“Borcalı” İctimai Birliyinin təşəbbüsü və təkilatçılığı ilə Azərbaycanda Atatürk Mərkəzində tanınmış şair və publisist İlyas İfəndi Vəfalının 65 illiyinə həsr olunmuş tədbir və “Şeiriyyətin yolçusuyam” adlı şeirlər kitabının təqdimatı keçirilib. Bu barədə baki-xeber.com-a “Borçalı” İB-nin Mətbuat xidmətindən məlumat verilib.
Borcalı” İctimai Birliyinin İdarə Heyətinin sədri, şair-publisist Dəyanət Osmanlı İlyas Əfəndinin poeziya yaradıcılığından və jurnalist fəaliyyətinin başlıca xüsusiyyətlərindən danışmışdır.
Qeyd olunmuşdur ki, İ.Əfəndi bir neçə şeir kitabının müəllifi olmaqla yanaşı, müxtəlif qəzet və dərgilərdə elm, təhsil, ədəbiyyat, sosial sahələrə aid maraqlı, yaddaqalan məqalələr yazıb, dərc etdirmişdir. Onun müraciət etdiyi mövzular əsasən milli, ictimai səciyyə daşıyır. İndiyədək nəşr olunmuş ”Borçalı oğluyam”, “Şeiriyyətin yolçusuyam” şeir kitablarındakı şeirlərdə, “Şəmsi, Xalid və Həcər dastanı” poemasında vətənpərvərlik, insana sevgi, doğma yurda sədaqət motivləri üstünlük təşkil edir.
Həmkarları, qələm dostları, ziyalılar – Paşa Babakərli, Təbriz iman, Fərman Bədəlov, Ziyadxan Budaq, Rövşən Xallədinoğlu, Rəşad Saraçlı, Könül Quluzadə, Müşfiq Çobanlı, Sədi Yaradanqulu, Elmira Tomris Soltanlı, Hüseyn Faxralı, Lətifə Rəşid, Surxay Məmmədoğlu, Məlahət Quliyeva, Bayram Aşıqlı və başqaları İlyas Əfəndinin ictimai məsələlərdə də daim milli-mədəni dəyərlərə bağlı vətəndaş mövqeyində dayandığını vurğulayaraq, fərdi-mənəvi və iş keyfiyyətləri barədə ürək sözlərini söyləmiş, ona yeni yaradıcılıq uğurları arzulamışlar.
Tədbirdə istedadlı el aşıqlarımızdan aşıqlar – Ataxan Qasımlı, Fikrət Borçalı, Samir Borçalı rəngarəng repartuarla cıxış etmiş, şairin şeirlərindən nümunələr səsləndirmişlər.
Sonda Borçalı İctimai Birliyi adından İlyas Əfəndiyə ədəbi-mədəni fəaliyyətinə və 65 illik yubileyinə görə “ Borçalının vətənpərvər şairi” Diplomu təqdim olunmuşdur. İlyas Əfəndi tədbirin təşkilatçılarına və iştirakçılarına göstərdikləri sayğı və dəyərə, xoş sözlərə görə minnərdarlğını bildirmişdir.
