Elyar İslamoğlu: “Köhnə və tənqid olunmuş layihələri təkrar-təkrar yayımlamaq isə bu məsuliyyətdən yayınmaq kimi görünür”
Yerli telekanallarda yayımlanan bir sıra verilişlər vardı ki, artıq onlar bağlanıb. Təbii ki, bu qərarın qəbul edilməsi ictimaiyyətin tələbi əsasında qəbul edilib. Tamaşaçılar elə zənn edirdilər ki, narazı olduqları verilişlər bir daha ekranlarda görsənməyəcək. Amma mətbuatda yazılır ki, aparıcı Zaur Baxşəliyevin ATV-dəki verilişləri bağlansa da, onu yenə efirdə görmək olur. Hər həftənin şənbə-bazar günləri Zaur və Günay Baxşəliyevlər evimizə "qonaq gəlir". Buna səbəb cütlüyün əvvəllər çəkildiyi verilişlərin yenidən efirə getməsidir. Belə ki, ATV rəhbərliyinin qərarı ilə Baxşəliyevlərin baxımlı layihəsi olan "Zaurla Gunaydın" təkrar yayınlanır.
Veriliş hər həftənin şənbə-bazar günləri şəhər saat 10:00-da efirdə olur.
Bağlanmış verilişi təkrar-təkrar efirdə vermək nə dərəcədə doğrudur? Bu verilişlərə ehtiyac olmasaydı onları niyə bağlayırdılar ki? Ehtiyac yoxdur ki, bağlanıb. Bu halda bunu niyə təkrar verirlər? Bundansa yeni verlişlər hazırlasınlar, yeni ideyalarla tamaşaçıların diqqətini cəlb etsinlər.
Filologiya üzrə fəlsəfə doktoru, tanınmış ictimai fəal Elyar İslamoğlu baki-xeber.com-a bildirdi ki, bir müddət əvvəl bağlanan verilişin yenidən efirə qaytarılması artıq sadəcə “nostalji” məsələsi kimi görünmür.
“Zaur Baxşəliyev və Günay Baxşəliyeva tərəfindən təqdim olunan “Zaurla Günaydın” layihəsi illər boyu geniş auditoriya toplasa da, eyni zamanda ciddi tənqidlərə də məruz qalmışdı. Verilişin bağlanma səbəbləri sırasında tez-tez bayağı məzmun, süni qalmaqallar, şəxsi həyatların efirə daşınması və ailə dəyərlərinin səthi şəkildə təqdim olunması kimi məqamlar göstərilirdi. Bu baxımdan layihənin efirdən yığışdırılması bir çox tamaşaçı tərəfindən məntiqli addım kimi qarşılanmışdı.
İndi isə eyni kontentin təkrar şəkildə yayımlanması haqlı olaraq narazılıq doğurur. Əgər bu verilişlər doğrudan da tamaşaçı zövqünə mənfi təsir edir, ictimai müzakirə səviyyəsini aşağı salır və ailə dəyərlərini şou predmetinə çevirirdisə, onların yenidən efirə gətirilməsi hansı məqsədə xidmət edir?
ATV bu qərarla sanki özü ilə ziddiyyətə düşür. Bir tərəfdən müəyyən standartlara uyğun gəlmədiyi üçün layihəni bağlayır, digər tərəfdən isə eyni materialı yenidən təqdim edir. Bu hadisə ya əvvəlki qərarın qeyri-ciddi olduğunu göstərir, ya da hazırda kanalda yeni və keyfiyyətli məzmun istehsalı ilə bağlı problemlərin olduğunu düşündürür”.
E.İslamoğlu qeyd etdi ki, televiziya sadəcə əyləncə vasitəsi deyil, həm də ictimai düşüncəyə təsir edən güclü platformadır. “Bu səbəbdən efirə çıxarılan hər bir məzmun müəyyən məsuliyyət daşımalıdır. Köhnə və tənqid olunmuş layihələri təkrar-təkrar yayımlamaq isə bu məsuliyyətdən yayınmaq kimi görünür”-deyə E.İslamoğlu qeyd etdi.
Leyla QARAXANLI
