ETN: “...İcraçı qurumlarla birgə müzakirələr aparılacaq”
Aydın Xan Əbilov: “İcraçı dövlət qurumları kadrların hazırlanması işinə indidən başlamalıdır ki, tədris başlayanda hər hansı bir problem yaşanmasın”
Prezident İlham Əliyevin təsdiqlədiyi "Azərbaycan Mədəniyyəti - 2040" Mədəniyyət Konsepsiyasına əsasən 2026–2030-cu ilə qədər mədəniyyətin təhsilin tərkib hissəsinə çevrilməsi, o cümlədən mədəniyyət sahələrinə, Azərbaycanın mədəniyyət dəyərlərinə dair fənn və biliklərin tədrisinin təmin edilməlidir. İcraçı qurumlar Mədəniyyət Nazirliyi və Elm və Təhsil Nazirliyidir. Məktəblərdə mədəniyyət fənninin tədris edilməsi artıq geniş müzakirə olunur və müəyyən məsələlər ətrafında yaranan suallara cavab axtarılır.
Məktəblərdə mədəniyyət fənninin tədrisi üçün kadr bazası, kadr potensialı varmı? Məktəblərdə mədəniyyət dərslərini kimlər keçəcək? Belə müəllimlər varmı, hansı ali məktəbdə hazırlanır? Onlar haranı bitiriblər? Kadrlar necə hazırlanacaq?
Suallarımıza cavab almaq üçün icraçı qurumlar Mədəniyyət Nazirliyi və Elm və Təhsil Nazirliyinə müraciət etdik. Elm və Təhsil Nazirliyindən (ETN) bildirdilər ki, bu istiqamətdə yaranan suallara cavab vermək nisbətən tezdir. “Azərbaycan Mədəniyyəti – 2040” Azərbaycan Respublikasının Mədəniyyət Konsepsiyasında Elm və Təhsil Nazirliyinin icraçılar siyahısında olduğu bütün tədbirlər, o cümlədən sorğu edilən tədbirlə bağlı digər icraçı qurumlarla birgə müzakirələr aparılacaq və atılacaq addımlar müəyyənləşdiriləcəkdir”-deyə Elm və Təhsil Nazirliyindən baki-xeber.com-a bildirildi.
Ekspertlər bildirir ki, hazırda bu sahədə kadr bazası demək olar yoxdur. Azərbaycan Dövlət Mədəniyyət və İncəsənət Universitetində müəllim kadrları yetişdirilmir, Azərbaycan Dövlət Pedoqoji Universitetində də mədəniyyət fənni müəllimliyi ilə bağlı ixtisas haqda hər hansı bir informasiya yoxdur. Ekspertlər hesab edirlər ki, mədəniyyət fənninin tədrisi müsbət haldır, amma bunun üçün əvvəlcə kadrlar hazırlanmalıdır, bu tədrisi ixtisaslı müəllimlər həyata keçirməlidir. Düzdür, Mədəniyyət və İnsəcənət Universitetində, eləcə də mədəniyyət profilli məktəblərdə mədəniyyətşünaslıq, kultrologiya tədris olunur, bu işi sənətşünaslar, kultroloqlar həyata keçirir.
İctimai və mədəniyyət xadimi, Yeni Yazarlar və Sənətçilər İctimai Birliyinin sədri, www.kitabxana.net – Mir Cəlal Paşayev adına Milli Virtual-Elektron Kitabxananın yaradıcısı, Prezident təqaüdçüsü, yazıçı-kulturoloq Aydın Xan Əbilov baki-xeber.com-a bildirdi ki, əslində mədəniyyət adamları Azərbaycan Mədəniyyət Konsepsiyasının fundamental bir sənəd olaraq qəbul edilməsini çoxdan gözləyirdi. “Bu sənəd artıq Prezidentin sərəncamı ilə təsdiqlənib. Düzdür, bu konsepsiya sanki müasir dövrüb tələblərinə elə də cavab vermir. Bu sənədin layihəsini hazırlayıb ölkə başçısına təqdim edən məmurlar bilməli idilər ki, XXI yaşayırıq və Mədəniyyət Konsepsiyası yaşlı nəslin nümayəndələri üçün yox, məhz gənclər, Azərbaycan mədəniyyətini dünyada tanıtmaq üçün elm və təhsilin uzalaşdırmaq üçün lazım olan proqram xarakterli bir sənəddir.
Amma bütövlükdə "Azərbaycan Mədəniyyəti - 2040" elm və təhsilin mədəniyyətlə uzalaşması, inteqrasiyası ilə bağlı çox mühüm sənəddir və çox maraqlı bəndləri özündə birləşdirir. Orada mədəniyyətşünaslığın (kultrologiya) ali və orta məktəblərdə tədrisi ilə bağlı istiqamətverici bəndlər də var. Biz 20 ilə yaxındır ki, Azərbaycanda orta məktəblərin yuxarı sinif şagirdləri üçün mədəniyyət, onun həyatımızdakı rolu, mədəniyyətin bizim özümüzə məxusluğumuzu göstərən bir hadisə olaraq tədris edilməli olduğunu deyirdik. Kultrologiyanın həm orta, həm də ali məktəblərdə tədrisi ilə bağlı hazırda çətinliklər mövcuddur. Hazırda kultrologiya elmi sahəsində vəsaitlərin, kitabların azlığı, bu elm sahəsinin metrologiyasının işlənib hazırlanması ilə bağlı problemlərimiz var. Ən əsas problem isə kadrlarla əlaqədardır. Biz kultrologiyanı mədəniyyətşünaslığın bir hissəsi olaraq, yaxud mədəniyyətşünaslıq kimi götürürük. Halbuki, kultrologiya özündə daha böyük hadisələri ehtiva edir”.
A.X.Əbilov hesab edir ki, bu tədris sahəsində Rusiya və Avropa ölkələri də daxil olmaqla xarici təcrübədən yararlanmalıyıq. “Bu gün kadr probleminin həlli istiqamətində ciddi addımların atılmasına zərurət var. Çünki orta məktəblərdə bu fənni tədris edəcək kadrların hazırlanması vacibdir. Ali məktəblərdə kultrologiya üzrə pedoqoji kadrların hazırlanmasına xüsusi önəm verməliyik. Əgər bu sahə üzrə kadrlar hazırlaya bilsək və onlar da orta və ali məktəblərdə kultrologiyanı tədris etsələr çox müsbət hal olar. Fikrimcə, icraçı dövlət qurumları kadrların hazırlanması işinə indidən başlamalıdır ki, tədris başlayanda hər hansı bir problem yaşanmasın”-deyə A.X.Əbilov qeyd etdi.
İradə SARIYEVA
