Fevralın 5-də Azərbaycan Milli Xalça Muzeyində “Səssiz dualar - Zirə Cümə məscidində qorunan mədəni irs” sərgisi açılıb. Tədbirdə Milli Məclisin deputatları, xarici ölkələrin səfirləri, tanınmış mədəniyyət və incəsənət xadimləri iştirak ediblər.
Muzeyin direktoru, Əməkdar mədəniyyət işçisi Əminə Məlikova sərgi barədə məlumat verib. O qeyd edib ki, “Səssiz dualar - Zirə Cümə məscidində qorunan mədəni irs” adlı sərgi mədəni yaddaşımızın, mənəvi dəyərlərimizin və tarixi irsimizin qorunmasına xidmət edən mühüm hadisədir. Əminə Məlikova vurğulayıb ki, Zirə Cümə məscidində unikal eksponatların mövcudluğunun şahidi olub və bu nümunələrin toplanması, qorunması, eləcə də ictimaiyyətə təqdim edilməsi mədəni irsin yaşadılması və gələcək nəsillərə ötürülməsi baxımından xüsusi əhəmiyyət daşıyır.
Milli Məclisin deputatı, parlamentin Mədəniyyət komitəsinin sədri Polad Bülbüloğlu çıxışında sərginin gözəl təşəbbüs və uğurlu ideya olduğunu bildirib. O qeyd edib ki, məscidlərimiz və dini məkanlarımız xalqımızın və tariximizin ayrılmaz hissəsidir.
“Bu məkanlar bu gün də fəaliyyət göstərir, mənəvi həyatımızda öz yerini qoruyub saxlayır. Eyni zamanda, muzeylərimizdə, xalça sərgilərində və müxtəlif ekspozisiyalarda nümayiş olunan tarixi-mədəni irsimiz cəmiyyətimiz üçün böyük dəyər daşıyır. Bu sərgi məhz həmin iki aləmi - dini məkanla mədəni irsi bir araya gətirməsi baxımından xüsusilə əhəmiyyətlidir”, - deyə o əlavə edib.
Deputatın sözlərinə görə, bundan sonra digər muzeylər, o cümlədən Azərbaycan Milli Xalça Muzeyi də bu cür sərgilərin təşkilinə daha geniş şəkildə qoşula bilər. O vurğulayıb ki, bu, həm zəruridir, həm də cəmiyyət üçün faydalıdır. Ən əsası isə məscidlərlə mədəniyyət ocaqları arasında vəhdətin yaranmasıdır ki, bu da müsbət haldır.
Milli Məclisin deputatı, Mədəniyyət komitəsinin sədr müavini Günay Əfəndiyeva çıxışında sərginin əhəmiyyətindən danışıb. O bildirib ki, maddi və qeyri-maddi mədəni irsimizin qorunması, müasir dövrdə təbliği və gələcək nəsillərə ötürülməsi Azərbaycan dövlət siyasətinin əsas prioritetlərindəndir.
Günay Əfəndiyeva vurğulayıb ki, təmsil etdiyi Xəzər və Pirallahı rayonlarının ərazisində çoxsaylı mədəni, dini və tarixi abidələr mövcuddur. Onun sözlərinə görə, sərgidə təqdim olunan eksponatlar uzun illər məscidin özündə, eləcə də sakinlərin arxivlərində, evlərində, nənələrin sandıqlarında qorunub saxlanılıb. Deputat, həmçinin qeyd edib ki, Zirə Cümə məscidi qədim dini ibadət məkanlarımızdan biridir: “Məscid 2016-cı ildə Azərbaycanın Birinci vitse-prezidenti Mehriban xanım Əliyevanın təşəbbüsü və dəstəyi ilə əsaslı təmir olunub. Bu məscid kiçik bir muzeyi xatırladır. Burada yalnız Azərbaycana məxsus əl sənəti nümunələri deyil, müxtəlif ölkələrdən - Özbəkistan, Türkiyə, İran, İraq, Türkmənistan gətirilmiş dəyərli eksponatlar da yer alır”, - deyə Günay Əfəndiyeva qeyd edib.
Bakı şəhəri Xəzər Rayon İcra Hakimiyyətinin başçısı Elşən Salahov sərginin xalqımızın böyük tarixinin, yaddaşının və mədəni irsinin təcəssümü olduğunu diqqətəçatdırıb. Onun sözlərinə görə, belə təşəbbüslərə dövlət başçısı tərəfindən hər zaman xüsusi diqqət və önəm göstərilir. Bu cür layihələr cəmiyyətimizi daha da birləşdirəcək, milli-mədəni dəyərlərimizin qorunmasına və təbliğinə mühüm töhfə verəcək.
Elşən Salahov bu cür eksponatların qorunub saxlanılmasının mədəni irsimizin yaşadılması baxımından xüsusi əhəmiyyət daşıdığını qeyd edib.
Daha sonra Zirə Cümə məscidinin dini icmasının sədri Hacı Qədir Nəcəfov çıxışında məsciddə qorunan tarixi əşyaların illər boyu insanların inancına, dualarına və mənəvi həyatına şahidlik etdiyini vurğulayaraq, bu irsin qorunması və ictimaiyyətə təqdim olunması istiqamətində göstərilən diqqəti yüksək qiymətləndirib. “Biz bilirik ki, ölkəmizdə dəyərlər həssaslıqla qorunur. Əgər bir insan nənəsinin kəlağayısını, babasının papağını əmanət kimi gətirib təqdim edirsə, bu, böyük etimaddır. Bu əmanətləri möhkəm qorumaq, saxlamaq və gələcək nəsillərə ötürmək lazımdır. Çünki milli irsi qoruyanda, həmin irs də sonda səni qoruyur”, - deyə Hacı Qədir Nəcəfov qeyd edib. Onun sözlərinə görə, İrəvanda bir zamanlar Sərdar, Rəcəb Paşa, Hacı Novruzəli bəy, Sərtib xan məscidləri və digər ibadət ocaqları fəaliyyət göstərib. O bildirib ki, bu gün yeganə Göy məscid Qərbi Azərbaycanın dini-mədəni ənənələrinin yaşadılmasında xüsusi rol oynayır.
Dini icmanın sədri vurğulayıb ki, məscid təkcə ibadət yeri deyil, eyni zamanda mədəniyyətin, maarifin və tarixi irsin qorunduğu məkan, gələcək nəsillərə körpü olan mənəvi ocaqdır.
Natiqlər layihənin təşəbbüskarı Milli Məclisin deputatı, Mədəniyyət komitəsinin sədr müavini Günay Əfəndiyevaya və sərginin təşkilində əməyi olan hər kəsə təşəkkürlərini bildiriblər.
Tədbir çərçivəsində Zirə Cümə məscidi haqqında Mübariz Nağıyevin rejissoru olduğu “Tarixin əmanəti” adlı qısametrajlı film nümayiş olunub. Həmçinin “Zəfər” muğam qrupu tərəfindən milli musiqilər səsləndirilib, Şüvəlan qəsəbə Mədəniyyət Evinin “Səma” rəqs ansamblı rəqslər ifa edib.
Sonra iştirakçılar sərgi ilə tanış olublar.
Sərgidə müxtəlif dövrlərdə ayrı-ayrı şəxslər tərəfindən Zirə Cümə məscidinə ianə edilmiş milli irs nümunələri nümayiş olunub. Ekspozisiyada xovlu və xovsuz xalçalar, xalça məmulatları, bədii metal, geyim və tikmə nümunələri, “Qurani-Kərim”in nüsxələri, həmçinin nadir əlyazma kitablar yer alıb. Eksponatların əksəriyyətinin yaşı bir əsrdən çoxdur və onlar azərbaycanlı sənətkarlar tərəfindən yaradılıb.
Milli Məclisin Mədəniyyət komitəsi, Mədəniyyət Nazirliyi və Azərbaycan Milli Xalça Muzeyinin birgə təşkilatçılığı ilə keçirilən sərgi fevralın 8-dək davam edəcək.
