Arif Vəliyev: “Vətən Müharibəsi zamanı düşmənin 12 tankını, 200-ə yaxın canlı qüvvəsini məhv edib, bir yaralı erməni əsgərini əsir götürüb”
Hər bir şəhid bir qəhrəmanlıq zirvəsidir. Adı dillərdə gəzən, kitablarda əbədiləşən, xatirəsi hər zaman əziz tutulan igidlərimizdən biri Xüsusi Təyinatlı Qüvvələrin giziri, Vətən Müharibəsi Qəhrəmanı Elyar Arif oğlu Vəliyevdir. YAP Yasamal rayon təşkilatı, Yasamal Rayon İcra Hakimiyyəti və Azərbaycan Respublikası “Xatirə Kitabı” redaksiyası ilə birgə "44 gün-Tarixi zəfər" adlı çoxcildlik kitabının IV cildinin təqdimat mərasimində tanış olduq qəhrəmanımız Elyarın atası Hacı Ariflə.
“Mənim oğlum həqiqi qəhrəman olub. Bunu mən demirəm, onun döyüş yoldaşları deyir”. Bunu baki-xeber.com-a Vətən Müharibəsi Qəhrəmanı Elyar Vəliyevin atası Hacı Arif deyir.
Hacı Arif bildirir ki, Vətən Müharibəsi başlayanda oğlu Elyar artıq 11 il idi ki, Xüsusi Təyinatlı Qüvvələrin giziri idi. O, Vətən Müharibəsinə kimi 2016-cı ilin aprel döyüşlərinin və 2020-ci ilin Tovuz döyüşlərinin iştirakçısı olub. Sentyabrın 27-dən başlayan Vətən Müharibəsində Füzulinin, Cəbrayılın və Qubadlının azadlığı uğrunda qəhrəmancasına döyüşüb Elyar.
Hacı Arif bildirdi ki, Elyar 1991-ci il oktyabrın 17-də Qobustan rayonunun Sədəfli kəndində doğulub. Vəliyevlər ailəsinin ilki olan Elyar kənd orta məktəbini bitirdikdən sonra həqiqi hərbi xidmətə yollanıb. Hərbi xidmətini başa vurduqdan sonra hərbçi olmaq qərarına gəlib. 2010-cu ildə Xüsusi Təyinatlı Qüvvələrin tərkibinə daxil olub və burada öz şücaəti ilə komandir heyətinin rəğbətini qazanıb.
“Oğlum 11 il əfsanəvi taborda xidmət edib. Bütün çətin döyüş tapşırıqlarını böyük məsuliyyətlə yerinə yetirib. Məxfi tapşırıqların əksəriyyətinin icrasında Elyar iştirak edib. Komandanlıq tərəfindən hərbi hissə qarşısına qoyulmuş tapşırıqların hamısını uğurla yerinə yetirilib. Murad Mirzəyevlə, Samit İmanovla, Camal İsmayılovla, Sübhan Cəbrayılovla, Raquf Orucovla bir yerdə döyüşüb, əməliyyatları birgə aparıblar. Onlar hətta 2014-cü ildə Ağdam üzərində bir hava hücumundan müdafiə sistemini də partlatdılar. Vətən müharibəsində də şəxsən Elyar bir hava hücumundan müdafiə sistemini partlatdıb. Cənab Prezident televiziyada elan etdi ki, bizim xüsusi təyinatlılarımız hava hücumundan müdafiə sistemini partladıb. Onu mənim oğlum partlatmışdı, erməni hərbi hissəsinin polkovnikini də zərərsizləşdirib, oradan bütün lazımı detalları, sənədləri, papkaları götürüb yuxarı komandanlığa təhvil vermişdi. Bu sənədlərin ələ keçirilməsi də 44 günlük müharibədə düşmənə qarşı vuruşan əsgərlərimizin döyüş əzminin yüksəlməsi, irəliləməsi, torpaqlarımızı işğaldan azad etmələri üçün əhəmiyyətli rol oynadı. Hadruta ilk bayrağı oğlum Elyar sancıb.
Özü şəhid oldu, beş övladı yadigar qaldı. İkinci övladı-qızı Aprel müharibəsi müharibəsi günlərində dünyaya gəlib. Elyar onda Aprel döyüşlərində düşmənə qarşı vuruşurdu. Bir il sonra isə üçəm oğlanları doğulub. Oğlum müharibələrdə olduğu üçün onlar ata nə olduğunu bilmədilər. Bir böyük övladı onu xatırlayır. Vətən müharibəsində iki oğlum döyüşüb. Allah dövlətimizi, millətimizi qorusun, şəhidlərimizə rəhmət etsin”.
Ata deyir ki, müharibələrdə savaşmaq, qəhrəmanlıq göstərmək oğlunun alnına yazılıbmış. “Döyüşçü yoldaşları onun qorxmaz, cəsur və Vətən eşqi ilə alışıb yanan bir dost kimi xatırlayırlar. Elyar Vətən Müharibəsinin gedişatında bir neçə dəfə hərbçi yoldaşlarını ölümdən xilas edib. Elyarın böyük şücaətləri var. Kiçik oğlumla eyni istiqamətdə döyüşsələr də, amma bir-birilərini görmürdülər. İmkan tapan kimi Elyar da, kiçik oğlum da bizə zəng vururdu. Kiçik oğlum Elçin Vəliyev qazidir, dövlətimizin strateji obyektlərindən olan neft sənayesində çalışır”.
Elyarın sonuncu dəfə dəfə şəhid olmazdan bir gün əvvəl oktyabrın 18-də ailəsi ilə danışdığını deyən Hacı Arif bildirir ki, oğlu Xocavəndin Edilli kəndinin ərazisində Qırmızı bazar istiqamətində düşmənlə qeyri-bərabər ağır döyüşdə şəhid olub. “Sonuncu döyüşündə də böyük şücaətlər göstərib. Düşmənin xeyli sayda canlı qüvvəsini məhv edib. Döyüşü idarə edən bir oğlan idi. İdamançı idi. Ordu İdman Klubunun qaydasız döyüş üzrə beş dəfə çempion olmuşdu. Namaz qılan idi, 20 nəfərə yaxın adamı namaza gətirmişdi. Xidməti dövründə 200-dən çox yaralı xilas edib. Aprel döyüşlərində Səxavət Salmanovu da oğlum xilas edib. Yarasına müdaxilə edərək ona ilkin tibbi yardım göstərib qanaxmanı dayandırıb. Həm həkim, həm xüsusi təyinatlı idi. Qaraxanbəyli uğrunda gedən döyüşlərdə Seyidbala Əliyevin həyatını xilas edib”.
Vətən müharibəsində ağır döyüşlərin birində Elyar Vəliyev və digər hərbçi yoldaşları Füzuli rayonunun Horadiz kəndi yaxınlığında düşmənin 200-ə yaxın canlı qüvvəsini məhv ediblər. Həmin gecə onların xüsusi şücaəti sayəsində düşmənin 12 tankı və xeyli sayda hərbi sursatı darmadağın edilib, bir neçəsi texnikası ələ keçirilib.
Daha sonra Cəbrayıl istiqamətindəki döyüşlərə yollanan Elyarın növbəti tapşırığı içərisində düşmənin yüksək rütbəli zabitləri olan hərbi nəqliyyat vasitələrini partlatmaq olub. Tapşırıq uğurla yerinə yetirilib. Elyar düşmənin UAZ markalı avtomobilini partladaraq biri polkovnik olmaqla bir neçə erməni zabitini məhv edib.
Döyüş başlayan gündən bir an belə gözlərini yummayan, qorxu hissinin nə olduğunu unudan Elyarın son döyüşü Xocavənd rayonunun Qırmızı Bazar adlanan ərazisində olub.Yanındakı hərbçi yoldaşları şəhid olandan sonra döyüş meydanında tək qalan qəhrəmanımızın döyüş sursatı tükənib. Bu zaman xain düşmənin snayper gülləsi gizir Elyar Vəliyevin ürəyinə tuş gəlib, o, 29 yaşında şəhid olub.
“O, xaraktercə sərt, xasiyyətcə mülayim bir övlad idi. Vətən Müharibəsi zamanı düşmənin 12 tankını, 200-ə yaxın canlı qüvvəsini məhv edib, bir yaralı erməni əsgərini əsir götürüb. Cəbrayılın azad edilməsi zamanı bir hərbi avtomobili partladıblar, yüksək rütbəli zabitləri məhv ediblər. Bir "KamAZ" dolu erməni əsgərini məhv ediblər. Elyar erməni qərargahını ələ keçirib və erməni polkovniki məhv edib. Gülləsi başa çatanadək döyüşüblər".
Şəhid gizir Elyar Arif oğlu Vəliyev ölümündən sonra “ Vətən uğrunda” medalı və “Vətən Müharibəsi Qəhrəmanı” fəxri adı ilə təltif olunub. Xatirəsinin əbədiləşdirilməsi məqsədilə onun adı Qobustan rayonunun mərkəzi küçələrindən birinə verilib.
İradə SARIYEVA
