“Qəbələnin mədəniyyəti, etnoqrafiyası, folkloru çox zəngindir və qəbələlilərin adət-ənənələrində əski elementlər özünü qoruyub saxlayıb”
Bölgələrimiz hər zaman diqqət mərkəzində olmalıdır. Dövlətin həyata keçirdiyi siyasətin mühüm bir qolunu regionlara diqqətin artırılması, bölgənin inkişaf etdirilməsi təşkil edir. Azərbaycan bölgələri zənginliyinə, sənətkarlığın, mədəniyyətin, turizmin inkişafına görə maraq doğurur. Onu da vurğulayaq ki, son illər davamlı olaraq Azərbaycan Mədəniyyət və Turizm Nazirliyinin, yerli icra hakimiyyəti orqanlarının birgə təşkilatçılığı ilə bölgələrin tanıdılması, təbliğ edilməsi istiqamətində çoxçeşidli layihələr həyata keçirilir.
Bu layihələr rejionların sosial-iqtisadi, mədəni, turizm potensialının üzə çıxmasında əhəmiyyətli dərəcədə rol oynayır. Bildiyimiz kimi, Mədəniyyət və Turizm Nazirliyinin təşəbbüsü ilə “Bölgələrdən paytaxta” layihəsi həyata keçirilir. Ənənəvi hal alan bu layihə çərçivəsində Azərbaycanın müxtəlif bölgələrinə mənsub olan mədəniyyət, folklor, turizm imkanları və s. bağlı paytaxtda tədbirlər keçirilir.
Bir neçə gün əvvəl Azərbaycanın qədim və zəngin mədəniyyətinin təbliğ olunması, regionlararası mədəni əlaqələrin gücləndirilməsi, bölgələrin turizm potensialının işıqlandırılması məqsədilə “Bölgələrdən paytaxta” layihəsi çərçivəsində Bakıda “Qəbələ günü” keçirilib. Məlumalara görə, layihə çərçivəsində Qəbələnin adət-ənənələrini, tətbiqi sənət, mətbəx nümunələrini, sosial-iqtisadi inkişafını və turizm potensialını əks etdirən sərgi təşkil edilib. Sərgidə, həmçinin, “Qəbələ” idman klubu da təmsil olunub.
Bölgələrdən paytaxta daşınan mədəniyyət örnəkləri, adət-ənənələr, bir sözlə, bütün gözəlliklər heyrət doğurmaya bilmir. “Bölgələrdən paytaxta” layihəsinin önəmini vurğulayan ekspertlər bildirirlər ki, bu olduqca vacib bir məsələdir.
Jurnalist-etnoqraf Ənvər Çingizoğlunun bildirdiyinə görə, bölgələrin paytaxt əhalisinə, xüsusən də müasir gənclərə tanıdılması baxımından “Bölgələrdən paytaxta” formatlı layihələrə böyük zərurət var: ”Bildiyim qədər, son illər ardıcıl olaraq bu tipli layihələr həyata keçirilir. Bu, dövlətin bölgələrlə bağlı uğurlu siyasətinin tərkib hissəsinə daxildir. Azərbaycan bölgələrinin, rayonlarının, kəndlərinin hər biri zəngindir, adət-ənənələri, folkloru, sənətkarlığı olduqca maraqlı və unikaldır. “Qəbələ günü”nün keçirilməsinin əhəmiyyətli tərəflərindən biri odur ki, bu bölgə, şəhər Azərbaycanın qədim paytaxtlarından biri olub və dövlətçiliyimiz üçün böyük əhəmiyyətə malikdir. Bu da onu deməyə əsas verir ki, Qəbələnin mədəniyyəti, etnoqrafiyası, folkloru çox zəngindir və qəbələlilərin adət-ənənələrində əski elementlər özünü qoruyub saxlayıb. Bu gün Qəbələnin, digər rayon və şəhərlərin paytaxtda günlərinin keçirilməsi əlamətdar hadisədir. Bilirsiniz ki, gənclərin çoxu paytaxtdan kənara çıxa bilmədiyi üçün, bögələrdən xəbərsizdirlər. Bu cür layihələrin həyata keçirilməsi gənclərin həyatında müsbət rol oynayır. Gənclər “Bölgələrdən paytaxta” kimi layihələr çərçivəsində keçirilən tədbirlər, görüşlər, sərgilər vasitəsilə bölgələri tanıya bilirlər. Bu, gənclərin mənəvi inkişafında, keçmişə bağlanmasında, gələcəyə inamla addımlamasında önəmli təsirə malikdir”.
Ə.Çingizoğlu, həmçinin, hesab edir ki, bu layihələr həm də bölgələri turizm baxımından tanıdır. Onun dediyinə görə, Qəbələ və digər rayonlar bu gün turistlərin ən çox maraq göstərdiyi yerlərdən biridir: “Qəbələ həm qədimliyinə, həm tarixinə, həm də müasir gözəlliyinə, inkişafına görə turistləri yaxından cəlb edir. Turistlər həm qədim Qəbələnin, həm də müasir Qəbələnin mənzərələri ilə tanış olurlar. Ənənəvi olaraq Qəbələ Musiqi Festivalı keçirilir. Bu festival zamanı da xaricdən çoxlu qonaq, turistlər Qəbələyə üz tutur. Hesab edirəm ki, “Bölgələrdən paytaxta” layihəsi davam etməlidir və öz yenilikləri, maraqlı tərəfləri ilə insanları cəlb etməlidir. Hər bir bölgəmiz bir dünyadır. Qəbələdə sənətkarlıq da inkişaf edib. Bu sənətkarlıq nümunələrinin də gənclərə tanıdılması çox yaxşıdır. Ümumiyyətlə, bu cür layihələrdən ən çox müsbət örnək götürən gənclərdir”.
İradə SARIYEVA
