirilməsi müsbət haldır. Bu gün kinoya böyük maraq var. Belə festivallar yeni gənc simaların meydana çıxmasına şərait yaradır. Bu festivalda elə imzalar görəcəyik ki, onlar həqiqətən də kinoya böyük fayda vermək istəyində və gücündə olanlardır”.
Sənətşünas Təranə Əlizadə də hesab edir ki, milli maraqların beynəlxalq aləmdə təbliğ edilməsi üçün belə festivallar əhəmiyyətlidir. O hesab edir ki, kino Azərbaycan mənəviyyatında, milli maraqlarının inkişafında önəmli rola malikdir: “Bu festivala sırf peşəkarlıq baxımından yanaşsaq görərik ki, ortaya nə qədər maraqlı film çıxacaq. Milli maraqların təbliği baxımından diqqət yetirsək görərik ki, kino necə güclü vasitədir. Milli maraqlarımız, dünyagörüşümüz, həyatımız kinoda canlandırılırsa, bu daha maraqlı olur. Azərbaycanın özünün çoxşaxəli, məzmunlu, böyük mahiyyət daşıyan mədəniyyət siyasəti var və bu festivalın da keçirilməsi o siyasətdən qaynaqlanır. Milli maraqlarımız hər birimiz üçün vacibdir. Bu, kino vasitəsilə təbliğ ediləndə daha böyük təsirə malik olur”. İradə SARIYEVA
